Aṇguttara-Nikāya
III. Tika Nipāta
VI. Brāhmaṇa Vagga
Sutta 57
Vaccha-Gotta Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][than][bodh] Evaṃ me sutaṃ.|| ||
Evaṃ me sutaṃ ekaṃ samayaṃ Bhagavā Sāvatthiyaṃ viharati.|| ||
Atha kho Vacchagotto paribbājako yena Bhagavā ten'upasaṇkami upasaṇkamitvā Bhagavatā saddhiṃ sammodi.|| ||
Sammodanī kathaṃ sārāṇīyaṃ vīti-sāretvā.|| ||
Eka-m-antaṃ nisinno kho Vacchagotto paribbājako Bhagavantaṃ etad avoca:|| ||
"Sutaṃ me taṃ bho Gotama Samaṇo Gotamo evam āha:|| ||
'Mayham eva dānaṃ [161] dātabbaṃ,||
na aññesaṃ dānaṃ dātabbaṃ,||
mayham eva sāvakānaṃ dānaṃ dātabbaṃ,||
na aññesaṃ sāvakānaṃ dānaṃ dātabbaṃ,||
mayham eva dinnaṃ maha-p-phalaṃ,||
na aññesaṃ dinnaṃ maha-p-phalaṃ,||
mahham eva sāvakānaṃ dinnaṃ maha-p-phalaṃ,||
na aññesaṃ sāvakānaṃ dinnaṃ maha-p-phalan' ti.|| ||
Ye te bho Gotama evam āhaṃsu:||
Samaṇo Gotamo evam āha:|| ||
'Mayham eva dānaṃ dātabbaṃ,||
na aññesaṃ dānaṃ dātabbaṃ,||
mayham eva sāvakānaṃ dānaṃ dātabbaṃ,||
na aññesaṃ sāvakānaṃ dānaṃ dātabbaṃ,||
mayham eva dinnaṃ maha-p-phalaṃ,||
na aññesaṃ dinnaṃ maha-p-phalaṃ,||
mahham eva sāvakānaṃ dinnaṃ maha-p-phalaṃ,||
na aññesaṃ sāvakānaṃ dunnaṃ maha-p-phalan' ti.|| ||
Kacci te bhoto Gotamassa vutta-vādino?|| ||
Na ca bhavantaṃ Gotamaṃ abhutena abbh'ācikkhanti?|| ||
Dhammassa c'ānudhammaṃ vyākaronti?|| ||
Na ca koci saha-dhammiko vādānupāto gārayhaṃ ṭhānaṃ āgacchati?|| ||
Anabbhakkhātukāmā hi mayaṃ bhavantaṃ Gotaman" ti.|| ||
■
Ye te Vaccha evam āhaṃsu samaṇo Gotamo evam āha:|| ||
'Mayham eva dānaṃ dātabbaṃ,||
na aññesaṃ dānaṃ dātabbaṃ,||
mayham eva sāvakānaṃ dānaṃ dātabbaṃ,||
na aññesaṃ sāvakānaṃ dānaṃ dātabbaṃ,||
mayham eva dinnaṃ maha-p-phalaṃ,||
na aññesaṃ dinnaṃ maha-p-phalaṃ,||
mahham eva sāvakānaṃ dinnaṃ maha-p-phalaṃ,||
na aññesaṃ sāvakānaṃ dunnaṃ maha-p-phalan' ti.|| ||
Na me te vuttādino,||
abbh'ācikkhanti ca pana maṃ te asatā abhutena.|| ||
■
Yo kho Vaccha paraṃ dānaṃ dadantaṃ vāreti,||
so tiṇṇaṃ antarāya-karo hoti,||
tiṇṇaṃ pāripanathiko.|| ||
Katamesaṃ tiṇṇaṃ?|| ||
Dāyakassa puññantarāya-karo hoti,||
paṭiggāhakānaṃ lābhantarāya-karo hoti,||
pubb'eva kho pan'assa attā khato ca hoti upahato ca.|| ||
Yo kho Vaccha paraṃ dānaṃ dadantaṃ vāreti,||
so imesaṃ tiṇṇaṃ antarāya-karo hoti,||
tiṇṇaṃ pāripanthiko.|| ||
■
Ahaṃ kho pana Vaccha evaṃ vadāmi:|| ||
'Ye pi te candanikāya vā oligalle vā pāṇā,||
tatra pi yo thālidhovanaṃ vā sarāvadhopanaṃ vā chaḍḍeti.|| ||
Ye tattha pāṇā,||
te yena yāpentū' ti.|| ||
■
Tato nidānam pahaṃ Vaccha puññassa āgamaṃ vadāmi.|| ||
Ko pana vādo manussa-bhūte.|| ||
Api c'āhaṃ Vaccha sīla-vato dinnaṃ maha-p-phalaṃ vadāmi,||
no tathā du-s-sīle.|| ||
So ca hoti,||
pañc'aṇga-vi-p-pahīno pañc'aṇga-samannāgato.|| ||
■
Katamāni pañcaṇgāni pahīṇāni honti?|| ||
Kāma-c-chando pahīṇo hoti,||
vyāpādo pahīṇo hoti,||
thīna- [162] middhaṃ pahīnaṃ hoti.|| ||
Uddhacca-kukkuccaṃ pahīnaṃ hoti,||
vicikicchā pahīṇā hoti.|| ||
Imāni pañcaṇgāni pahīṇāni honti.|| ||
■
Katamehi pañcahaṇgehi samannāgato hoti?|| ||
Asekkhena sīla-k-khandhena samannāgato hoti,||
asekkhena samādhi-k-khandhena samannāgato hoti,||
asekkhena paññā-k-khandhena samannāgato hoti,||
asekkhena vimutti-k-khandhena samannāgato hoti.|| ||
Asekkhena vumuttiñāṇa-dassana-k-khandhena samannāgato hoti.|| ||
Imehi pañcaṇgehi samannāgato hoti.|| ||
Iti pañc'aṇga-vippahīṇe pañc'aṇga-samannāgate dinnaṃ maha-p-phalaṃ vadāmī" ti.|| ||
Iti kaṇhāsu setāsu rohiṇīsu harīsu vā,||
Kammāsāsu sarūpāsu gosu pārevatāsu vā.||
Yāsu kāsu ca etāsu danto jāyati puṇgavo,||
Dhorayho bala-sampanno kalyāṇa-javanikkamo.||
Tam eva bhāre yuñjanti nāssa vaṇṇaṃ parikkhare,||
Evam eva manussesu yasmiṃ kasmiñ ca jātiyaṃ.||
Khattiye brāhmaṇe vesse sudde caṇḍāla-pukkuse,||
Yāsu kāsu ca etāsu danto jāyati subbato.||
Dhammaṭṭho sīla-sampanno sacca-vādi hirī-mano,||
Pahīṇajātimaraṇo Brahma-cariyassa kevalī.||
Pannabhāro visaṃyutto katakicco anāsavo,||
Pāragū sabba-dhammānaṃ anupādāya nibbuto.||
Tasmiñ yeva viraje khette vipulā hoti dakkhiṇā,||
Bālā ca avijānantā dummedhā assutāvino.||
Bahiddhā dadanti dānā na hi sante upāsare,||
Yo ca sante upāsanti sappaññe dhīra-sammate.||
Saddhā ca tesaṃ sugate mūlajātā pati-ṭ-ṭhitā,||
Devalokañ ca te yanti kule vā idha jāyare.||
Anupubbena nibbāṇaṃ adhigacchanti paṇḍitā.|| ||
