Aṇguttara-Nikāya
III. Tika Nipāta
VIII. Ānanda Vagga
Sutta 74
Nigaṇṭha Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ āyasmā Ānanda Vesāliyaṃ viharati Mahāvane Kūtāgārasālāyaṃ|| ||
Atha kho Abhayo ca Licchavi Paṇḍitakumārako ca Licchavi yen'āyasmā Ānanda ten'upasaṇkamiṃsu.|| ||
Upasaṇkamitvā āyasmantaṃ Ānandaṃ abhivādetvā eka-m-antaṃ nisīdiṃsu.|| ||
Eka-m-antaṃ nisinno kho Abhayo Licchavi āyasmantaṃ Ānandaṃ etad avoca:|| ||
"Nigaṇṭho bhante Nāthaputto sabbaññū sabba-dassāvi aparisesāṃ ñāṇa-dassanaṃ paṭijānāti:|| ||
'Carato ca me tiṭṭhato ca suttassa ca jāgarassa ca satataṃ samitaṃ ñāṇa-dassanaṃ pacc'upatthikan' ti.|| ||
So purāṇānaṃ kammānaṃ tapasā vyantībhāvaṃ paññāpeti,||
navānaṃ kammānaṃ akaraṇā setu- [221] ghātaṃ.|| ||
Iti kamma-k-khayā dukkha-k-khayo,||
dukkha-k-khayā vedanā-k-khayo,||
vedanā-k-khayā sabbaṃ dukkhaṃ nijjiṇṇaṃ bhavissati.|| ||
Evam etissā sandiṭṭhi-kāya nijjarā visuddhiyā samati-k-kamo hoti.|| ||
Idha bhante Bhagava kim āhā" ti?|| ||
§
2. "Tisso kho imā Abhaya,||
nijjarā visuddhiyo tena Bhagavatā jānatā passatā arahatā Sammā Sambuddhena sammadakkhātā sattāṇaṃ visuddhiyā soka-pari-d-davānaṃ samatikkamāya dukkha-domanassānaṃ atthaṇgamāya ñāyassa adhigamāya nibbāṇassa sacchi-kiriyāya.|| ||
Katamā tisso?|| ||
Idha Abhaya, bhikkhū sīlavā hoti||
Pātimokkha-saṃvara-saṃvuto viharati||
ācāra-gocara-sampanno aṇumattesu vajjesu bhaya-dassāvī||
samādāya sikkhati sikkhā-padesu.|| ||
So navañ ca kammaṃ na karoti.|| ||
Purāṇañ ca kammaṃ phussa phussa vyantī-karoti.|| ||
Sandiṭṭhikā nijjarā akālikā ehi passikā opanayikā paccattaṃ veditabbā viñññūhī.|| ||
■
Sa kho so Abhaya, bhikkhū evaṃ sīla-sampanno vivicc'eva kāmehi vivicc'eva kāmehi vivicca akusalehi dhammehi sa-vitakkaṃ sa-vicāraṃ viveka-jaṃ pīti-sukhaṃ paṭhamaṃ-jhānaṃ upasampajja viharati.|| ||
Vitakka-vicārānaṃ vūpasamā ajjhattaṃ sampasādanaṃ cetaso ekodi-bhāvaṃ avitakkaṃ avicāraṃ samādhi-jaṃ pīti-sukhaṃ dutiyaṃ-jhānaṃ upasampajja viharati.|| ||
Pītiyā ca virāgā upekkhako ca viharati sato ca sampajāno sukhaṃ ca kāyena paṭisaṃvedeti,||
yaṃ taṃ ariyā ācikkhanti.|| ||
'Upekkhako satimā sukha-vihāri' ti|| ||
taṃ tatiyaṃ-jhānaṃ upasampajja viharati.|| ||
Sukhassa ca pahāṇā dukkhassa ca pahāṇā pubb'eva somanassa-domanassānaṃ atthaṇgamā adukkaṃ asukhaṃ upekkhā-sati-pārisuddhiṃ catutthaṃ-jhānaṃ upasampajja viharati.|| ||
So navañ ca kammaṃ na karoti.|| ||
Purāṇañ ca kammaṃ phussa phussa vyantī karoti.|| ||
Sandiṭṭhikā nijjarā akālikā ehapassikā opanayikā paccattaṃ veditabbā viññūhī.|| ||
■
So kho so Abhaya bhikkhū evaṃ sīla-sampanno evaṃ samādhi-sampanno āsavānaṃ khayā anāsavaṃ ceto-vimuttiṃ paññā-vimuttiṃ diṭṭhe'va dhamme sayaṃ abhiññā sacchi-katvā upasampajja viharati|| ||
So navañ ca kammaṃ na karoti.|| ||
Purāṇañ ca kammaṃ phussa phussa vyāntī karoti|| ||
Sandiṭṭhikā nijjarā akālikā ehi passikā opanayikā paccattaṃ veditabbā vuññūhīti.|| ||
Ime kho Abhaya, tisso nijjarā vusuddhiyo tena Bhagavatā jānatā passatā arahatā Sammā Sambuddhena sammadakkhātā sattāṇaṃ vusuddhiyā soka-pari-d-davānaṃ samatikkamāya dukkha-domanassānaṃ atthaṇgamāya ñāyassa adhigamāya nibbāṇassa sacchi-kiriyāyā" ti.|| ||
§
3. Evaṃ vutte Paṇḍitakumārako Licchavi Abhayaṃ Licchaviṃ etad avoca:|| ||
"Kiṃ pana tvaṃ samma Abhaya,||
āyasmato Ānandassa su-bhāsitaṃ su-bhāsitato nābbh'anumodasī" ti?|| ||
"Kyāhaṃ samma āyasmato Ānandassa su-bhāsitaṃ subhāsi- [222] tato nābbh'anumodissāmi.|| ||
Muddhā pi tassa vipateyya,||
yo āyasmato Ānandassa su-bhāsitaṃ su-bhāsitato nābbh'anumodeyyā" ti.|| ||
