Aṇguttara-Nikāya
III. Tika Nipāta
II. Rathakāra Vagga
Sutta 19
Paṭhama Pāpaṇika Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh][upal] Evaṃ me sutaṃ:
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍakassa ārāme.|| ||
"Tīhi bhikkhave aṇgehi samannāgato pāpaṇiko abhabbo anadhigataṃ vā bhogaṃ adhigantuṃ,||
adhigataṃ vā bhogaṃ phātikatuṃ.|| ||
Katamehi tīhi?|| ||
Idha bhikkhave pāpaṇiko||
pubbaṇha-samayaṃ na sakkaccaṃ kammantaṃ adhiṭṭhāti,||
majjhantikasamayaṃ na sakkaccaṃ kammantaṃ adhiṭṭhāti,||
sāyaṇha-samayaṃ na sakkaccaṃ kammantaṃ adhiṭṭhāti.|| ||
Imehi kho bhikkhave tīhi aṇgehi samannāgato pāpaṇiko abhabbo anadhigataṃ vā bhogaṃ adhigantuṃ,||
adhigataṃ vā bhogaṃ phātikatuṃ.|| ||
■
Evam eva kho bhikkhave tīhi dhammehi samannāgato bhikkhu abhabbo anadhigataṃ vā kusalaṃ dhammaṃ adhigantuṃ,||
adhigataṃ vā kusalaṃ dhammaṃ phātikatuṃ.|| ||
Katamehi tīhi?|| ||
Idha bhikkhave bhikkhu pubbaṇha-samayaṃ na sakkaccaṃ samādhinimittaṃ adhiṭṭhāti,||
majjhantikasamayaṃ na sakkaccaṃ samādhinimittaṃ adhiṭṭhāti,||
sāyaṇha-samayaṃ na sakkaccaṃ samādhinimittaṃ adhiṭṭhāti.|| ||
Imehi kho bhikkhave tīhi dhammehi samannāgato bhikkhu abhabbo anadhigataṃ vā kusalaṃ dhamamaṃ adhigantuṃ,||
adhigataṃ vā kusalaṃ dhammaṃ phātikatun ti.|| ||
§
[116] Tīhi bhikkhave aṇgehi samannāgato pāpaṇiko bhabbo anadhigataṃ vā bhogaṃ adhigantuṃ,||
adhigataṃ vā bhogaṃ phātikatuṃ.|| ||
Katamehi tīhi?|| ||
Idha bhikkhave pāpaṇiko pubbaṇha-samayaṃ sakkaccaṃ kammantaṃ adhiṭṭhāti,||
majjhantikasamayaṃ sakkaccaṃ kammantaṃ adhiṭṭhāti,||
sāyaṇha-samayaṃ sakkaccaṃ kammantaṃ adhiṭṭhāti.|| ||
Imehi kho bhikkhave tīhi aṇgehi samannāgato pāpaṇiko bhabbo anadhigataṃ vā bhogaṃ adhigantuṃ,||
adhigataṃ vā bhogaṃ phātikatuṃ.|| ||
■
Evam eva kho bhikkhave tīhi dhammehi samannāgato bhikkhu bhabbo anadhigataṃ vā kusalaṃ dhammaṃ adhigantuṃ,||
adhigataṃ vā kusalaṃ dhammaṃ phātikatuṃ.|| ||
Katamehi tīhi?|| ||
Idha bhikkhave bhikkhu pubbaṇha-samayaṃ sakkaccaṃ samādhinimittaṃ adhiṭṭhāti,||
majjhantikaṃ samayaṃ sakkaccaṃ samādhinimittaṃ adhiṭṭhāti||
sāyaṇha-samayaṃ sakkaccaṃ samādhinimittaṃ adhiṭṭhāti.|| ||
Imehi kho bhikkhave tīhi dhammehi samannāgato bhikkhu bhabbo anadhigataṃ vā kusalaṃ dhamamaṃ adhigantuṃ,||
adhigataṃ vā kusalaṃ dhammaṃ phātikatuṃ" ti.|| ||
