Aṇguttara Nikāya
Pañcaka-Nipāta
XIX. Arañña Vaggo
Sutta 187
Yathā-Santhatika Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Sāvatthiyaṃ viharati.|| ||
Tatra kho Bhagavā bhikkhu āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
"Pañc'ime bhikkhave yathāsanthatikā.|| ||
Katame pañca?|| ||
Mandattā momūhattā yathāsanthatiko hoti.|| ||
Pāpiccho icchā-pakato yathāsanthatiko hoti.|| ||
Ummādā cittakkhepā yathāsanthatiko hoti.|| ||
Vaṇṇitaṃ buddhehi Buddha-sāvakehiti yathāsanthatiko hoti.|| ||
Appicchataṃ yeva nissāya,||
santuṭṭhiṃ yeva nissāya,||
sallekhaṃ yeva nissāya,||
pavivekaṃ yeva nissāya,||
idam atthikaṃ yeva nissāya yathāsanthatiko hoti.|| ||
Ime kho bhikkhave pañca yathāsanthatikā.|| ||
§
Imesaṃ kho bhikkhave pañcannaṃ yathāsanthatikānaṃ yvāyaṃ yathāsanthatiko appicchataṃ yeva nissāya,||
santuṭṭhiṃ yeva nissāya,||
sallekhaṃ yeva nissāya,||
pavivekaṃ yeva nissāya,||
idam atthikaṃ yeva nissāya,||
yathāsanthatiko hoti,||
ayaṃ imesaṃ pañcannaṃ,||
yathāsanthatikānaṃ aggo ca||
seṭṭho ca||
mokkho ca||
uttamo ca||
pavaro ca.|| ||
■
Seyyathā pi, bhikkhave, gavā khīraṃ,||
khīramhā dadhi,||
dadhimhā navanītaṃ,||
navanitamhā sappi,||
sappimhā sappi-maṇḍo tattha aggam akkhāyati,||
evam eva kho, bhikkhave, imesaṃ pañcannaṃ yathāsanthatikānaṃ yvāyaṃ yathāsanthatiko appicchataṃ yeva nissāya,||
santuṭṭhiṃ yeva nissāya||
sallekhaṃ yeva nissāya,||
pavivekaṃ yeva nissāya,||
idam atthikaṃ yeva nissāya yathāsanthatiko hoti,||
ayaṃ imesaṃ pañcannaṃ yathāsanthatikānaṃ aggo ca||
seṭṭho ca||
mokkho ca||
uttamo ca||
pavaro cā" ti.|| ||
