Majjhima Nikāya
II. Majjhima-Paṇṇāsa
2. Bhikkhu Vagga
Sutta 68
Naḷakapāna Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][chlm][pts][upal] Evaṃ me sutaṃ:|| ||
Ekaṃ samayaṃ Bhagavā Kosalesu viharati Naḷakapāne palāsavane.|| ||
Tena kho pana samayena sambahulā abhiññātā abhiññātā kula-puttā Bhagavantaṃ uddissa saddhā agārasmā anagāriyaṃ pabba-jitā honti.|| ||
Āyasmā ca Anuruddho āyasmā ca Bhaddiyo āyasmā ca Kimbilo āyasmā ca bhagu āyasmā kuṇḍadhāno āyasmā ca revato āyasmā ca Ānando: aññe ca abhiññātā abhiññātā kula-puttā.|| ||
Tena kho pana samayena Bhagavā bhikkhu-saṇgha-parivuto [463] abbhokāse nisinno hoti.|| ||
Atha kho Bhagavā te kula-putte ārabbha bhikkhu āmantesi||
ye te bhikkhave kula-puttā mamaṃ uddissa saddhā agārasmā anagāriyaṃ pabba-jitā||
kacci te bhikkhave bhikkhū abhiratā brahma-cariye' ti.|| ||
Evaṃ vutte te bhikkhū tuṇhī ahesuṃ.|| ||
Dutiyam pi kho Bhagavā te kula-putte ārabbha bhikkhū āmantesi,||
ye te bhikkhave kula-puttā mamaṃ uddissa saddhā agārasmā anagāriyaṃ pabba-jitā||
kacci te bhikkhave bhikkhū abhiratā brahma-cariye' ti.|| ||
Evaṃ vutte te bhikkhū tuṇhī ahesuṃ.|| ||
Tatiyam pi kho Bhagavā te kula-putte ārabbha bhikkhū āmantesi||
ye te bhikkhave kula-puttā mamaṃ uddissa saddhā agārasmā anagāriyaṃ pabba-jitā||
kacci te bhikkhū abhiratā brahma-cariye' ti.|| ||
Tatiyam pi kho te bhikkhū tuṇhī ahesuṃ.|| ||
Atha kho Bhagavato etad ahosi: yan nūn-ā-haṃ teva3 kula-putte puccheyyan' ti.|| ||
Atha kho Bhagavā āyasmantaṃ Anuruddhaṃ āmantesi: kacci tumhe Anuruddhā abhiratā brahma-cariye' ti.|| ||
Taggha mayaṃ bhante abhiratā brahma-cariyeti.|| ||
Sādhu sādhu Anuruddhā etaṃ kho Anuruddhā tumhākaṃ paṭirūpaṃ kula-puttānaṃ saddhā agārasmā anagāriyaṃ pabba-jitānaṃ yaṃ tumhe abhirameyyātha brahma-cariye.|| ||
Yena tumhe Anuruddhā bhadrena yobbanena samannāgatā paṭhamena vayasā susu kālakesā kāme paribhuñjeyyātha.|| ||
Tena tumhe Anuruddhā bhadrena4 yobbanena samannāgatā paṭhamena vayasā susu kālakesā agārasmā anagāriyaṃ pabba-jitā.|| ||
Te kho pana tumhe Anuruddhā n'eva rājābhinītā agārasmā anagāriyaṃ pabba-jitā||
na corābhinītā agārasmā anagāriyaṃ pabba-jitā||
na iṇaṭṭā agārasmā anagāriyaṃ pabba-jitā||
na bhayaṭṭā agārasmā anagāriyaṃ pabba-jitā||
na ājīvikāpakatā agārasmā anagāriyaṃ pabba-jitā.|| ||
Api ca kho'mhi otiṇṇo jātiyā jarāya maraṇena sokehi paridevehi dukkhehi domanassehi upāyāsehi||
dukkh'otiṇṇo dukkha-pareto app'eva nāma imassa kevalassa dukkha-k-khandhassa antakiriyā paññāyethā' ti.|| ||
Na nu tumhe Anuruddhā evaṃ saddhā agārasmā anagāriyaṃ pabba-jitā' ti.|| ||
"Evaṃ bhante" ti.|| ||
Evaṃ pabba-jitena ca pana Anuruddhā kula-puttena kimassa.|| ||
