Aṇguttara Nikāya
Pañcaka Nipāta
10. Kakudha Vagga
Sutta 100
Kakudha Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Kosambīyaṃ viharati Ghositārāme.|| ||
Tena kho pana samayena Kakudho nāma Koliyaputto āyasmato Mahā Moggallānassa upaṭṭhāko adhunā kāla-kato aññataraṃ mano-mayaṃ kāyaṃ upapanno||
tassa eva-rūpo atta-bhāva-paṭilābho hoti,||
seyyathā pi nāma dve vā tiṇi vā Māgadhakāni gāmakkhettāni.|| ||
So tena atta-bhāva-paṭilābhena n'eva attāṇaṃ no paraṃ vyābādheti.|| ||
Atha kho Kakudho deva-putto yen'āyasmā Mahā Moggallāno ten'upasaṇkami.|| ||
Upasaṇkamitvā āyasmantaṃ Mahā Moggallānaṃ abhivādetvā eka-m-antaṃ aṭṭhāsi.|| ||
Eka-m-antaṃ [123] ṭhito kho Kakudho deva-putto āyasmantaṃ Mahā Moggallānaṃ etad avoca:|| ||
"Devadattassa bhante eva-rūpaṃ icchāgataṃ uppajji:|| ||
'Ahaṃ bhikkhu-saṇghaṃ pariharissāmi' ti.|| ||
Saha cittuppādā ca bhante Devadatto tassā iddhiyā parihīno' ti.|| ||
Idam avoca Kakudho deva-putto,||
idaṃ vatvā āyasmantaṃ Mahā Moggallānaṃ abhivādetvā padakkhiṇaṃ katvā tatth'ev'antara-dhāyi.|| ||
Atha kho āyasmā Mahā Moggallāno yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā eka-m-antaṃ nisidi.|| ||
Eka-m-antaṃ nisinno kho āyasmā Mahā Moggallāno Bhagavantaṃ etad avoca:|| ||
"Kakudho nāma bhante,||
Koliyaputto mam upaṭṭhāko adhunā kāla-kato aññataraṃ mano-mayaṃ kāyaṃ upapanno,||
tassa eva-rūpo atta-bhāva-paṭilābho,||
seyyathā pi nāma dve vā tiṇi vā Māgadhakāni gāmakkhettāni.|| ||
So tena atta-bhāva-paṭilābhena n'ev attāṇaṃ no paraṃ vyābādheti.|| ||
Atha kho bhante Kakudho deva-putto yenāhaṃ ten'upasaṇkami.|| ||
Upasaṇkamitvā maṃ abhivādetvā eka-m-antaṃ aṭṭhāsi.|| ||
Eka-m-antaṃ ṭhito kho bhante Kakudho deva-putto maṃ etad avoca:|| ||
'Devadattassa bhante, eva-rūpaṃ icchāgataṃ uppajji:
"Ahaṃ bhikkhu-saṇghaṃ pariharissāmi" ti|| ||
Saha cittuppādā ca bhante Devadatto tassā iddhiyā parihīno" ti.'|| ||
Idam avoca bhante, Kakudho deva-putto.
Idaṃ vatvā maṃ abhivādetvā padakkhiṇaṃ katvā tatth'ev'antara-dhāyi" ti.|| ||
"Kiṃ pana te Moggallāna,||
Kakudho deva-putto cetasā ceto paricca vidito||
'Yaṃ kiñaci Kakudho deva-putto bhāsati,||
sabbaṃ taṃ tath'eva hoti no aññathā'" ti?|| ||
"Cetasā ceto paricca vidito me bhante Kakudho deva-putto||
'Yaṃ kiñaci Kakudho deva-putto bhāsati,||
sabbaṃ taṃ tath'eva hoti no aññathā'" ti.|| ||
Rakkhass'etaṃ Moggallāna vācaṃ.|| ||
Rakkhass'etaṃ Moggallāna vācaṃ.|| ||
Idāni so mogha-puriso attanā va attāṇaṃ pātu-karissatiti.|| ||
Pañc'ime Moggallāna Satthāro santo saṃvijj'amānā lokasmiṃ.|| ||
Katame pañca?|| ||
[124] Idha Moggallāna, ekacco sattā a-parisuddhasīlo samāno||
'parisuddhasīlo'mbhi' ti paṭijānāti,||
'parisuddhaṃ me sīlaṃ||
pariyodātaṃ asaṃkiliṭṭhan' ti.|| ||
Tam enaṃ sāvakā evaṃ jānanti:|| ||
'Ayaṃ kho bhavaṃ Satthā a-parisuddhasīlo samāno||
"parisuddhasīlo'mhī" ti paṭijānāti,||
"parisuddhaṃ me sīlaṃ||
pariyodātaṃ asaṃkiliṭṭhan" ti.|| ||
Mayaṃ c'eva kho pana gihīnaṃ āroceyyāma,||
nāssassa manāpaṃ.|| ||
Yaṃ kho pan'assa amanāpaṃ,||
kathannu mayaṃ tena samudācareyyāma?|| ||
Sammannati kho pana cīvara-piṇḍa-pāta-sen'āsana-gilāna-ppaccaya-bhesajja-parikkhārena.|| ||
Yaṃ tumo karissati,||
tumo'va tena paññāyissatī' ti.|| ||
Eva-rūpaṃ kho Moggallāna,||
Satthāraṃ sāvakā silato rakkhananti.|| ||
Eva-rūpo ca pana Satthā sāvakehi sīlato rakkhaṃ paccāsiṃsati.
