Aṇguttara Nikāya
XI. Ekā-Dasaka Nipāta
II. Anussati Vagga
Sutta 12
Mahānāma Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
1. [pts][than][olds] Ekaṃ samayaṃ Bhagavā,||
Sakkesu viharati,||
Kapilavatthusmiṃ,||
Nigrodhārāme.|| ||
Tena kho pana samayena||
sambahulā bhikkhu||
Bhagavato cīvira-kammaṃ karonti.|| ||
"Niṭṭhita-cīvaro||
Bhagavā temāsaccayena cārikaṃ pakkamissatī" ti.|| ||
Assosi kho Mahānāmo Sakko||
sambahulā kira bhikkhu||
Bhagavato cīvara-kammaṃ karonti.|| ||
"Niṭṭhita-cīvaro||
Bhagavā temāsaccayena cārikaṃ pakkamissatī' ti.|| ||
Atha kho Mahānāmo Sakko||
yena Bhagavā ten'upasaṇkami.|| ||
Upasaṃkamitvā Bhagavantaṃ||
abhivādetvā||
eka-m-antaṃ nisīdi.|| ||
Eka-m-antaṃ nisinno kho||
Mahānāmo Sakko Bhagavantaṃ etad avoca:|| ||
"Sutaṃ me taṃ, bhante,||
sambahulā kira bhikkhu||
Bhagavato cīvara-kammaṃ karonti.|| ||
'Niṭṭhita-cīvaro||
Bhagavā temāsaccayena cārikaṃ pakkamissatī' ti.|| ||
Tesaṃ no, bhante,||
nānāvihārehi viharataṃ||
kenassa||
vihārena vihātabban?" ti?|| ||
[329] "Sādhu, sādhu, Mahānāma,||
etaṃ kho Mahānāma,||
tumhākaṃ paṭirūpaṃ kula-puttānaṃ||
yaṃ tumhe Tathāgataṃ||
upasaṇkamitvā puccheyyātha:|| ||
'Tesaṃ no, bhante,||
nānāvihārehi viharataṃ||
kenassa||
vihārena vihātabban?' ti.|| ||
■
Saddho kho, Mahānāma, ārādhako hoti,||
no assaddho.|| ||
Āraddha-viriyo ārādhako hoti,||
no kusīto.|| ||
Upatthika-satī ārādhako hoti,||
no muṭṭhas-satī.|| ||
Samāhito ārādhako hoti,||
no asamāhito.|| ||
Paññavā ārādhako hoti,||
no duppañño.|| ||
■
Imesu kho tvaṃ, Mahānāma,||
pañcasu dhammesu patiṭṭhāya||
cha dhamme uttariṃ bhāveyyāsi.|| ||
Idha tvaṃ, Mahānāma,||
Tathāgataṃ anussareyyāsi:|| ||
'Iti pi so Bhagavā||
arahaṃ||
Sammā Sambuddho||
vijjā-caraṇa-sampanno||
Sugato||
loka-vidū anuttaro||
purisa-damma-sārathi||
satthā deva-manussānaṃ||
Buddho||
Bhagavā' ti.|| ||
Yasmiṃ Mahānāma samaye||
ariya-sāvako Tathāgataṃ anussarati||
nev'assa tasmiṃ samaye||
rāga-pariyuṭṭhitaṃ cittaṃ hoti,||
na dosa-pariyuṭṭhitaṃ cittaṃ hoti,||
na moha-pariyuṭṭhitaṃ cittaṃ hoti.|| ||
Ujugatam ev'assa tasmiṃ samaye cittaṃ hoti.|| ||
Tathāgataṃ ārabbha uju-gata-citto||
kho pana, Mahānāma,||
ariya-sāvako||
labhati attha-vedaṃ||
labhati dhamma-vedaṃ,||
labhati dhamm'ūpasaṃhitaṃ||
pāmujjaṃ||
pamuditassa||
pīti||
jāyati.|| ||
Pīta-manassa||
kāyo passambhati,||
passaddha-kāyo||
sukhaṃ vediyati,||
sukhino||
cittaṃ samādhiyati.|| ||
Ayaṃ vuccati, Mahānāma,||
ariya-sāvako||
visama-gatāya pajāya sampanno viharati,||
savyāpajjhāya pajāya avyāpajjho viharati,||
dhamma-sota-samāpanno||
Buddh'ānu-s-satiṃ bhāveti.|| ||
■
Puna ca paraṃ tvaṃ, Mahānāma,||
Dhammaṃ anussareyyāsi:|| ||
'Svākkhāto Bhagavatā Dhammo||
sandiṭṭhiko||
akāliko||
ehi passiko||
opanayiko||
paccattaṃ veditabbo viññūhī' ti.|| ||
