Aṇguttara Nikāya
4. Catukka Nipāta
V. Rohitassa Vagga

Sutta 42

Pañha-Vyākaraṇa Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

 

[1][pts][than] Evaṃ me sutaṃ:|| ||

Ekaṃ samayaṃ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṃ.|| ||

Bhagavā etad avoca:|| ||

2. Cattār'imāni bhikkhave pañha-vyākaraṇāni.|| ||

Katamāni cattāri?|| ||

Atthi bhikkhave pañho ekaṃsa-vyākaraṇīyo,||
atthi bhikkhave pañho paṭipucchā-vyākaraṇīyo,||
atithi bhikkhave pañho ṭhapanīyo,||
atthi bhikkhave pañho vibhajja-vyākaraṇīyo.|| ||

Imāni kho bhikkhave cattāri pañha-vyākaraṇānīti.|| ||

 

Ekaṃsa-vacanaṃ ekaṃ vibhajja-vacanā paraṃ,||
Tatiyaṃ paṭipuccheyya catutthaṃ pana ṭhāpaye.|| ||

Yo ca n'esaṃ tattha tattha jānāti anu-Dhammataṃ,||
Catu pañhassa kusalo āhu bhikkhuṃ tathāvidhaṃ.|| ||

Durāsado duppasaho gambhīro duppadhaṃsiyo||
Atho atthe anatthe ca ubhayassa hoti kovido.|| ||

Anatthaṃ parivajjeti atthaṃ gaṇhāti paṇḍito,||
Atthābhisamayā dhīro paṇḍito ti pavuccatī ti.|| ||