Aṇguttara-Nikāya
III. Tika Nipāta
XI. Sambodhi Vagga
Sutta 102
Assāda Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Sāvatthiyaṃ viharati.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
"No ce taṃ bhikkhave loke assādo abhavissa,||
na-y-idaṃ sattā loke sārajjeya yuṃ.|| ||
Yasmā ca kho bhikkhave atthi loke assādo,||
tasmā sattā loke sārajjanati.|| ||
No ce taṃ bhikkhave loke ādīnavo abhavissa,||
na-y-idaṃ sattā loke nibbindeyyuṃ.|| ||
Yasmā ca kho bhikkhave atthi loke ādīnavo,||
tasmā sattā loke nibbindanti.|| ||
No ce taṃ bhikkhave loke nissaraṇaṃ abhavissa,||
na-y-idaṃ sattā loke nissareyyuṃ.|| ||
Yasmā ca kho bhikkhave atthi loke nissaraṇaṃ,||
tasmā sattā lokambhā nissaranti.|| ||
§
Yāva kīvañ cā bhikkhave sattā lokassa assādañ ca assādato ādīnavañ ca ādīnavato nissaraṇañ ca nissaraṇato yathā-bhūtaṃ na abbhaññāsuṃ,||
n'eva tāva bhikkhave sattā sa-devake lokā sa-Mārake sa-brahmake -||
sa-s-samaṇa-brāhmaṇiyā pajāya sadeva-manussāya nissaṭā visaṃyuttā vippamuttā vimariyādikatena cetasā vihariṃsu.|| ||
Yato ca kho bhikkhave sattā lokassa assādañ ca assādato ādīnavañ ca ādīnavato nissaraṇañ ca nissaraṇato yathā-bhūtaṃ abbhaññāsuṃ,||
atha bhikkhave sattā sa-devake lokā sa-Mārake sa-brahmake -||
sa-s-samaṇa-brāhmaṇiyā pajāya sadeva-manussāya nissaṭā visaṃyuttā vippamuttā vimariyādikatena cetasā viharantī ti.|| ||
§
Ye hi keci, bhikkhave,||
samaṇā vā brāhmaṇā vā lokassa assādañ ca assādato ādīnavañ ca ādanavato nissaraṇañ ca nissaraṇato yathā-bhūtaṃ na-p-pajānanti,||
na me te kho bhikkhave samaṇā vā brāhmaṇā vā samaṇesu vā samaṇa-sammatā,||
brāhmaṇesu vā brāhmaṇa-sammatā.|| ||
Na ca pana te āyasmanto sāmaññ'atthaṃ vā brahmaññ'atthaṃ vā diṭṭhe'va dhamme sayaṃ abhiññā sacchi-katvā upasampajja viharanti.|| ||
Ye ca kho keci bhikkhave samaṇā vā brāhmaṇā vā lokassa assādañ ca assādato ādīnavañ ca ādanavato nissaraṇañ ca nissaraṇato yathā-bhūtaṃ pajānanti,||
te kho bhikkhave samaṇā vā brāhmaṇā vā samaṇesu vā samaṇa-sammatā,||
brāhmaṇesu vā brāhmaṇa-sammatā.|| ||
Te ca pan'āyasmanto sāmaññ'atthañ ca vā brahmaññ'atthañ ca diṭṭhe'va dhamme sayaṃ abhiññā sacchi-katvā upasampajja viharantī" ti.|| ||