Yasmiṃ Mahānāma samaye||
ariya-sāvako Dhammaṃ anussarati||
nev'assa tasmiṃ samaye||
rāga-pariyuṭṭhitaṃ [330] cittaṃ hoti,||
na dosa-pariyuṭṭhitaṃ cittaṃ hoti,||
na moha-pariyuṭṭhitaṃ cittaṃ hoti.|| ||
Uju-gatam ev'assa tasmiṃ samaye cittaṃ hoti.|| ||
Dhammaṃ ārabbha uju-gatacitto kho pana, Mahānāma, ariya-sāvako||
labhati attha-vedaṃ||
labhati dhamma-vedaṃ,||
labhati dhamm'ūpasaṃhitaṃ||
pāmujjaṃ||
pamuditassa||
pīti||
jāyati.||||
Pīta-manassa||
kāyo passambhati,||
passaddha-kāyo||
sukhaṃ vediyati,||
sukhino||
cittaṃ samādhiyati.|| ||
Ayaṃ vuccati, Mahānāma,||
ariya-sāvako||
visama-gatāya pajāya sampanno viharati,||
savyāpajjhāya pajāya avyāpajjho viharati,||
Dhamma-sota-samāpanno||
Dhamm'ānu-s-satiṃ bhāveti.|| ||
■
Puna ca paraṃ tvaṃ, Mahānāma,||
Saṇghaṃ anussareyyāsi:|| ||
'Supaṭipanno Bhagavato sāvaka-saṇgho,||
ujupaṭipanno Bhagavato sāvaka-saṇgho,||
ñāyapaṭipanno Bhagavato sāvaka-saṇgho,||
sāmīcipaṭipanno Bhagavato sāvaka-saṇgho||
yad idaṃ cattāri purisa-yugāni||
aṭṭha-purisa-puggalā.|| ||
Esa Bhagavato sāvaka-saṇgho||
āhuneyyo,||
pāhuṇeyyo,||
dakkhiṇeyyo añjali-karaṇīyo,||
anuttaraṃ puñña-k-khettaṃ lokassā' ti.|| ||
Yasmiṃ Mahānāma samaye||
ariya-sāvako||
Saṇghaṃ anussarati||
nev'assa tasmiṃ samaye||
rāga-pariyuṭṭhitaṃ cittaṃ hoti,||
na dosa-pariyuṭṭhitaṃ cittaṃ hoti,||
na moha-pariyuṭṭhitaṃ cittaṃ hoti.|| ||
Ujugatam ev'assa tasmiṃ samaye cittaṃ hoti.|| ||
Saṇghaṃ ārabbha uju-gatacitto kho pana, Mahānāma,||
ariya-sāvako||
labhati attha-vedaṃ||
labhati dhamma-vedaṃ,||
labhati dhamm'ūpasaṃhitaṃ||
pāmujjaṃ,||
pamuditassa||
pīti||
jāyati.||||
Pīta-manassa||
kāyo passambhati,||
passaddha-kāyo||
sukhaṃ vediyati,||
sukhino||
cittaṃ samādhiyati.|| ||
Ayaṃ vuccati, Mahānāma,||
ariya-sāvako||
visama-gatāya pajāya sampanno viharati,||
savyāpajjhāya pajāya avyāpajjho viharati,||
Dhamma-sota-samāpanno||
Saṇgh'ānu-s-satiṃ bhāveti.|| ||
■
Puna ca paraṃ tvaṃ, Mahānāma,||
attano sīlāni anussareyyāsi||
akhaṇḍāni||
acchiddāni||
asabalāni||
akammāsāni||
bhujissāni||
viññūppasatthāni||
aparāmaṭṭhāni||
samādhi-saṃvaṭṭanikāni.|| ||
Yasmiṃ, Mahānāma,||
samaye ariya-sāvako sīlaṃ anussarati,||
nev'assa tasmiṃ samaye||
rāga-pariyuṭṭhitaṃ cittaṃ hoti,||
na dosa-pariyuṭṭhitaṃ cittaṃ hoti,||
na [331] moha-pariyuṭṭhitaṃ cittaṃ hoti.|| ||
Ujugatam ev'assa tasmiṃ samaye cittaṃ hoti sīlaṃ ārabbha.|| ||
Ujugatacitto kho pana, Mahānāma,||
ariya-sāvako||
labhati attha-vedaṃ||
labhati dhamma-vedaṃ,||
labhati dhamm'ūpasaṃhitaṃ||
pāmujjaṃ,||
pamuditassa||
pīti||
jāyati.||||
Pīta-manassa||
kāyo passambhati,||
passaddha-kāyo||
sukhaṃ vedivayati,||
sukhino||
cittaṃ samādhiyati.|| ||
Ayaṃ vuccati, Mahānāma,||
ariya-sāvako||
visama-gatāya pajāya sampatto viharati,||
savyāpajjhāya pajāya avyāpajjho viharati,||
