Soṇa Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

[374]

[1][pts][than] Evam me sutaṃ.|| ||

Ekaṃ samayaṃ Bhagavā Rājagahe viharati Gijjhakūṭe pabbate.|| ||

Tena kho pana samayen'āyasmā Soṇo Rājagahe viharati Sītavanasmiṃ.|| ||

Atha kho āyasmato Soṇassa raho-gatassa patisallīnassa||
evaṃ cetaso parivitakko udapādi:|| ||

"Ye kho keci Bhagavato sāvakā āraddha-viriyā viharanti,||
ahaṃ tesaṃ aññataro.|| ||

Atha ca pana me na anupādāya āsavehi cittaṃ vimuccati,||
saṃvijjanti kho pana me kule bhogā,||
sakkā bhoge ca bhuñjituṃ puññāni ca kātuṃ.|| ||

Yan nūn-ā-haṃ sikkhaṃ paccakkhāya hīnā-yāvattitvā bhoge ca bhuñjeyyaṃ,||
puññāni ca kareyyan" ti.|| ||

■

Atha kho Bhagavā āyasmato Soṇassa cetasā ceto-parivitakkam aññāya,||
seyyathā pi nāma balavā puriso sammiñjitaṃ vā bāhaṃ pasāreyya pasāritaṃ vā bāhaṃ sammiñjeyya,||
evam eva kho Gijjhakūṭe pabbate antara-hito Sītavane āyasmato Soṇassa sammukhe pātu-r-ahosi.|| ||

Nisidi Bhagavā paññatte āsane,||
āyasmā pi kho Soṇo Bhagavantaṃ abhivādetvā eka-m-antaṃ nisīdi.|| ||

Eka-m-antaṃ nisinnaṃ kho āyasmantaṃ Soṇaṃ Bhagavā etad avoca:|| ||

[375] "Nanū te Soṇa,||
raho-gatassa patisallīnassa evaṃ cetaso parivitakko udapādi:|| ||

"Ye kho keci Bhagavato sāvakā āraddha-viriyā viharanti,||
ahaṃ tesaṃ aññataro.|| ||

Atha ca pana me na anupādāya āsavehi cittaṃ vimuccati,||
saṃvijjanti kho pana me kule bhogā,||
sakkā bhoge ca bhuñjituṃ puññāni ca kātuṃ.|| ||

Yan nūn-ā-haṃ sikkhaṃ paccakkhāya hīnā-yāvattitvā bhoge ca bhuñjeyyaṃ,||
puññāni ca kareyyan" ti.|| ||

"Evaṃ bhante" ti.|| ||

■

"Taṃ kiṃ maññasi, Soṇa||
kusalo tvaṃ pubbe agārika-bhuto vīṇāya tanti-s-sare" ti?|| ||

"Evaṃ bhante."|| ||

"Taṃ kiṃ maññesi Soṇa||
yadā te vīṇāya tantiyo accāyatā honti,||
api nu te vīṇā tasmiṃ samaye saravatī vā hoti,||
kammaññā vā" ti?|| ||

"No h'etaṃ bhante."|| ||

"Taṃ kiṃ maññasi Soṇa||
yadā te vīṇāya tantiyo ati-sithilā honti,||
api nu te vīṇā tasmiṃ samaye saravati vā hoti,||
kammaññā vā" ti?|| ||

"No h'etaṃ bhante."|| ||

Yadā pana te Soṇa vīṇāya tantiyo na accāyatā honti na ati-sithilā,||
same guṇe pati-ṭ-ṭhitā,||
api nu te vīṇā tasmiṃ samaye saravatī vā hoti kammaññā vā" ti?|| ||

"Evaṃ bhante."|| ||

■

"Evam eva kho Soṇa accāraddhaṃ-viriyaṃ uddhaccāya saṃvaṭṭati,||
ati-līnaṃ viriyaṃ kosajjāya saṃvaṭṭa" ti.|| ||

■

"Tasmātiha tvaṃ Soṇa,||
viriya-samataṃ adhiṭṭhaha,||
indriyānañ ca samataṃ paṭivijjha,||
tattha ca nimittaṃ gaṇhāhī" ti.|| ||

