Aṇguttara Nikāya
Catukka Nipāta
XXV: Āppatti-bhaya Vagga
Sutta 242
Āpatti-Bhaya Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
"Cattār'imāni bhikkhave āpatti-bhayāni.|| ||
Katamāni cattāri?|| ||
Seyyathā pi, bhikkhave, coraṃ āgucāriṃ gahetvā rañño dasseyyuṃ:|| ||
"Ayaṃ te deva coro āgucārī,||
imassa devo daṇḍaṃ paṇetū" ti.|| ||
Tam enaṃ rājā evaṃ vadeyya:|| ||
[241] Gacchatha bho imaṃ purisaṃ daḷhāya rajjuyā pacchā bāhaṃ gāḷha bandhanaṃ bandhitvā khura-muṇḍaṃ karitvā kharassarena paṇavena rathiyāya rathiyaṃ siṇghāṭakena siṇghāṭakaṃ parinetvā dakkhiṇena dvārena nikkhāmetvā dakkhiṇato nagarassa sīsaṃ chindathā ti.|| ||
Tam enaṃ rañño purisā daḷhāya rajjuyā pacchā bāhaṃ gāḷha bandhanaṃ bandhitvā khura-muṇḍaṃ karitvā kharassarena paṇavena rathiyāya rathiyaṃ siṇghāṭakena siṇghāṭakaṃ parinetvā dakkhiṇena dvārena nikkhāmetvā dakkhiṇato nagarassa sīsaṃ chindeyyuṃ.|| ||
Tatr'aññatarassa thalaṭṭhassa purisassa evam assa:|| ||
"Pāpakaṃ vata bho ayaṃ puriso kammaṃ akāsi gārayhaṃ sīsacchejjaṃ,||
yatra hi nāma rañño purisā daḷhāya rajjuyā pacchā bāhaṃ gāḷha bandhanaṃ bandhitvā khura-muṇḍaṃ karitvā kharassarena paṇavena rathiyāya rathiyaṃ siṇghāṭakena siṇghāṭakaṃ parinetvā dakkhiṇena dvārena nikkhāmetvā dakkhiṇato nāgarassa sīsaṃ chindissan" ti.|| ||
So vat'assāhaṃ eva-rūpaṃ pāpaṃ kammaṃ na kareyyaṃ gārayhaṃ sīsacchejjan ti.|| ||
Evam eva kho bhikkhave yassa kassaci bhikkhussa vā bhikkhuniyā vā evaṃ tibbā bhaya-saññā pacc'upaṭṭhitā hoti pārājikesu dhammesu,||
tass'etaṃ pāṭikaṇkhaṃ:|| ||
Anāpanno vā pārājikaṃ dhammaṃ na āpajjissati||
āpanno vā pārājikaṃ dhammaṃ yathā-dhammaṃ paṭikarissati.|| ||
■
Seyyathā pi, bhikkhave, puriso kāḷakaṃ vatthaṃ paridhāya kese pakiritvā mūsalaṃ khandhe āropetvā mahā-jana-kāyaṃ upasaṇkamitvā evaṃ vadeyya:|| ||
"Ahaṃ bhante pāpaṃ kammaṃ akāsiṃ gārayhaṃ mosallaṃ.|| ||
Yena me āyasmanto atta-manā honti taṃ karomī" ti.|| ||
Tatr'aññatarassa thalaṭṭhassa purisassa evam assa:|| ||
"Pāpakaṃ vata bho ayaṃ puriso kammaṃ akāsi gārayhaṃ mosallaṃ,||
yatra hi nāma kāḷakaṃ vatthaṃ paridhāya kese pakiritvā mūsalaṃ khandhe āropetvā mahā-jana-kāyaṃ upasaṇkamitvā evaṃ vakkhati:|| ||
'Ahaṃ bhante pāpaṃ kammaṃ akāsiṃ gārayhaṃ mosallaṃ.|| ||
Yena me āyasmanto atta-manā honti, taṃ karomī" ti.|| ||
[242] So vat'assāhaṃ eva-rūpaṃ pāpaṃ kammaṃ na kareyyaṃ gārayhaṃ mosallan" ti.|| ||
