Aṇguttara Nikāya
Pañcaka Nipāta
I: Sekha-Bala Vagga
Sutta 10
Dutiya Agārava Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Pañcahi bhikkhave dhammehi samannāgato bhikkhu agāravo appatisso abhabbo imasmiṃ dhamma-vinaye vuḍḍhiṃ virūḷhiṃ vepullaṃ āpajjituṃ.|| ||
Katamehi pañcehi?
Assaddho bhikkhave bhikkhu agāravo appatisso abhabbo imasmiṃ dhamma-vinaye vuḍḍhiṃ virūḷhiṃ vepullaṃ āpajjituṃ.|| ||
Ahiriko bhikkhave bhikkhu agāravo appatisso abhabbo imasmiṃ dhamma-vinaye vuḍḍhiṃ virūḷhiṃ vepullaṃ āpajjituṃ.|| ||
Anottapī bhikkhave bhikkhu agāravo appatisso abhabbo imasmiṃ dhamma-vinaye vuḍḍhiṃ virūḷhiṃ vepullaṃ āpajjituṃ.|| ||
Kusīto bhikkhave agāravo appatisso abhabbo imasmiṃ dhamma-vinaye vuḍḍhiṃ virūḷhiṃ vepullaṃ āpajjituṃ.|| ||
Duppañño bhikkhave bhikkhu agāravo appatisso abhabbo imasmiṃ dhamma-vinaye vuḍḍhiṃ virūḷhiṃ vepullaṃ āpajjituṃ.
Imehi kho bhikkhave pañcahi dhammehi samannāgato bhikkhu agāravo appatisso abhabbo imasmiṃ dhamma-vinaye vuḍḍhiṃ virūḷhiṃ vepullaṃ āpajjituṃ.
§
Pañcahi bhikkhave dhammehi samannāgato bhikkhu sagāravo sappatisso bhabbo imasmiṃ Dhamma-Vinaye vuḍḍhiṃ virūḷhiṃ vepullaṃ āpajjituṃ.|| ||
Katamehi pañcahi?
Saddho bhikkhave bhikkhu sagāravo sappatisso bhabbo imasmiṃ Dhamma-Vinaye vuḍḍhiṃ virūḷhiṃ vepullaṃ āpajjituṃ.|| ||
Hirimā bhikkhave bhikkhu sagāravo sappatisso bhabbo imasmiṃ Dhamma-Vinaye vuḍḍhiṃ virūḷhiṃ vepullaṃ āpajjituṃ.|| ||
Ottapī bhikkhave bhikkhu sagāravo sappatisso bhabbo imasmiṃ Dhamma-Vinaye vuḍḍhiṃ virūḷhiṃ vepullaṃ āpajjituṃ.|| ||
Āraddha-viriyo bhikkhave bhikkhu sagāravo sappatisso bhabbo imasmiṃ Dhamma-Vinaye vuḍḍhiṃ virūḷhiṃ vepullaṃ āpajjituṃ.|| ||
Paññavā bhikkhave bhikkhu sagāravo sappatisso bhabbo imasmiṃ Dhamma-Vinaye vuḍḍhiṃ virūḷhiṃ vepullaṃ āpajjituṃ.
Imehi kho bhikkhave pañcahi dhammehi samannāgato bhikkhu sagāravo sappatisso bhabbo imasmiṃ Dhamma-Vinaye vuḍḍhiṃ virūḷhiṃ vepullaṃ āpajjitun ti.
Sekha-bala Vagga Paṭhama
