Aṇguttara Nikāya
Pañcaka Nipāta
8. Yodhājīva Vagga
Sutta 78
Dutiya Anāgata-Bhaya Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][than][pts] Sāvatthi nidānaṃ|| ||
Pañc'imāni bhikkhave anāgata-bhayāni sampassamānena alam eva bhikkhunā|| ||
Appamattena ātāpinā pahit'attena viharituṃ appattassa pattiyā anadhigatassa adhigamāya asacchi-katassa sacchi-kiriyāya.|| ||
Katamāni pañca?|| ||
Idha, bhikkhave, bhikkhu iti paṭisañcikkhati:|| ||
"Ahaṃ kho etarahi daharo yuvā susu kā'akeso bhadrena yobbanena samannāgato paṭhamena vayasā hoti kho pana so samayo yaṃ imaṃ kāyaṃ jarā phusati.|| ||
Jiṇṇena kho pana jarāya abhibhūtena na sukaraṃ Buddhānaṃ sāsanaṃ mana-sikātuṃ.|| ||
Na sukarāni araññe vana-pa-t-thāni pantāni sen'āsanāni paṭisevituṃ purā maṃ so dhammo āgacchati aniṭṭho akanto amanāpo.|| ||
Handāhaṃ paṭigacce va viriyaṃ ārabhāmi appattassa pattiyā anadhigatassa adhigamāya asacchi-katassa sacchi-kiriyāya yenāhaṃ dhammena samannāgato jiṇṇako pi phāsuṃ viharissāmī" ti.|| ||
Idaṃ, bhikkhave, paṭhamaṃ anāgata-bhayaṃ sampassamānena alam eva bhikkhunā appamattena ātāpinā pahit'attena viharituṃ appattassa pattiyā anadhigatassa adhigamāya asacchi-katassa sacchi-kiriyāya.|| ||
■
Puna ca paraṃ bhikkhave bhikkhu iti paṭisañcikkhati:|| ||
'Ahaṃ kho etarahi appābādho appātaṇko samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya.|| ||
Hoti kho pana so samayo yaṃ imaṃ kāyaṃ vyādhi phusati.|| ||
Khyādhitena kho pana byādhābhibhūtena na sukaraṃ Buddhānaṃ sāsanaṃ mana-sikātuṃ.|| ||
Na sukarāni araññe vana-pa-t-thāni pantāni sen'āsanāni paṭisevituṃ purā maṃ so dhammo āgacchati aniṭṭho akanto amanāpo,||
handāhaṃ paṭigacce va viriyaṃ ārabhāmi appattassa pattiyā anadhigatassa adhigamāya asacchi-katassa sacchi-kiriyāya- [104] yenāhaṃ dhammena samannāgato byādhitopi phāsuṃ viharissāmī' ti.|| ||
Idaṃ, bhikkhave, dutiyaṃ anāgata-bhayaṃ sampassamānena alam eva bhikkhunā appamattena ātāpinā pahit'attena viharituṃ appattassa pattiyā anadhigatassa adhigamāya asacchi-katassa sacchi-kiriyāya.|| ||
■
Puna ca paraṃ bhikkhave bhikkhu iti paṭisañcikkhati:||
'etarahi kho subhikkhaṃ susassaṃ sulabhapiṇḍaṃ,||
sukaraṃ uñchena paggahena yāpetuṃ.|| ||
Hoti kho pana so samayo yaṃ dubbhikkhaṃ hoti dussassaṃ dullabhapiṇḍaṃ,||
na sukaraṃ uñchena paggahena yāpetuṃ.|| ||
Dubbhikkhena kho pana manussā yena subhikkhaṃ tena saṇkamanti tattha saṇgaṇ'ikavihāro hoti ākiṇṇavihāro.|| ||
Saṇgaṇikavihāre kho pana sati ākiṇṇavihāre na sukaraṃ Buddhānaṃ sāsanaṃ mana-sikātuṃ.|| ||
