Aṇguttara Nikāya
Chakka Nipāta
V. Dhammika Vagga
Sutta 52
Khattiya Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Sāvatthiyaṃ viharati||
Jetavane Anāthapiṇḍikassa ārāme.|| ||
Atha kho Jāṇussoṇī brāhmaṇo yena Bhagavā ten'upasaṇkami.|| ||
Upasaṇkamitvā Bhagavatā saddhiṃ sammodi.|| ||
Sammodanīyaṃ kathaṃ sārāṇiyaṃ vīti-sāretvā eka-m-antaṃ nisīdi.|| ||
Eka-m-antaṃ nisinno kho Jāṇussoṇī brāhmaṇo Bhagavantaṃ etad avoca:|| ||
[363] 2. "Khattiyā bho Gotama||
kim adippāyā,||
kiṃ upavicārā,||
kiṃ adhiṭṭhānā,||
kiṃ abhinivesā,||
kiṃ pariyosānā" ti?|| ||
"Khattiyā kho brāhmaṇa||
bhog-ā-dhippāyā,||
paññ'ūpavicārā,||
bal-ā-dhiṭṭhānā,||
paṭh'avibhinivesā,||
issariya-pariyosānā" ti.|| ||
"Brāhmaṇā pana bho Gotama||
kim adhippāyā,||
kiṃ upavicārā,||
kiṃ adhiṭṭhānā,||
kiṃ abhinivesā,||
kiṃ pariyosānā" ti?|| ||
"Brāhmaṇā kho brāhmaṇa||
bhog-ā-dhippāyā,||
paññ'ūpavicārā,||
mant-ā-dhiṭṭhānā,||
yaññ-ā-bhinivesā,||
Brahma-loka-pariyosānā" ti.|| ||
"Gahapatikā pana bho Gotama||
kim adhippāyā,||
kiṃ upavicārā,||
kiṃ adhiṭṭhānā,||
kiṃ abhinivesā,||
kiṃ pariyosānā" ti?|| ||
"Gahapatikā kho brāhmana||
bhog-ā-dhippāyā,||
paññ'ūpavicārā,||
sipp-ā-dhiṭṭhānā,||
kammant-ā-bhinivesā,||
niṭṭhita-kammanta-pariyosānā" ti.|| ||
"Itthi pana bho Gotama||
kim adhippāyā,||
kiṃ upavicārā,||
kiṃ adhiṭṭhānā,||
kiṃ abhinivesā,||
kiṃ pariyosānā" ti?|| ||
"Itthi kho brāhmaṇa||
puris-ā-dhippāyā,||
alaṇkār'ūpavicārā,||
putt-ā-dhiṭṭhānā,||
asapattī'bhinivesā,||
issariya-pariyosānā" ti.|| ||
"Corā pana bho Gotama||
kim adhippāyā,||
kiṃ upavicārā,||
kiṃ adhiṭṭhānā,||
kiṃ abhinivesā,||
kiṃ pariyosānā" ti?|| ||
"Corā kho brāhmaṇa||
ādān-ā-dhippāyā,||
gahan'ūpavicārā,||
saṭh-ā-dhiṭṭhānā,||
andhakār-ā-bhinivesā,||
adassana-pariyosānā" ti.|| ||
"Samaṇā pana ho Gotama||
kim adhippāyā,||
kiṃ upavicārā,||
kiṃ adhiṭṭhānā,||
kiṃ abhinivesā,||
kiṃ pariyosānā" ti?|| ||
"Samaṇā kho brāhmaṇa||
khanti-soracc-ā-dhippāyā,||
paññ'ūpavicārā,||
sīl-ā-dhiṭṭhānā,||
ākiñcaññ-ā-bhinivesā,||
Nibbāna-pariyosānā" ti.|| ||
3. "Acchariyaṃ bho Gotama,||
abbhūtaṃ bho Gotama.|| ||
Khattiyānam pi bhavaṃ Gotamo jānāti||
adhippāyañ ca,||
upavicārañ ca,||
adhiṭṭhānañ ca,||
abhinivesañ ca,||
pariyosānañ ca.|| ||
"Acchariyaṃ bho Gotama,||
abbhūtaṃ bho Gotama.|| ||
Brāhmaṇānam pi bhavaṃ Gotamo jānāni||
adhippāyañ ca,||
upavicārañ ca,||
adhiṭṭhānañ ca,||
abhinivesañ ca,||
pariyosānañ ca.|| ||
"Acchariyaṃ bho Gotama,||
abbhūtaṃ bho Gotama.|| ||
Gahapatikānam pi bhavaṃ Gotamo jānāti||
adhippāyañ ca,||
upavicārañ ca,||
adhiṭṭhānañ ca,||
abhinivesañ ca,||
pariyosānañ ca.|| ||
"Acchariyaṃ bho Gotama,||
abbhūtaṃ bho Gotama.|| ||
Itthīnam pi bhavaṃ Gotamo jānāti||
adhippāyañ ca,||
upavicārañ ca,||
adhiṭṭhānañ ca,||
abhinivesañ ca,||
pariyosānañ ca.|| ||
"Acchariyaṃ bho Gotama,||
abbhūtaṃ bho Gotama.|| ||
Corānam pi bhavaṃ Gotamo [364] jānāti||
adhippāyañ ca,||
upavicārañ ca,||
adhiṭṭhānañ ca,||
abhinivesañ ca,||
pariyosānañ ca.|| ||
"Acchariyaṃ bho Gotama,||
abbhūtaṃ bho Gotama.|| ||
Samaṇānam pi bhavaṃ Gotamo jānāti||
adhippāyañ ca,||
upavicārañ ca,||
adhiṭṭhānañ ca,||
abhinivesañ ca,||
pariyosānañ ca.|| ||
Abhikkantaṃ bho Gotama abhikkantaṃ bho Gotama,||
seyyathā pi bho Gotama nikkujjitaṃ vā ukkujjeyya,||
paṭi-c-channaṃ vā vivareyya,||
mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya,||
'cakkhu-manto rūpānidakkhinti' ti.|| ||
Evam eva bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi Dhammañ ca bhikkhu Saṇghañca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