Karaṇīyaṃ: 'vivekaṃ Anuruddhā kāmehi vivekaṃ akusalehi dhammehi pīti-sukhaṃ nādhigacchati aññaṃ vā tato santataraṃ.|| ||
Tassa abhijjhā pi cittaṃ pariyādāya tiṭṭhati.|| ||
Vyāpādo pi cittaṃ pariyādāya tiṭṭhati.|| ||
Thīna-middham pi cittaṃ pariyādāya tiṭṭhati.|| ||
Uddhacca-kukkuccam pi cittaṃ pariyādāya tiṭṭhati.|| ||
Vicikicchā pi [464] cittaṃ pariyādāya tiṭṭhati.|| ||
Aratīpi cittaṃ pariyādāya tiṭṭhati.|| ||
Tandīpi cittaṃ pariyādāya tiṭṭhati.|| ||
Vivekaṃ Anuruddhā kāmehi vivekaṃ akusalehi dhammehi pīti-sukhaṃ nādhigacchati aññaṃ vā tato santataraṃ.|| ||
Vivekaṃ Anuruddhā kāmehi vivekaṃ akusalehi dhammehi pīti-sukhaṃ adhigacchati aññaṃ vā tato santataraṃ.|| ||
Tassa abhijjhāpi cittaṃ na pariyādāya tiṭṭhati.|| ||
Vyāpādo pi cittaṃ na pariyādāya tiṭṭhati.|| ||
Thīna-middham pi cittaṃ na pariyādāya tiṭṭhati.|| ||
Uddhacca-kukkuccam pi cittaṃ na pariyādāya tiṭṭhati.|| ||
Vicikicchā pi cittaṃ na pariyādāya tiṭṭhati.|| ||
Aratīpi cittaṃ na pariyādāya tiṭṭhati.|| ||
Tandīpi cittaṃ na pariyādāya tiṭṭhati.|| ||
Vivekaṃ Anuruddhā kāmehi vivekaṃ akusalehi dhammehi pīti-sukhaṃ adhigacchati aññaṃ vā tato santataraṃ.|| ||
Kinti vo Anuruddhā mayi hoti: ye āsavā saṇkilesikā pono-bhavikā sadarā dukkha-vipākā āyatiṃ jāti-jarāmaraṇīyā||
a-p-pahīnā te Tathāgatassa.|| ||
Tasmā Tathāgato saṇkhāy'ekaṃ paṭisevati||
saṇkhāy'ekaṃ adhivāseti||
saṇkhāy'ekaṃ parivajjeti||
saṇkhāy'ekaṃ vinodetī' ti.|| ||
Na kho no bhante Bhagavati evaṃ hoti: 'ye āsavā saṇkilesikā pono-bhavikā sadarā dukkha-vipākā āyatiṃ jāti-jarāmaraṇīyā||
a-p-pahīnā te Tathāgatassa.|| ||
Tasmā Tathāgato saṇkhāy'ekaṃ paṭisevati||
saṇkhāy'ekaṃ adhivāseti||
saṇkhāy'ekaṃ parivajjeti||
saṇkhāy'ekaṃ vinodetī' ti.|| ||
Evaṃ kho no bhante Bhagavati hoti: ye āsavā saṇkilesikā pono-bhavikā sadarā dukkha-vipākā āyatiṃ jāti-jarāmaraṇīyā||
pahīnā te Tathāgatassa.|| ||
Tasmā Tathāgato saṇkhāy'ekaṃ paṭisevati||
saṇkhāy'ekaṃ adhivāseti||
saṇkhāy'ekaṃ parivajjeti||
saṇkhāy'ekaṃ vinodetī' ti.|| ||
Sādhu sādhu Anuruddhā||
Tathāgatassa Anuruddhā||
ye āsavā saṇkilesikā pono-bhavikā sadarā dukkha-vipākā āyatiṃ jāti-jarāmaraṇīyā||
pahīnā te ucchinna-mūlā tālā-vatthu-katā anabhāva-katā1 āyatiṃ anuppāda-dhammā.|| ||
Seyyathā pi Anuruddhā tālo matthakacchinno abhabbo punavirūḷhiyā evam eva kho Anuruddhā Tathāgatassa ye āsavā saṇkilesikā pono-bhavikā sadarā dukkha-vipākā āyatiṃ jāti-jarāmaraṇīyā.|| ||
Pahīnā te ucchinna-mūlā tālā-vatthu-katā anabhāva-katā1 āyatiṃ anuppāda-dhammā.|| ||
Tasmā Tathāgato saṇkhāy'ekaṃ paṭisevati||
saṇkhāy'ekaṃ adhivāseti||
saṇkhāy'ekaṃ parivajjeti||
saṇkhāy'ekaṃ vinodetī' ti.|| ||
Taṃ kim maññasi Anuruddhā?|| ||
