Aṇguttara-Nikāya
II. Duka Nipāta
III. Bāla Vagga
Adapted from the 1995 edition of the digital version of the Sri Lanka Buddha Jayanti Tripitaka Series.
Sutta 21
[21] [pts] [than] [olds] "Dve'me bhikkhave bālā.|| ||
Katame dve?|| ||
Yo ca accayaṃ accayato na passati,||
yo ca accayaṃ desentassa yathā-dhammaṃ na patigaṇhāti.|| ||
Ime kho bhikkhave dve bālā" ti.|| ||
"Dve'me bhikkhave paṇḍitā.|| ||
Katame dve?|| ||
Yo ca accayaṃ accayato passati,||
yo ca accayaṃ desentassa yathā-dhammaṃ patigaṇhāti.|| ||
Ime kho bhikkhave dve paṇḍitā" ti.|| ||
Sutta 22
[22] [pts] [olds] "Dve'me bhikkhave Tathāgataṃ abbh'ācikkhanti.|| ||
Katame dve?|| ||
Duṭṭho vā dos'antaro,||
saddho vā duggahītena.|| ||
Ime kho bhikkhave dve Tathāgataṃ abbh'ācikkhantī" ti.|| ||
Sutta 23
[23] [pts] [olds] "Dve'me bhikkhave Tathāgataṃ abbh'ācikkhanti.|| ||
Katame dve?|| ||
[60] Yo ca abhāsitaṃ alapitaṃ Tathāgatena bhāsitaṃ lapitaṃ Tathāgatenā ti dīpeti,||
yo ca bhāsitaṃ lapitaṃ Tathāgatena abhāsitaṃ alapitaṃ Tathāgatenā ti dīpeti.|| ||
Ime kho bhikkhave dve Tathāgataṃ abbh'ācikkhantī" ti.|| ||
Sutta 24
[24] [pts] [olds] "Dve'me bhikkhave Tathāgataṃ nābbhācikkhanti.|| ||
Katame dve?|| ||
Yo ca abhāsitaṃ alapitaṃ Tathāgatena abhāsitaṃ alapitaṃ Tathāgatenā ti dīpeti,||
yo ca bhāsitaṃ lapitaṃ Tathāgatena bhāsitaṃ lapitaṃ Tathāgatenā ti dīpeti.|| ||
Ime kho bhikkhave dve Tathāgataṃ nābbhācikkhantī" ti.|| ||
Sutta 25
[25] [pts] [than] [olds] "Dve'me bhikkhave Tathāgataṃ abbh'ācikkhanti.|| ||
Katame dve?|| ||
Yo ca neyyatthaṃ suttantaṃ nītattho suttanto ti dīpeti,||
yo ca nītatthaṃ suttantaṃ neyyattho suttanto ti dīpeti.|| ||
Ime kho bhikkhave dve Tathāgataṃ abbh'ācikkhantī" ti.|| ||
Sutta 26
[26] [pts] [olds] "Dve'me bhikkhave Tathāgataṃ nābabhācikkhanti.|| ||
Katame dve?|| ||
Yo ca neyyatthaṃ suttantaṃ neyyattho suttanto ti dīpeti,||
yo ca nītatthaṃ suttantaṃ nītattho suttanto ti dīpeti.|| ||
Ime kho bhikkhave dve Tathāgataṃ nābbhācikkhantī" ti.|| ||
Sutta 27
[27] [pts] [olds] "Paṭicchannakammantassa bhikkhave dvinnaṃ gatīnaṃ aññatarā gati pāṭikaṇkhā:|| ||
Nirayo vā tiracchāna-yoni vā" ti.|| ||
"Appaṭi-c-channa-kammantassa bhikkhave dvinnaṃ gatīnaṃ aññatarā gati pāṭikaṇkhā:|| ||
devā vā manussā vā" ti.|| ||
Sutta 28
[28] [pts] [olds] "Micchā-diṭṭhikassa bhikkhave dvinnaṃ gatīnaṃ aññatarā gati pāṭikaṇkhā:|| ||
Nirayo vā tiracchāna-yoni vā" ti.|| ||
"Sammā-diṭṭhikassa bhikkhave dvinnaṃ gatīnaṃ aññatarā gati pāṭikaṇkhā:|| ||
devā vā manussā vā" ti.|| ||
"Dussīlassa bhikkhave dve paṭiggāhā:|| ||
Nirayo vā tiracchāna-yoni vā" ti.|| ||
"Sīla-vato bhikkhave dve paṭiggāhā:|| ||
devā vā manussā vā" ti.|| ||
Sutta 29
[29] [pts] [olds] "Dvāhaṃ bhikkhave attha-vase sampassamāno araññe vana-pa-t-thāni pantāni sen'āsanāni paṭisevāmi.|| ||
Katame dve?|| ||
Attano ca diṭṭha-dhamma-sukha-vihāraṃ sampassamāno,||
[61] pacchimañ ca janataṃ anukampamāno.|| ||
Ime kho ahaṃ bhikkhave dve attha-vase sampassamāno araññe vana-pa-t-thāni pantāni sen'āsanāni paṭisevāmī" ti.|| ||
Sutta 30
[30] [pts] [than] [olds] "Dve'me bhikkhave dhammā vijja-bhāgiyā.|| ||
Katame dve?|| ||
Samatho ca vipassanā ca.|| ||
Samatho ca bhikkhave bhāvito kam attham anubhoti?|| ||
Cittaṃ bhāvīyati.|| ||
Cittaṃ bhāvitaṃ kam attham anubhoti?|| ||
Yo rāgo, so pahīyati.|| ||
Vipassanā bhikkhave bhāvito kam attham anubhoti?|| ||
Paññā bhāvīyati.|| ||
Paññā bhāvitā kam attham anubhoti?|| ||
Yā avijjā, sā pahīyati|| ||
Rāgupakkiliṭṭhaṃ vā bhikkhave cittaṃ na vimuccati.|| ||
Avijjupakkiliṭṭhā vā paññā na bhāvīyati.|| ||
Iti kho bhikkhave rāga-virāgā ceto-vimutti,||
avijjā-virāgā paññā-vimuttī" ti.|| ||
Bāla Vagga Tatiya
