Majjhima Nikāya
II. Majjhima-Paṇṇāsa
5. Brāhmaṇa Vagga
Sutta 93
Assalāyana Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][chlm][pts][than][upal] Evaṃ me sutaṃ:|| ||
Ekaṃ samayaṃ Bhagavā Sāvatthīyaṃ viharati Jetavane Anāthapiṇḍikassa ārāme.|| ||
Tena kho pana samayena nānā-verajjakānaṃ brāhmaṇānaṃ pañca-mattāni brāhmaṇasatāni Sāvatthīyaṃ paṭivasanti kenacid-eva karaṇīyena.|| ||
Atha kho tesaṃ brāhmaṇānaṃ etad ahosi:|| ||
'Ayaṃ kho Samaṇo Gotamo cātuvaṇṇiṃ suddhiṃ paññāpeti ko nu kho pahoti samaṇena Gotamena saddhiṃ asmiṃ vacane patimantetun' ti.|| ||
Tena kho pana samayena Assalāyano nāma māṇavo Sāvatthīyaṃ paṭivasati daharo vuttasiro soḷāsavassuddesiko jātiyā,||
tiṇṇaṃ vedānaṃ pāragu sanighaṇḍukeṭubhānaṃ sākkhara-p-pabhe-dānaṃ itihāsa-pañca-mānaṃ padako veyyākaraṇo lokāyatamahā-purisa-lakkhaṇesu anavayo.|| ||
Atha kho tesaṃ brāhmaṇānaṃ etad ahosi:|| ||
'Ayaṃ kho Assalāyano māṇavo Sāvatthīyaṃ paṭivasati daharo vuttasiro soḷāsavassuddesiko jātiyā,||
tiṇṇaṃ vedānaṃ pāragu sanighaṇḍukeṭubhānaṃ sākkhara-p-pabhe-dānaṃ itihāsa-pañca-mānaṃ,||
padako veyyākaraṇo lokāyatamahā-purisa-lakkhaṇesu anavayo.|| ||
So kho pahoti samaṇena Gotamena saddhiṃ asmiṃ vacane patimantetun' ti.|| ||
Atha kho te brāhmaṇā yena Assalāyano māṇavo ten'upasaṇkamiṃsu,||
upasaṇkamitvā Assalāyanaṃ māṇavaṃ etad avocuṃ:|| ||
'Ayaṃ bho Assalāyana,||
Samaṇo Gotamo cātuvaṇṇiṃ suddhiṃ paññāpeti etu bhavaṃ Assalāyano samaṇena Gotamena saddhiṃ asmiṃ vacane patimantetu' ti.|| ||
Evaṃ vutte Assalāyano māṇavo te brāhmaṇe etad avoca: 'samaṇo khalu bho Gotamo dhamma-vādī,||
Dhamma-vādino ca pana duppatimantiyā bhavanti.|| ||
Nāhaṃ Sakkomi samaṇena Gotamena saddhiṃ asamiṃ vacane patimantetun' ti.|| ||
Dutiyam pi kho te brāhmaṇā Assalāyanaṃ māṇavaṃ etad avocuṃ:|| ||
'Ayaṃ bho Assalāyana,||
Samaṇo Gotamo cātuvaṇṇiṃ suddhiṃ paññāpeti.|| ||
Etu bhavaṃ Assalāyano samaṇena Gotamena [148] saddhiṃ asmiṃ vacane patimantetuṃ.|| ||
Caritaṃ kho pana bhotā Assalāyaṇena paribbājakan' ti.|| ||
Dutiyam pi kho Assalāyano māṇavo te brāhmaṇe etad avoca:|| ||
'Samaṇo khalu bho Gotamo Dhamma-vādi,||
Dhamma-vādino ca pana duppatimantiyā bhavanti.|| ||
Nāhaṃ Sakkomi samaṇena Gotamena saddhiṃ asmiṃ vacane patimantetun' ti.|| ||
Tatiyam pi kho te brāhmaṇā Assalāyanaṃ māṇavaṃ etad avocuṃ: 'ayaṃ bho Assalāyana Samaṇo Gotamo cātuvaṇṇiṃ suddhiṃ paññāpeti.|| ||
Etu bhavaṃ asasalāyano samaṇena Gotamena saddhiṃ asmiṃ vacane patimantetuṃ.|| ||
Caritaṃ kho pana bhotā Assalāyanena paribbājakaṃ,||