■
Puna ca paraṃ Moggallāna,||
idh'ekacco Satthā a-parisuddhājivo samāno||
'parisuddhājivo'mhi' ti paṭijānāti,||
'parisuddho me ajivo||
pariyodāto asaṃkiliṭṭho' ti.|| ||
Tam enaṃ sāvakā evaṃ jānatti:|| ||
'Ayaṃ kho bhavaṃ Satthā a-parisuddhājivo samāno||
"parisuddhājivo'mh" iti paṭijānāti,||
"parisuddho me ājivo||
pariyodāto asaṃkiliṭṭho" ti.|| ||
Mayaṃ c'eva kho pana gihīnaṃ āroceyyāma,||
nāssassa manāpaṃ.|| ||
Yaṃ kho pan'assa amanāpaṃ,||
kathannu mayaṃ tena samudācareyyāma?|| ||
Sammannati kho pana cīvara-piṇḍa-pāta-sen'āsana-gilāna-ppaccaya-bhesajja-parikkhārena.|| ||
Yaṃ tumo karissati,||
tumo'va tena paññāyissati" ti.|| ||
Eva-rūpaṃ kho Moggallāna||
Satthāraṃ sāvakā ājivato rakkhanti.|| ||
Eva-rūpo ca pana Satthā sāvakehi ājivato rakkhaṃ paccāsiṃsati.
■
Puna ca paraṃ Moggallāna,||
idh'ekacco Satthā a-parisuddha-Dhamma-desano samāno||
'parisuddhadhamma-desano'mhi' ti paṭijānāti,||
'parisuddho me Dhamma-desanā||
pariyodātā asaṃkiliṭṭhā' ti.|| ||
Tam enaṃ sāvakā evaṃ jānanti:|| ||
'Ayaṃ kho bhavaṃ Satthā a-parisuddha-Dhamma-desano samāno||
[125] "parisuddha-Dhamma-desanomhi" ti paṭijānāti,||
"parisuddhā me Dhamma-desanā||
pariyodātā asaṃkiliṭṭhā" ti.|| ||
Mayaṃ c'eva kho pana gihīnaṃ āroceyyāma,||
nāssassa manāpaṃ.|| ||
Yaṃ kho panassa amanāpaṃ,||
kathannu mayaṃ tena samudācareyyāma?|| ||
Sammannati kho pana cīvara-piṇḍa-pāta-sen'āsana-gilāna-ppaccaya-bhesajja-parikkhārena.|| ||
Yaṃ tumo karissati,||
tumo'va tena paññāyissati" ti.|| ||
Eva-rūpaṃ kho Moggallāna||
Satthāraṃ sāvakā Dhamma-desanato rakkhanti.|| ||
Eva-rūpo ca pana Satthā sāvakehi Dhamma-desanato rakkhaṃ paccāsiṃsati.
■
Puna ca paraṃ Moggallāna,||
idh'ekacco Satthā a-parisuddha-veyyākaraṇo samāno||
'parisuddhaveyyākaraṇo'mhi' ti paṭijānāti,||
'parisuddhaṃ me veyyākaraṇaṃ||
paridotaṃ asaṃkiliṭṭhan' ti.|| ||
Tam enaṃ sāvakā evaṃ jānanti:|| ||
"Ayaṃ kho bhavaṃ Satthā a-parisuddha-veyyākaraṇo samāno||
"parisuddhaveyyākaraṇo'mhi" ti paṭijānāti,||
"parisuddhaṃ me veyyākaraṇaṃ||
pariyodātaṃ asaṃkiliṭṭhan" ti.|| ||
Mayaṃ c'eva kho pana gihīnaṃ āroceyyāma,||
nāssassa manāpaṃ.|| ||
Yaṃ kho panassa amanāpaṃ||
kathannu mayaṃ tena samudācareyyāma.|| ||
Sammannati kho pana cīvara-piṇḍa-pāta-sen'āsana-gilāna-ppaccaya-bhesajja-parikkhārena.|| ||
Yaṃ tumo karissati,||
tumo'va tena paññāyissati" ti.|| ||
Eva-rūpaṃ kho Moggallāna||
Satthāraṃ sāvakā veyyākaraṇato rakkhanti.|| ||
Eva-rūpo ca pana Satthā sāvakehi veyyākaraṇato rakkhaṃ paccāsiṃsati.