dhamma-sota-samāpanno||
sīl'ānu-s-satiṃ bhāveti.|| ||
■
Puna ca paraṃ tvaṃ, Mahānāma,||
attano cāgaṃ asussareyyāsi:|| ||
'Lābhā vata me,||
su-laddhaṃ vata me,||
yohaṃ macchera-mala-pariyuṭṭhitāya pajāya||
vigata-mala-maccherena cetasā agāraṃ ajjhāvasāmi||
mutta-cāgo,||
payata-pāṇī,||
vossagga-rato||
yā cayogo dāna-saṃvibhāga-rato' ti.|| ||
Yasmiṃ, Mahānāma,||
samaye ariya-sāvako cāgaṃ anussarati||
nev'assa tasmiṃ samaye rāga-pariyuṭṭhitaṃ cittaṃ hoti,||
na dosa-pariyuṭṭhitaṃ cittaṃ hoti,||
na moha-pariyuṭṭhitaṃ cittaṃ hoti.|| ||
Ujugatam ev'assa tasmiṃ samaye cittaṃ hoti.|| ||
Cāgaṃ ārabbha uju-gata-citto kho pana, Mahānāma,||
ariya-sāvako||
labhati attha-vedaṃ||
labhati dhamma-vedaṃ,||
labhati dhamm'ūpasaṃhitaṃ||
pāmujjaṃ||
pamuditassa||
pīti||
jāyati.||||
Pīta-manassa||
kāyo passambhati,||
passaddha-kāyo||
sukhaṃ vediyati,||
sukhino||
cittaṃ samādhiyati.|| ||
Ayaṃ vuccati, Mahānāma,||
ariya-sāvako||
visama-gatāya pajāya sampanno viharati,||
savyāpajjhāya pajāya avyāpajjho viharati,||
dhamma-sota-samāpanno||
cāg'ānussatiṃ bhāveti.|| ||
■
Puna ca paraṃ tvaṃ, Mahānāma,||
devatā anussareyyāsi:|| ||
'Santi devā cātu-m-mahārājikā,||
santi devā Tāvatiṃsā,||
santi devā yāmā,||
santi devā Tusitā santi devā nimmāṇaratino,||
santi devā Paranimmita-vasavattino,||
santi devā brahma-kāyikā,||
santi devā tatuttariṃ.|| ||
Yathā rūpāya saddhāya samannāgatā tā devatā ito cutā tattha [332] uppannā,||
mayham pi tathā-rūpā saddhā saṃvijjati.|| ||
Yathā-rūpena sīlena||
samannāgatā tā devatā||
ito cutā||
tattha uppannā,||
mayham pi tathā-rūpaṃ sīlaṃ||
saṃvijjati.|| ||
Yathā-rūpena sutena||
samannāgatā tā devatā||
ito cutā||
tattha upapannā,||
mayham pi tathā-rūpaṃ sutaṃ||
saṃvijjati.|| ||
Yathā-rūpena cāgena||
samannāgatā tā devatā||
ito cutā||
tattha upapannā,||
mayham pi tathā-rūpo cāgo||
saṃvijjati.|| ||
Yathā-rūpāya paññāya||
samannāgatā tā devatā||
ito cutā||
tattha upapannā,||
mayham pi tathā-rūpā paññā||
saṃvijjatī' ti.|| ||
Yasmiṃ Mahānāma samaye ariya-sāvako attano ca tāsañca devatānaṃ saddhañ ca||
sīlañ ca||
sutañ ca||
cāgañ ca||
paññ'ca anussarati,||
nev'assa tasmiṃ samaye rāga-pariyuṭṭhitaṃ cittaṃ hoti,||
na dosa-pariyuṭṭhitaṃ cittaṃ hoti,||
na moha-pariyuṭṭhitaṃ cittaṃ hoti.|| ||
Ujugatamev'assa tasmiṃ samaye cittaṃ hoti devatā ārabbha.|| ||
Ujugata-citto kho pana Mahānāma ariya-sāvako||
labhati attha-vedaṃ,||
labhati dhamma-vedaṃ,||
labhati dhamm'ūpasaṃhitaṃ||
pāmujjaṃ||
pamuditassa||
pīti||
jāyati.||||
Pīta-manassa||
kāyo passambhati,||
passaddha-kāyo||
sukhaṃ vediyati,||
sukhino||
cittaṃ samādhiyati.|| ||
Ayaṃ vuccati, Mahānāma,||
ariya-sāvako||
visama-gatāya pajāya sampanno viharati,||
savyāpajjhāya pajāya avyāpajjho viharati,||
dhamma-sota-samāpanno||
devat'ānussatiṃ bhāveti' ti.|| ||
