Aṇguttara Nikāya
Catukka Nipāta
VIII: Apaṇṇaka Vagga
Sutta 76
Kusinārā Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Kusinārāyaṃ viharati Upavattane Mallānaṃ sālavane,||
antarena yamaka-sālānaṃ parinibbāṇa-samaye.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti||
te bhikkhū Bhagavato paccassosuṃ.|| ||
Bhagavā etad avoca:|| ||
2. "Siyā kho pana bhikkhave ekabhikkhussa pi kaṇkhā vā vimati vā Buddhe vā Dhamme vā Saṇghe vā Magge vā Paṭipadāya vā,||
pucchatha bhikkhave, mā pacchā vippaṭi-sārino ahuvattha:|| ||
'Sammukhībhūto no Satthā ahosi,||
nāsakkhimha Bhagavantaṃ sammukhā paṭipucchitun ti.'|| ||
Evaṃ vutte te bhikkhū tuṇhī ahesuṃ.|| ||
3. Dutiyam pi kho Bhagavā bhikkhū āmantesi:|| ||
"Siyā kho pana bhikkhave ekabhikkhussa pi kaṇkhā vā vimati vā Buddhe vā Dhamme vā Saṇghe vā Magge vā Paṭipadāya vā,||
pucchatha bhikkhave, mā pacchā vippaṭi-sārino ahuvattha:|| ||
'Sammukhībhūto no Satthā ahosi,||
nāsakkhimha Bhagavantaṃ sammukhā paṭipucchitun ti.'|| ||
Dutiyam pi kho te bhikkhū tuṇhī ahesuṃ.|| ||
4. Tatiyam pi kho Bhagavā bhikkhū āmantesi:|| ||
"Siyā kho pana bhikkhave ekabhikkhussa pi kaṇkhā vā vimati vā Buddhe vā Dhamme vā Saṇghe vā Magge vā Paṭipadāya vā,||
pucchatha bhikkhave, mā pacchā vippaṭi-sārino ahuvattha:|| ||
'Sammukhībhūto no Satthā ahosi,||
nāsakkhimha Bhagavantaṃ sammukhā paṭipucchitun ti.'|| ||
Tatiyam pi kho te bhikkhū tuṇhī ahesuṃ.|| ||
5. Atha kho Bhagavā bhikkhū āmantesi:|| ||
"Siyā kho pana bhikkhave
Satthu gāravenā pi na puccheyyātha,||
sahāyako pi bhikkhave sahāyakassa arocetu" ti.|| ||
Evaṃ vutte te bhikkhū tuṇhi ahesuṃ.|| ||
6. [80] Atha kho āyasmā Ānando Bhagavantaṃ etad avoca:|| ||
"Acchariyaṃ bhante,||
abbhūtaṃ bhante.|| ||
Evaṃ pasanno ahaṃ bhante imasmiṃ bhikkhu-saṇghe||
n'atthi imasmiṃ bhikkhu-saṇghe ekabhikkhussa pi kaṇkhā vā vimati vā Buddhe vā Dhamme vā Saṇghe vā Magge vā Paṭipadāya vā" ti.|| ||
7. "Pasādā kho tvaṃ Ānanda vadesi.|| ||
Ñāṇam eva h'ettha Ānanda Tathāgatassa,||
n'atthi imasmiṃ bhikkhu-saṇghe ekabhikkhussa pi kaṇkhā vā vimati vā Buddhe vā Fhamme vā Saṇghe vā Magge vā Paṭipadāya vā.|| ||
Imesaṃ Ānanda pañcannaṃ bhikkhu-satānaṃ yo pacchimako bhikkhu,||
so Sotāpanno avinipāta-dhammo niyato sambodhi-parāyano" ti.|| ||
