Aṇguttara-Nikāya
III. Tika Nipāta
XIII. Kusināra Vagga
Sutta 125
Hatthaka Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Sāvatthiyaṃ viharati.|| ||
Atha ko Hatthako deva-putto abhikkantā rattiyā abhikkanta-vaṇṇā kevala-kappaṃ Jetavanaṃ obhāsetvā yena Bhagavā ten'upasaṇkami.|| ||
Upasaṇkamitvā "Bhagavato purato ṭhassāmī" ti osīdati c'eva saṃsidati c'eva,||
na Sakkoti saṇṭhātuṃ.|| ||
Seyyathā pi nāma sappi vā telaṃ mā vālikāya āsittaṃ osīdati saṃsīdati na saṇṭhāti||
evam eva Hatthako deva-putto "Bhagavato purato ṭhassāmī" ti osīdati c'eva saṇasīdati c'eva,||
na Sakkoti saṇṭhātuṃ.|| ||
[279] 2. Atha ko Bhagavā Hatthakaṃ deva-puttaṃ etad avoca:|| ||
"Oḷārikaṃ Hatthaka, atta-bhavaṃ abhinimmināhī" ti.|| ||
"Evaṃ bhante" ti ko Hatthako deva-putto Bhagavato paṭi-s-sutvā oḷārikaṃ atta-bhāvaṃ abhinimminitvā Bhagavantaṃ abhivādetvā eka-m-antaṃ aṭṭhāsi.|| ||
Eka-m-antaṃ ṭhitaṃ kho Hatthakaṃ deva-puttaṃ Bhagavā etad avoca:|| ||
"Ye te Hatthakaṃ dhammā pubbe manussabhūtassa pavattino ahesuṃ,||
api nu te te dhammā etarahi pavattino" ti?|| ||
"Ye ca me bhante dhammā pubbe manussabhūtassa pavattino ahesuṃ,||
te ca me dhammā etarahi pavattino,||
ye ca me bhante dhammā pubbe manussabhūtassa nappavattino ahesuṃ,||
te ca me dhammā etarahi pavattino.|| ||
Seyyathā pi bhante Bhagavā etarahi ākiṇṇo viharati bhikkhūhi bhikkhūnīhi upāsakehi upāsikāhi rāññāhi rāja-mahā-mattehi titthiyehi titthiyasāvakehi,||
evam eva ko ahaṃ bhante ākiṇṇo viharāmi deva-puttehi.|| ||
Durato pi bhante deva-puttā āga-c-chanti Hatthakassa deva-puttassa santike dhammaṃ sossāmā ti.|| ||
§
Tiṇṇāhaṃ bhante dhammānaṃ atitto appaṭivāno kāla-kato.|| ||
Katamesaṃ tiṇṇaṃ?|| ||
Bhagavato ahaṃ bhante dassanāya atitto appaṭivāno kāla-kato,||
sad'Dhamma-savaṇassāhaṃ bhante atitto appaṭivāno kāla-kato,||
Saṇghassāṃ haṃ bhante upaṭṭhānassa atitto appaṭivāno kāla-kato.|| ||
Imesaṃ kho ahaṃ bhante tinṇaṃ dhammānaṃ atitto appaṭivāno kāla-kato" ti.|| ||
"Nāhaṃ Bhagavato dassanassa tittiṃ ajjhagā kudācanaṃ,||
Saṇghassa upaṭṭhānassa sad'Dhamma-savanassa ca.||
Adhisīle sikkhamāno sad'Dhamma-savaṇe rato||
Tinṇaṃ dhammānaṃ atitto Hatthako Avihaṃ gato" ti.