Kaṃ attha-vasaṃ sampassamāno Tathāgato sāvake abbhatīte kāla-kate upapattīsu vyākaroti:|| ||
'Asu amutra upapanno||
asu amutra upapanno' ti?|| ||
[465] Bhagavam-mūlakā no bhante dhammā||
Bhagavan-nettikā||
Bhagavam-paṭisaraṇā.|| ||
Sādhu vata bhante Bhagavantaṃ yeva paṭibhātu etassa bhāsitassa attho.|| ||
Bhagavato sutvā bhikkhū dhāressan' ti.ti.|| ||
Na kho Anuruddhā Tathāgato janakuhanatthaṃ na janalapanatthaṃ na lābha-sakkāra-silokānisaṃsatthaṃ||
na iti maṃ jano jānātū'ti sāvake abbhatīte kāla-kate upapattīsu vyākaroti: 'asu amutra upapanno||
asu amutra upapanno' ti.|| ||
Santi ca kho Anuruddhā kula-puttā saddhā uḷāravedā uḷārapāmojjā1 'te taṃ sutvā tathattāya cittaṃ upasaṃharanti.|| ||
Tesantaṃ Anuruddhā hoti dīgha-rattaṃ hitāya sukhāya.|| ||
Idh'Ānuruddhā bhikkhu suṇāti: 'itthannāmo bhikkhu kāla-kato2 so Bhagavatā vyākato 'aññāya saṇṭhahī' ti.|| ||
So kho panassa āyasmā sāmaṃ diṭṭho vā hoti anussavasuto vā||
'evaṃsīlo so āyasmā ahosi iti pi||
evaṃ-dhammo so āyasmā ahosi iti pi||
evampañño so āyasmā ahosi iti pi||
evaṃvihārī so āyasmā ahosi iti pi||
evaṃ vimutto so āyasmā ahosi itipīti.|| ||
So tassa saddhañca sīlañca sutañ ca cāgañca paññañca anussaranto tathattāya [466] cittaṃ upasaṃharati.|| ||
Evam pi kho Anuruddhā bhikkhuno phāsu-vihāro hoti.|| ||
Idh'Ānuruddhā bhikkhu suṇāti: 'itthannāmo bhikkhu kāla-kato||
so Bhagavatā vyākato: pañcannaṃ oram-bhāgiyānaṃ saṃyojanānaṃ parikkhayā opapātiko tattha parinibbāyī anāvattidhammo tasmā lokā' ti.|| ||
So kho panassa āyasmā sāmaṃ diṭṭho vā hoti anussavasuto3 vā: 'evaṃsīlo so āyasmā ahosi iti pi||
evaṃ-dhammo so āyasmā ahosi iti pi||
evampañño so āyasmā ahosi iti pi||
evaṃvihārī so āyasmā ahosi iti pi||
evaṃ vimutto so āyasmā ahosi itipīti.|| ||
So tassa saddhañca sīlañca sutañ ca cāgañca paññañca anussaranto tathattāya cittaṃ upasaṃharati.|| ||
Evam pi kho Anuruddhā bhikkhuno phāsu-vihāro hoti.|| ||
Idh'Ānuruddhā bhikkhu suṇāti: 'itthannāmo bhikkhu kāla-kato||
so Bhagavatā vyākato tiṇṇaṃ saṃyojanānaṃ parikkhayā rāga-dosa-mohānaṃ tanuttā Sakad'āgāmī||
sakideva imaṃ lokaṃ āgantvā dukkhassantaṃ karissatī' ti.|| ||
So kho panassa āyasmā sāmaṃ diṭṭho vā hoti anussavasuto3 vā.|| ||
Evaṃsīlo so āyasmā ahosi iti pi||
evaṃ-dhammo so āyasmā ahosi iti pi||
evampañño so āyasmā ahosi iti pi||
evaṃvihārī so āyasmā ahosi iti pi||
evaṃ vimutto so āyasmā ahosi itipīti.|| ||
So tassa saddhañca sīlañca sutañ ca cāgañca paññañca anussaranto tathattāya cittaṃ upasaṃharati.|| ||
Evam pi kho Anuruddhā bhikkhuno phāsu-vihāro hoti.|| ||
Idh'Ānuruddhā bhikkhu suṇāti: 'itthannāmo bhikkhu kāla-kato||
so Bhagavatā vyākato tiṇṇaṃ saṃyojanānaṃ parikkhayā Sotāpanno avinipāta-dhammo niyato sambodhi-parāyaṇo' ti.|| ||