Evam eva kho bhikkhave yassa kassaci bhikkhussa vā bhikkhuniyā vā evaṃ tibbā bhaya-saññā pacc'upaṭṭhitā hoti saṇghā-disesesu dhammesu,||
tass'etaṃ pāṭikaṇkhaṃ:|| ||
Anāpanno vā saṇghā-disesaṃ dhammaṃ na āpajjissati||
āpanno vā saṇghā-disesaṃ dhammaṃ yathā-dhammaṃ paṭikarissati.|| ||
■
Seyyathā pi, bhikkhave, puriso kāḷakaṃ vatthaṃ paridhāya kese pakiritvā assapuṭaṃ khandhe āropetvā mahā-jana-kāyaṃ upasaṇkamitvā evaṃ vadeyya:|| ||
"Ahaṃ bhante pāpaṃ kammaṃ akāsiṃ gārayhaṃ assapuṭaṃ.|| ||
Yena me āyasmanto atta-manā honti, taṃ karomī" ti.|| ||
Tatr'aññatarassa thalaṭṭhassa purisassa evam assa:|| ||
"Pāpakaṃ vata bho ayaṃ puriso kāmmaṃ akāsi gārayhaṃ assapuṭaṃ,||
yatra hi nāma kāḷakaṃ vatthaṃ paridhāya kese pakiritvā assapuṭaṃ khandhe āropetvā mahā-jana-kāyaṃ upasaṇkamitvā evaṃ vakkhati:|| ||
'Ahaṃ bhante pāpaṃ kammaṃ akāsiṃ gārayhaṃ assapuṭaṃ.|| ||
Yena me āyasmanto atta-manā honti, taṃ karomī' ti.|| ||
So vat'assāhaṃ eva-rūpaṃ pāpaṃ kammaṃ na kareyyaṃ gārayhaṃ assapuṭan" ti.|| ||
Evam eva kho bhikkhave yassa kassaci bhikkhussa vā bhikkhuniyā vā evaṃ tibbā bhaya-saññā pacc'upaṭṭhitā hoti pācittiyesu dhammesu,||
tass'etaṃ pāṭikaṇkhaṃ:|| ||
Anāpanno vā pācittiyaṃ dhammaṃ na āpajjissati||
āpanno vā pācittiyaṃ dhammaṃ yathā dhammaṃ paṭikarissati.|| ||
■
Seyyathā pi, bhikkhave, puriso kāḷakaṃ vatthaṃ paridhāya kese pakiritvā mahā-jana-kāyaṃ upasaṇkamitvā evaṃ vadeyya:|| ||
"Ahaṃ bhante pāpaṃ kammaṃ akāsiṃ gārayhaṃ upavajjaṃ.|| ||
Yena me āyasmanto atta-manā honti, taṃ karomī" ti.|| ||
Tatr'aññatarassa thalaṭṭhassa purisassa evam assa:|| ||
"Pāpakaṃ vata bho ayaṃ puriso kammaṃ akāsi gārayhaṃ upavajjaṃ,||
yatra hi nāma kāḷakaṃ vatthaṃ paridhāya kese pakiritvā mahā-jana-kāyaṃ upasaṇkamitvā [243] evaṃ vakkhati:|| ||
'Ahaṃ bhante pāpaṃ kammaṃ akāsiṃ gārayhaṃ upavajjaṃ.|| ||
Yena me āyasmanto atta-manā honti, taṃ karomī' ti.|| ||
So vat'assāhaṃ eva-rūpaṃ pāpaṃ kammaṃ na kareyyaṃ gārayhaṃ upavajjan" ti.|| ||
Evam eva kho bhikkhave yassa kassaci bhikkhussa vā bhikkhuniyā vā evaṃ tibbā bhaya-saññā pacc'upaṭṭhitā hoti pāṭidesanīyesu dhammesu,||
tass'etaṃ pāṭikaṇkhaṃ:|| ||
Anāpanno vā pāṭidesanīyaṃ dhammaṃ na āpajjissati||
āpanno vā pāṭidesanīyaṃ dhammaṃ yathā dhammaṃ paṭikarissati.|| ||
Imāni kho bhikkhave cattāri āpattibhayānī" ti.|| ||
