Aṇguttara-Nikāya
III. Tika Nipāta
XIII. Kusināra Vagga
Sutta 124
Bharaṇḍu-Kālāma Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Kosalosu cārikaṃ caramāno yena Kapilavatthu tad avasari.|| ||
"Assosi kho Mahānāmo Sakko Bhagavā kira Kapilavatthuṃ anuppatto" ti.|| ||
Atha kho Mahānāmo Sakko yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā eka-m-antaṃ aṭṭhāsi.|| ||
Eka-m-antaṃ ṭhitaṃ kho Mahānāmaṃ Sakkaṃ Bhagavā etad avoca:|| ||
"Gaccha Mahānāma, Kapilavatthusmiṃ tathā-rūpaṃ āvasathaṃ jāna,||
yatth'ajja mayaṃ ekarattiṃ vihareyyāmā" ti.|| ||
[277] "Evaṃ bhante" ti kho Mahānāmo Sakko Bhagavato paṭi-s-sutvā Kapilavatthuṃ pavisitvā kevala-kappaṃ Kapilavatthuṃ anvābhiṇḍanto na addasa Kapilavatthusmiṃ tathā-rūpaṃ āvasathaṃ yattha Bhagavā ekarattiṃ vihareyya.|| ||
Atha ko Mahānāmo Sakko yena Bhagavā ten'upasaṇkami.|| ||
Upasaṇkamitvā Bhagavantaṃ etad avoca:|| ||
2. "N'atthi bhante Kapilavatthusmiṃ tathā-rūpo āvasato yatth'ajja Bhagavā ekarattiṃ vihareyya.|| ||
Ayaṃ bhante Bharaṇḍu Kālāmo Bhagavato purāṇa-sabrahma-cārī.|| ||
Tass'ajja Bhagavā assame ekarattiṃ viharatū" ti.|| ||
"Gaccha Mahānāma, sattharaṃ paññāpehī" ti.|| ||
"Evaṃ bhante" ti kho Mahānāmo Sakko Bhagavato paṭi-s-sutvā yena Bharaṇḍukassa Kālāmassa assamo ten'upasaṇkami.|| ||
Upasaṇkamitvā sattharaṃ paññā-petvā udakaṃ ṭhapetvā pādānaṃ dhovanāya yena Bhagavā ten'upasaṇkami.|| ||
Upasaṇkamitvā Bhagavantaṃ etad avoca:|| ||
"Santhato bhante santhāro,||
udakaṃ ṭhapitaṃ pādānaṃ dhovanāya.|| ||
Yassa dāni bhante Bhagavā kālaṃ maññatī" ti.|| ||
3. Atha kho Bhagavā yena Bharaṇḍukassa Kālāmassa assamo ten'upasaṇkami.|| ||
Upasan-kamitvā paññatte āsane nisīdi.|| ||
Nisajja kho Bhagavā pāde pakkhālesi.|| ||
Atha kho Mahānāmassa Sakkassa etad ahosi:|| ||
"Akālo kho ajja Bhagavantaṃ payirupāsituṃ,||
kilanto Bhagavā,||
sve dānāhaṃ Bhagavantaṃ payirupāsissāmī" ti.|| ||
Bhagavantaṃ abhivādetvā padakkhiṇaṃ katvā pakkāmi.|| ||
Atha kho Mahānāmo Sakko tassā rattiyā accayena yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinnaṃ kho Mahānāmaṃ Sakkaṃ Bhagavā etad avoca:|| ||
§
"Tayo kho'me Mahānāma sattāro santo savijjamānā lokasmiṃ.|| ||
Katame tayo?|| ||
Idha Mahānāma ekacco Satthā||
kāmānaṃ pariññaṃ paññāpeti,||
na rūpānaṃ pariññaṃ paññāpeti,||
na vedanānaṃ pariññaṃ paññāpeti.|| ||
Idha pana Mahānāma ekacco Satthā||
kāmānaṃ pariññaṃ paññāpeti,||
rūpānaṃ pariññaṃ paññāpeti,||
na vedanānaṃ [278] pariññaṃ paññāpeti.|| ||
Idha pana Mahānāma ekacco Satthā||
kāmānaṃ pariññaṃ paññāpeti,||
rūpānaṃ pariññaṃ paññāpeti,||
vedanānaṃ pariññaṃ paññāpeti.|| ||
Ime kho Mahānāma tayo Satthāro santo saṃvijj'amānā lokasmi.|| ||
■
Imesaṃ Mahānāma tiṇṇaṃ Satthārānaṃ ekā niṭṭhā,||
udāhu puthu niṭṭhā" ti?|| ||
5. Evaṃ vutto Bharaṇḍu Kālāmo Mahānāmaṃ Sakkaṃ etad avoca:|| ||
"'Ekā' ti Mahānāma vadehī" ti.|| ||
Evaṃ vutte Bhagavā Mahānāmaṃ Sakkaṃ etad avoca:|| ||
"'Nānā' ti Mahānāma vadehī" ti.|| ||
■
Dutiyam pi kho Bharaṇḍu Kālāmo Mahānāmaṃ Sakkaṃ etad avoca:|| ||
"'Ekā' ti Mahānāma vadehī" ti.|| ||
Dutiyam pi kho Bhagavā Mahānāmaṃ Sakkaṃ etad avoca:|| ||
"'Nānā' ti Mahānāma vadehī" ti.|| ||
■
Tatiyam pi kho Bharaṇḍu Kālāmo Mahānāmaṃ Sakkaṃ etad avoca:|| ||
"'Ekā' ti Mahānāma vadehī" ti.|| ||
Tatiyam pi kho Bhagavā Mahānāmaṃ Sakkaṃ etad avoca:|| ||
"'Nānā' ti Mahānāma vadehī" ti.|| ||
■
6. Atha kho Bharaṇḍussa Kālāmassa etad ahosi:|| ||
"Mahesakkhassa vat'amhi Mahānāmassa Sakkassa sammukhā samaṇena Gotamena yāva tatiyakaṃ apasādito.|| ||
Yan nūn-ā-haṃ Kapilavatthumhā pakkameyyan" ti.| ||
Atha kho Bharaṇḍu Kālemo Kapilavatthumhā pakkāmi,||
yaṃ Kapilavatthumhā pakkāmi,||
tathā pakkanto va ahosi na puna paccāgañchi.