Na sukarāni araññe vana-pa-t-thāni pantāni sen'āsanāni paṭisevituṃ.|| ||
Purā maṃ so dhammo āgacchati aniṭṭho akanto amanāpo handāhaṃ paṭigacc'eva viriyaṃ ārabhāmi appattassa pattiyā anadhigatassa adhigamāya asacchi-katassa sacchi-kiriyāya-yenāhaṃ dhammena samannāgato dubbhikkhe'pi phāsuṃ viharissāmī' ti|| ||
Idaṃ, bhikkhave, tatiyaṃ anāgata-bhayaṃ sampassamānena alam eva bhikkhunāappamattena ātāpinā pahit'attena viharituṃ appattassa pattiyā anadhigatassa adhigamāya asacchi-katassa sacchi-kiriyāya.|| ||
■
Puna ca paraṃ bhikkhave iti paṭisañcikkhati:||
etarahi kho manussā samaggā sammodamānā avivadamānā khīrodakībhutā añña-maññaṃ piyacakkhūhi sampassantā viharanti.|| ||
Hoti kho pana so samayo yaṃ bhayaṃ hoti aṭavisaṃkopo.|| ||
Cakkasamārū'hā jāna-padā pariyāyanti.|| ||
Bhaye kho pana sati manussā yena khemaṃ tena saṇkamanti.|| ||
Tattha saṇgaṇ'ikavihāro hoti ākiṇṇavihāro [105] saḍgaṇikavihāre kho pana sati ākiṇṇa vihāre na sukaraṃ Buddhānaṃ sāsanaṃ mana-sikātuṃ.|| ||
Na sukarāni araññe vana-pa-t-thāni pantāni sen'āsanāni paṭisevituṃ.|| ||
■
Purā maṃ so dhammo āgacchati aniṭṭho akanto amanāpo,||
handā'haṃ paṭigacc'eva viriyaṃ ārabhāmi||
appattassa pattiyā,||
anadhigatassa ādhigamāya,||
asacchi-katassa sacchi-kiriyāya - yenāhaṃ dhammena samannāgato bhaye'pi phāsuṃ viharissāmī' ti.|| ||
Idaṃ, bhikkhave, catutthaṃ anāgata-bhayaṃ sampassamānena alam eva bhikkhunā appamattena ātāpinā pahit'attena viharituṃ||
appattassa pattiyā||
'anadhigatassa adhigamāya asacchi-katassa sacchi-kiriyāya.|| ||
■
Puna ca paraṃ bhikkhave bhikkhu iti paṭisañcikkhati:||
"etarahi kho saṇgho samaggo sammodamāno avivadamāno ekuddeso phāsuṃ viharati.|| ||
Hoti kho pana so samayo yaṃ saṇgho bhijjati.|| ||
Saṇghe kho pana bhinne na sukaraṃ Buddhānaṃ sāsanaṃ mana-sikātuṃ.|| ||
Na sukarāni araññe vana-pa-t-thāni pantāni sen'āsanāni paṭisevituṃ.|| ||
Purā maṃ so dhammo āgacchati aniṭṭho akanto amanāpo,||
handā'haṃ paṭigacc'eva viriyaṃ ārabhāmi appattassa pattiyā anadhigatassa adhigamāya asacchi-katassa sacchi-kiriyāya,||
yenāhaṃ dhammena samannāgato bhinne'pi saṇghe phāsuṃ viharissāmī" ti|| ||
Idaṃ, bhikkhave, pañcamaṃ anāgata-bhayaṃ sampassamānena alam eva bhikkhunā appamattena ātāpinā pahit'attena viharituṃ appatassa pattiyā anadhigatassa adhigamāya asacchi-katassa sacchi-kiriyāya.|| ||
Imāni kho bhikkhave pañca anāgata-bhayāni sampassamānena alam eva bhikkhunā appamattena ātāpinā pahit'attena viharituṃ appattassa pattiyā anadhigatassa adhigamāya asacchi-katassa sacchi-kiriyāyā' ti.|| ||
