Aṇguttara Nikāya
Pañcaka-Nipāta
XIX. Arañña Vaggo
Sutta 190
Patta-Piṇḍika Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Sāvatthiyaṃ viharati.|| ||
Tatra kho Bhagavā bhikkhu āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
"Pañc'ime bhikkhave pattpiṇḍikā.|| ||
Katame pañca?|| ||
Mandattā momūhattā pattapiṇḍiko hoti.|| ||
Pāpiccho icchā-pakato pattapiṇḍiko hoti.|| ||
Ummādā cittakkhepā pattapiṇḍiko hoti.|| ||
Vaṇṇitaṃ buddhehi Buddha-sāvakehiti pattapiṇḍiko hoti appicchataṃ yeva nissāya,||
santuṭṭhiṃ yeva nissāya,||
sallekhaṃ yeva nissāya,||
pavivekaṃ yeva nissāya,||
idam atthikaṃ yeva nissāya pattapiṇḍiko hoti.|| ||
Ime kho bhikkhave pañca pattapiṇḍikā.|| ||
§
Imesaṃ kho bhikkhave pañcannaṃ pattapiṇḍikānaṃ yvāyaṃ pattapiṇḍiko appicchataṃ yeva nissāya,||
santuṭṭhiṃ yeva nissāya,||
sallekhaṃ yeva nissāya,||
pavivekaṃ yeva nissāya,||
idam atthikaṃ yeva nissāya pattapiṇḍiko hoti||
ayaṃ imesaṃ pañcannaṃ pattapiṇḍikānaṃ aggo ca||
seṭṭho ca||
mokkho ca||
uttamo ca||
pavaro ca.|| ||
■
Seyyāthā pi bhikkhave gavā khīraṃ||
khiramhā dadhi,||
dadhimhā navanītaṃ,||
navanītamhā sappi,||
sappimhā sappi-maṇḍo tattha aggam akkhāyati,||
evam eva kho, bhikkhave,||
imesaṃ pañcannaṃ pattapiṇḍikānaṃ yvāyaṃ pattapiṇḍiko [221] appicchataṃ yeva nissāya,||
santuṭṭhiṃ yeva nissāyaya,||
sallekhaṃ yeva nissāya,||
pavivekaṃ yeva nissāya,||
idam atthikaṃ yeva nissāya pattapiṇḍiko hoti,||
ayaṃ imesaṃ pañcannaṃ pattapiṇḍikānaṃ aggo ca||
seṭṭho ca||
mokkho ca||
uttamo ca||
pavaro cā" ti.|| ||
Āraññaka Vagga Catuttho