■
Puna ca paraṃ Moggallāna,||
idh'ekacco Satthā a-parisuddhañāṇa-dassano samāno||
'parisuddhañāṇa-dassan'omhi' ti paṭijānāti,||
'parisuddhaṃ me ñāṇa-dassanaṃ||
pariyodātaṃ asaṃkiliṭṭhan' ti.|| ||
Tam enaṃ sāvakā evaṃ jānanti:|| ||
"Ayaṃ kho bhavaṃ Satthā a-parisuddhañāṇa-dassano samāno||
"parisuddhañaṇadassano'mhi" ti paṭijānāti,||
"parisuddhaṃ me ñāṇa-dassanaṃ||
pariyodātaṃ asaṃkiliṭṭhan" ti.|| ||
Mayaṃ c'eva kho pana gihīnaṃ āroceyyāma,||
nāssassa manāpaṃ.|| ||
Yaṃ kho panassa amanāpaṃ,||
kathannu taṃ mayaṃ tena samudācareyyāma.|| ||
[126] Sammannati kho pana cīvara-piṇḍa-pāta-sen'āsana-gilāna-ppaccaya-bhesajja-parikkhārena.|| ||
Yaṃ tumo karissati,||
tumo'va tena paññāyissati" ti.|| ||
Eva-rūpaṃ kho Moggallāna,||
Satthāraṃ sāvakā ñāṇa-dassanato rakkhanti.|| ||
Eva-rūpo ca pana Satthā sāvakehi ñāṇa-dassanato rakkhaṃ paccāsiṃsati.|| ||
Ime kho Moggallāna,||
pañca Satthāro santo saṃvijj'amānā lokasmiṃ.
Ahaṃ kho pana Moggallāna,||
parisuddhasīlo samāno||
'parisuddhasīlo'mhi' ti paṭijānāmi,||
'parisuddhaṃ me sīlaṃ||
pariyodātaṃ asaṃkiliṭṭhan' ti.|| ||
Na ca maṃ sāvakā sīlato rakkhanti.|| ||
Na c'āhaṃ sāvakehi sīlato rakkhaṃ paccāsiṃsāmi.|| ||
■
Parisuddhājivo samāno||
'parisuddhājivo'mhi' ti paṭijānāmi,||
'parisuddho me ājivo||
pariyodāto asaṃkiliṭṭho' ti.|| ||
Na ca maṃ sāvakā ājivato rakkhanti.|| ||
Na c'āhaṃ sāvakehi ājivato rakkhaṃ paccāsiṃsāmi.|| ||
■
Parisuddhadhamma-desano samāno||
'parisuddhadhammadeno'mhi' ti paṭijānāmi,||
'parisuddhā me Dhamma-desanā||
pariyodātā asaṃkiliṭṭhā' ti.|| ||
Na ca maṃ sāvakā Dhamma-desanato rakkhanti.|| ||
Na c'āhaṃ sāvakehi Dhamma-desanato rakkhaṃ paccāsiṃsāmi.|| ||
■
Parisuddhaveyyākaraṇo samāno||
'parisuddhaveyyākaraṇo'mhi' ti paṭijānāmi,||
'parisuddhaṃ me veyyākaraṇaṃ||
pariyodātaṃ asaṃkiliṭṭhan' ti.|| ||
Na ca maṃ sāvakā veyyākaraṇato rakkhanti.|| ||
Na c'āhaṃ sāvakehi veyyākaraṇato rakkhaṃ paccāsiṃsāmi.|| ||
■
Parisuddhañāṇa-dassano samāno||
'parisuddhañāṇa-dassano'mhi' ti paṭijānāmi,||
'parisuddhaṃ me ñāṇa-dassanaṃ||
pariyodātaṃ asaṃkiliṭṭhan' ti.|| ||
Na ca maṃ sāvakā ñāṇa-dassanato rakkhanti.|| ||
Na c'āhaṃ sāvakehi ñāṇa-dassanato rakkhaṃ paccāsiṃsāmiti.|| ||
Kakudhavaggo pañcamo|| ||
