Aṇguttara Nikāya
IX. Navaka Nipāta
I. Sambodha Vagga
Sutta 7
Sutavā-Paribbājaka Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][than][pts][upal][olds] Evaṃ me sutaṃ.|| ||
Ekaṃ samayaṃ Bhagavā Rājagahe viharati Gijjhakūṭepabbate.|| ||
Atha kho Sutavā paribbājako yena Bhagavā ten'upasaṇkami,||
upasaṇkamitvā Bhagavatā saddhiṃ sammodi,||
sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
Eka-m-antaṃ nisinno kho Sutavā paribbājako Bhagavantaṃ etad avoca:|| ||
2. "Ekam idaṃ bhante,||
samayaṃ Bhagavā idh'eva Rājagahe viharati Giribbaje.|| ||
Tatra me bhante,||
Bhagavato sammukhā sutaṃ||
sammukhā paṭiggahītaṃ:|| ||
'Yo so Sutavā Bhikkhu arahaṃ khīṇ'āsavo||
vusitavā||
kata-karaṇīyo ohita- [370] bhāro||
anuppatta-sadattho||
parikkhīṇa-bhava-saṃyojano||
samma-d-aññā-vimutto,||
abhabbo so pañca ṭhānāni ajjhā-carituṃ:|| ||
Abhabbo khīṇ'āsavo bhikkhu sañcicca pāṇaṃ jīvitā voropetuṃ.|| ||
Abhabbo khīṇ'āsavo bhikkhu adinnaṃ theyya-saṇkhātaṃ ādātuṃ.|| ||
Abhabbo khīṇ'āsavo bhikkhu methunaṃ dhammaṃ paṭisevitūṃ.|| ||
Abhabbo khīṇ'āsavo bhikkhu sampajānamusā bhāsituṃ.|| ||
Abhabbo khīṇ'āsavo bhikkhu sannidhikārakaṃ kāme paribhuñjituṃ seyyathā pi pubbe agārika-bhuto' ti.|| ||
Kacci me taṃ bhante,||
Bhagavato sussutaṃ suggahītaṃ sumana-sikataṃ sūpadhāritan ti?"|| ||
§
3. "Taggha te taṃ Sutavā,||
sussutaṃ suggahītaṃ sumana-sikataṃ supadhāritaṃ.|| ||
Pubbe c'āhaṃ Sutavā, etarahi ca evaṃ vadāmi:|| ||
'Yo so bhikkhu arahaṃ khīṇ'āsavo vusitavā kata-karaṇīyo ohita-bhāro anuppatta-sadattho parikkīṇabhavasaṃyojano samma-d-aññā-vimutto,||
abhabbo so nava ṭhānāni ajjhā-carituṃ:|| ||
Abhabbo khīṇ'āsavo bhikkhu sañcicca pāṇaṃ jīvitā voropetuṃ.|| ||
Abhabbo khīṇ'āsavo bhikkhū adinnaṃ theyya-saṇkhātaṃ ādātuṃ.|| ||
Abhabbo khīṇ'āsavo bhikkhu methunaṃ dhammaṃ patisevītuṃ.|| ||
Abhabbo khīṇ'āsavo bhikkhu sampajānamusā bhāsituṃ.|| ||
Abhabbo khīṇ'āsavo bhikkhu sannidhikārake kāme paribhuñjituṃ seyyathā pi pubbe agāriya-bhuto.|| ||
Abhabbo khīṇ'āsavo bhikkhu chand-ā-gatiṃ gatuṃ.|| ||
Abhabbo khīṇ'āsavo bhikkhu dos-ā-gatiṃ gatuṃ.|| ||
Abhabbo khīṇ'āsavo bhikkhu moh-ā-gatiṃ gantuṃ.|| ||
Abhabbo khīṇ'āsavo bhikkhu bhay-ā- [371] gatim gantum.'|| ||
Pubbe c'āhaṃ Sutavā,||
etarahi ca evaṃ vadāmi.|| ||
Yo so bhikkhu arahaṃ vūsitavā kata-karaṇīyo ohitahāro anuppatta-sadattho parikkhiṇa-bhava-saṃyojano samma-d-aññā vimutto||
abhabbo so imāni nava-ṭhānāni ajjhā-caritun" ti.|| ||