"Evaṃ bhante" tī kho āyasmā Soṇo Bhagavato paccassosi.|| ||

Atha kho Bhagavā āyasmantaṃ Soṇaṃ iminā ovādena ovaditvā,||
seyyathā pi nāma balavā puriso sammiñjitaṃ vā bāhaṃ pasāreyya||
pasāritaṃ vā bāhaṃ sammiñjeyya,||
evam eva kho Sītavane antara-hito Gijjhakūṭe pabbate pātu-r-ahosi.|| ||

[376] 2. Atha kho āyasmā Soṇo aparena samayena viriya-samataṃ adhiṭṭhi indriyānañ ca samataṃ paṭivijjhi||
tattha ca nimittaṃ aggahesi.|| ||

Atha kho āyasmā Soṇo eko vūpakaṭṭho,||
appamatto,||
ātāpi,||
pahit'atto,||
viharanto,||
na cirass'eva yass'atthāya kula-puttā samma-d-eva agārasmā anagāriyaṃ pabbajanti,||
tad anuttaraṃ Brahma-cariya-pariyosānaṃ diṭṭhe'va dhamme sayaṃ abhiññā sacchi-katvā upasampajja vihāsi:|| ||

"Khīṇā jāti,||
vusitaṃ Brahma-cariyaṃ,||
kataṃ karaṇīyaṃ,||
nāparaṃ itthattāyā" ti abbhaññāsi.|| ||

Aññataro ca pan'āyasmā Soṇo arahataṃ ahosi.|| ||

Atha kho āyasmato Soṇassa Arahatta-p-pattassa etad ahosi:|| ||

"Yan nūn-ā-haṃ yena Bhagavā ten'upasaṇkameyyaṃ,||
upasaṇkamitvā Bhagavato santike aññaṃ vyākareyyan" ti.|| ||

Atha kho āyasmā Soṇo yena Bhagavā ten'upasaṇkami.|| ||

Upasaṇkamitvā Bhagavantaṃ abhivādevā eka-m-antaṃ nisidi.|| ||

Eka-m-antaṃ nisinno kho āyasmā Soṇo Bhagavantaṃ etad avoca:|| ||

3. Yo so bhante bhikkhū arahaṃ khīṇ'āsavo,||
vusitavā,||
kata-karaṇīyo,||
ohita-bhāro,||
anuppatta-sadattho,||
pari-k-khīṇa-bhava-saṃyojano,||
samma-d-aññā-vimutto,||
so cha-ṭ-ṭhānāni adhimutto hoti:|| ||

Nekkhamm-ā-dhimutto hoti.|| ||

Pavivek-ā-dhimutto hoti.|| ||

Avyāpajjh-ā-dhimutto hoti.|| ||

Taṇha-k-khay-ā-dhimutto hoti.|| ||

Upādāna-k-khay-ā-dhimutto hoti.|| ||

Asa-m-moh-ā-dhimutto hoti.|| ||

4. "Siyā kho pana bhante,||
idh'ekaccassa āyasmato evam assa:|| ||

'Kevalaṃ saddhā-mattakaṃ nūna ayam āyasmā nissāya nekkhamm-ā-dhimutto' ti.|| ||

Na kho pan'etaṃ bhante evaṃ daṭṭhabbaṃ.|| ||

Khīṇ'āsavo bhante bhikkhū vusitavā,||
kata-karaṇīyo karaṇīyaṃ attano asamanupassanto katassa vā paticayaṃ,||
khayā rāgassa vita-rāgattā nekkhamm-ā-dhimutto hoti||
khayā dosassa vīta-dosattā nekkhamm-ā-dhimutto hoti,||
khayā mohassa vīta-mohattā nekkhamm-ā-dhimutto hoti.|| ||

■

[377] 5. Siyā kho pana bhante,||
idh'ekaccassa āyasmato evam assa:|| ||

'Lābha-sakkāra-silokaṃ nūna ayam āyasmā nikāmaya-māno pavivek-ā-dhimutto' ti.|| ||