So kho panassa āyasmā sāmaṃ diṭṭho vā hoti anussavasuto vā: 'evaṃsīlo so āyasmā ahosi iti pi||
evaṃ-dhammo so āyasmā ahosi iti pi||
evampañño so āyasmā ahosi iti pi||
evaṃvihārī so āyasmā ahosi iti pi||
evaṃ vimutto so āyasmā ahosi itipīti.|| ||
So tassa saddhañca sīlañca sutañ ca cāgañca paññañca anussaranto tathattāya cittaṃ upasaṃharati.|| ||
Evam pi kho Anuruddhā bhikkhuno phāsu-vihāro hoti.|| ||
Idh'Ānuruddhā bhikkhunī suṇāti: 'itthannāmā bhikkhunī kāla-katā||
sā Bhagavatā vyākatā : 'aññāya saṇṭhahī' ti.|| ||
Sā kho panassā bhaginī sāmaṃ diṭṭhā vā hoti anussavasutā vā: 'evaṃsīlā sā bhaginī ahosi iti pi||
evaṃ-dhammā sā ahosi iti pi||
evampaññā sā bhaginī ahosi iti pi||
evaṃvihārinī sā bhaginī ahosi iti pi||
evaṃ vimuttā sā bhaginī ahosi itipīti.|| ||
Sā tassā saddhañca sīlañca sutañ ca cāgañca paññañca anussarantī tathattāya cittaṃ upasaṃharati.|| ||
Evam pi kho Anuruddhā bhikkhuniyā phāsu-vihāro hoti.|| ||
Idh'Ānuruddhā bhikkhunī suṇāti: 'itthannāmā bhikkhunī kāla-katā1||
sā Bhagavatā vyākatā pañcannaṃ oram-bhāgiyānaṃ saṃyojanānaṃ parikkhayā opapātikā tattha parinibbāyinī anāvatti-dhammā tasmā lokā' ti.|| ||
Sā kho panassā bhaginī sāmaṃ diṭṭhā vā hoti anussavasutā vā.|| ||
'Evaṃsīlā sā bhaginī ahosi iti pi||
evaṃ-dhammā sā ahosi iti pi||
evampaññā sā bhaginī ahosi iti pi||
evaṃvihārinī sā bhaginī ahosi iti pi||
evaṃ vimuttā sā bhaginī ahosi itipīti.|| ||
Sā tassa saddhañca sīlañca sutañ ca cāgañca paññañca anussarantī tathattāya cittaṃ upasaṃharati.|| ||
Evam pi kho Anuruddhā bhikkhuniyā phāsu-vihāro hoti.|| ||
Idh'Ānuruddhā bhikkhunī suṇāti: 'itthannāmā bhikkhunī kāla-katā||
sā Bhagavatā vyākatā: 'tiṇṇaṃ saṃyojanānaṃ parikkhayā rāga-dosa-mohānaṃ tanuttā Sakad-āgāminī||
sakideva imaṃ lokaṃ āgantvā dukkhassantaṃ karissatī' ti.|| ||
Sā kho panassā bhaginī sāmaṃ diṭṭhā vā hoti anussavasutā vā.|| ||
'Evaṃsīlā sā bhaginī ahosi iti pi||
evaṃ-dhammā sā ahosi iti pi||
evampaññā sā bhaginī ahosi iti pi||
evaṃvihārinī sā bhaginī ahosi iti pi||
evaṃ vimuttā sā bhaginī ahosi itipī' ti.ti.|| ||
Sā tassā saddhañca sīlañca sutañ ca cāgañca paññañca anussarantī tathattāya cittaṃ upasaṃharati.|| ||
Evam pi kho Anuruddhā bhikkhuniyā phāsu-vihāro hoti.|| ||
Idh'Ānuruddhā bhikkhunī suṇāti: 'itthannāmā bhikkhunī kāla-katā||
sā Bhagavatā vyākatā 'tiṇṇaṃ saṃyojanānaṃ parikkhayā Sot'āpannā avinipāta-dhammā niyatā sambodhi-parāyaṇā' ti.|| ||
[467] sā kho panassā bhaginī sāmaṃ diṭṭhā vā hoti anussavasutā vā.|| ||
'Evaṃsīlā sā bhaginī ahosi iti pi||
evaṃ-dhammā sā ahosi iti pi||
evaṃpaññā sā bhaginī ahosi iti pi||
evaṃvihārinī sā bhaginī ahosi iti pi||
evaṃ vimuttā sā bhaginī ahosi itipīti.|| ||
Sā tassa saddhañca sīlañca sutañ ca cāgañca paññañca anussarantī tathattāya cittaṃ upasaṃharati.|| ||
Evam pi kho Anuruddhā bhikkhuniyā phāsu-vihāro hoti.|| ||
Idh'Ānuruddhā upāsako suṇāti:'itthannāmo upāsako kāla-kato||
so Bhagavatā vyākato: pañcannaṃ oram-bhāgiyānaṃ saṃyojanānaṃ parikkhayā opapātiko tattha parinibbāyī anāvattidhammo tasmā lokā' ti.|| ||
So kho panassa āyasmā sāmaṃ diṭṭho vā hoti anussavasuto vā: 'evaṃsīlo so āyasmā ahosi iti pi.|| ||
Evaṃdhammo so āyasmā ahosi iti pi.|| ||
Evaṃpañño so āyasmā ahosi iti pi||
evaṃvihārī so āyasmā ahosi iti pi||
evaṃ vimutto so āyasmā ahosi itipīti.|| ||
So tassa saddhañca sīlañca sutañ ca cāgañca paññañca anussaranto tathattāya cittaṃ upasaṃharati.|| ||
Evam pi kho Anuruddhā upāsakassa phāsu-vihāro hoti.|| ||
Idh'Ānuruddhā upāsako suṇāti: 'itthannāmo upāsako kāla-kato||
so Bhagavatā vyākato: tiṇṇaṃ saṃyojanānaṃ parikkhayā rāga-dosa-mohānaṃ tanuttā Sakad'āgāmī||
sakideva imaṃ lokaṃ āgantvā dukkhassantaṃ karissatī' ti.|| ||
So kho panassa āyasmā sāmaṃ diṭṭho vā hoti anussavasuto vā: 'evaṃsīlo so āyasmā ahosi iti pi.|| ||
Evaṃdhammo so āyasmā ahosi iti pi.|| ||
Evaṃpañño so āyasmā ahosi iti pi||
evaṃvihārī so āyasmā ahosi iti pi||
evaṃ vimutto so āyasmā ahosi itipīti.|| ||
So tassa saddhañca sīlañca sutañ ca cāgañca paññañca anussaranto tathattāya cittaṃ upasaṃharati.|| ||
Evam pi kho Anuruddhā upāsakassa phāsu-vihāro hoti.|| ||
Idh'Ānuruddhā upāsako suṇāti: itthannāmo upāsako kāla-kato||
so Bhagavatā vyākato: 'tiṇṇaṃ saṃyojanānaṃ parikkhayā Sotāpanno avinipāta-dhammo niyato sambodhi-parāyaṇo' ti.|| ||
So kho panassa āyasmā sāmaṃ diṭṭho vā hoti anussavasuto vā: 'evaṃsīlo so āyasmā ahosi iti pi.|| ||
Evaṃdhammo so āyasmā ahosi iti pi.|| ||
Evaṃpañño so āyasmā ahosi iti pi||
evaṃvihārī so āyasmā ahosi iti pi||
evaṃ vimutto so āyasmā ahosi itipīti.|| ||
So tassa saddhañca sīlañca sutañ ca cāgañca paññañca anussaranto tathattāya cittaṃ upasaṃharati.|| ||
Evam pi kho Anuruddhā upāsakassa phāsu-vihāro hoti.|| ||
Idh'Ānuruddhā upāsikā suṇāti: 'itthannāmā upāsikā kāla-katā1 sā Bhagavatā vyākatā: pañcannaṃ oram-bhāgiyānaṃ saṃyojanānaṃ parikkhayā opapātikā tattha parinibbāyinī anāvatti-dhammā tasmā lokā' ti.|| ||
Sā kho panassā bhaginī sāmaṃ diṭṭhā vā hoti anussavasutā vā: 'evaṃsīlā sā bhaginī ahosi iti pi||
evaṃ-dhammā sā bhaginī ahosi iti pi||
evaṃpaññā sā bhaginī ahosi iti pi||
evaṃvihārinī [468] sā bhaginī ahosi iti pi||
evaṃ vimuttā sā bhaginī ahosi itipīti.|| ||
Sā tassā saddhañca sīlañca sutañ ca cāgañca paññañca anussarantī tathattāya cittaṃ upasaṃharati.|| ||
Evam pi kho Anuruddhā upāsikāya phāsu-vihāro hoti.
Idh'Ānuruddhā upāsikā suṇāti: 'itthannāmā upāsikā kāla-katā sā Bhagavatā vyākatā: 'tiṇṇaṃ saṃyojanānaṃ parikkhayā rāga-dosa-mohānaṃ tanuttā Sakad-āgāminī sakideva imaṃ lokaṃ āgantvā dukkhassantaṃ karissatī' ti.|| ||
Sā kho panassā bhaginī sāmaṃ diṭṭhā vā hoti anussavasutā vā: 'evaṃsīlā sā bhaginī ahosi iti pi||
evaṃ-dhammā sā bhaginī ahosi iti pi||
evaṃpaññā sā bhaginī ahosi iti pi||
evaṃvihārinī sā bhaginī ahosi iti pi||
evaṃ vimuttā sā bhaginī ahosi itipīti.|| ||
Sā tassa saddhañca sīlañca sutañ ca cāgañca paññañca anussarantī tathattāya cittaṃ upasaṃharati.|| ||
Evam pi kho Anuruddhā upāsikāya phāsu-vihāro hoti.|| ||
Idh'Ānuruddhā upāsikā suṇāti: 'itthannāmā upāsikā kāla-katā1 sā Bhagavatā vyākatā:'tiṇṇaṃ saṃyojanānaṃ parikkhayā Sot'āpannā avinipāta-dhammā niyatā sambodhi-parāyaṇā' ti.|| ||
Sā kho panassā bhaginī sāmaṃ diṭṭhā vā hoti anussavasutā vā: 'evaṃsīlā sā bhaginī ahosi iti pi||
evaṃ-dhammā sā bhaginī ahosi iti pi||
evaṃpaññā sā bhaginī ahosi iti pi||
evaṃvihārinī sā bhaginī ahosi iti pi||
evaṃ vimuttā sā bhaginī ahosi itipīti.|| ||
Sā tassā saddhañca sīlañca sutañ ca cāgañca paññañca anussarantī tathattāya cittaṃ upasaṃharati.|| ||
Evam pi kho Anuruddhā upāsikāya phāsu-vihāro hoti.|| ||
Iti kho Anuruddhā Tathāgato na janakuhanatthaṃ||
na janalapanatthaṃ||
na lābha-sakkāra-silokānisaṃsatthaṃ||
na iti maṃ jano jānātū'ti sāvake abbhatīte kāla-kate upapattīsu vyākaroti: 'asu amutra upapanno asū amutra upapanno' ti.|| ||
Santi ca kho Anuruddhā kula-puttā saddhā uḷāravedā uḷārapāmojjā.|| ||
Te taṃ sutvā tathattāya cittaṃ upasaṃharanti.|| ||
Tesaṃ taṃ Anuruddhā hoti dīgha-rattaṃ hitāya sukhāyāti.|| ||
Idam avoca Bhagavā.|| ||
Attamano āyasmā Anuruddho Bhagavato bhāsitaṃ 'abhinandī' ti.|| ||
Naḷakapāna Suttaṃ