mā bhavaṃ Assalāyano ayuddhaparājitaṃ parājiyī' ti.|| ||
Evaṃ vutte Assalāyano māṇavo te brāhmaṇe etad avoca: 'addhā kho ahaṃ bhavanto1 na labhāmi.|| ||
Samaṇo khalu bho Gotamo Dhamma-vādi,||
Dhamma-vādino ca pana duppatimantiyā bhavanti.|| ||
Nāhaṃ Sakkomi samaṇena Gotamena saddhiṃ asmiṃ vacane patimantetuṃ.|| ||
Api c'āhaṃ bhavantānaṃ vacanena gamissāmi' ti.|| ||
Atha kho Assalāyano māṇavo mahatā brāhmaṇagaṇena saddhiṃ yena Bhagavā ten'upasaṇkami.|| ||
Upasaṇkamitvā Bhagavatā saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
Eka-m-antaṃ nisinno kho Assalāyano māṇavo Bhagavantaṃ etad avoca:|| ||
'Brāhmaṇā bho Gotama, evam āhaṃsu:|| ||
'Brāhmaṇāva seṭṭho vaṇṇo.|| ||
Hīno añño vaṇṇo.|| ||
Brāhmaṇāva sukko vaṇṇo,||
kaṇho añño vaṇṇo,||
brāhmaṇāva sujjhanti no abrāhmaṇā,||
brāhmaṇāva brahmuṇo puttā orasā mukhato jātā brahmajā brahmanimmitā brahmadāyādā' ti.|| ||
Idha bhavaṃ Gotamo kimāhā' ti?|| ||
Dissante kho pana Assalāyana,||
brāhmaṇānaṃ brāhmaṇiyo utuniyo pi gabhiniyo pi vijāya-mānā pi pāyamānā pi te ca brāhmaṇā,||
yonijāva samānā, evam āhaṃsu:|| ||
'Brāhmaṇāva seṭṭho vaṇṇo,||
hīno añño vaṇṇo.|| ||
Brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Kiñ cāpi bhavaṃ Gotamo evam āha.|| ||
Atha kho brāhmaṇā evam etaṃ maññanti.|| ||
'Brāhmaṇāva seṭṭho vaṇṇo hīno añño vaṇṇo.|| ||
Brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
|| ||
[149]Taṃ kiṃ maññasi Assalāyana,||
sutaṃ te:|| ||
'Yonakambojesu aññesu ca paccantimesu jana-padesu dveva vaṇṇā,||
ayyo c'eva dāso ca.|| ||
Ayyo hutvā dāso hoti,||
dāso hutvā ayyo hotī' ti.|| ||
Evaṃ bho sutaṃ me yonakambojesu aññesu ca paccantimesu jana-padesu dveva vaṇṇā ayyo c'eva dāso ca.|| ||
Ayyo hutvā dāso hoti,||
dāso hutvā ayyo ho' ti.ti.|| ||
Ettha Assalāyana brāhmaṇānaṃ kiṃ balaṃ ko assāso,||
yadettha brāhmaṇā evam āhaṃsu:|| ||
'Brāhmaṇāva seṭṭho vaṇṇo,||
hīno añño vaṇṇo,||
brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brahmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Kiñ cāpi bhavaṃ Gotamo evam āha.|| ||
Atha kho ettha brāhmaṇā evam etaṃ maññanti: 'brāhmaṇāva seṭṭho vaṇṇo hīno añño vaṇṇo,brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Taṃ kiṃ maññasi Assalāyana,||
khattiyova nu kho pāṇ-ā-tipāti adinn'ādāyi kāmesu micchā-cārī musā-vādi pisunā-vāco pharusā-vāco sampha-p-palāpi abhijjhālu vyāpanna-citto micchā-diṭṭhi,||
kāyassa bhedā param maraṇā,||
apāyaṃ duggatiṃ vinīpātaṃ Nirayaṃ upapa-j-jeyya,||
no brāhmaṇo vessova nu kho pāṇ-ā-tipātī adinn'ādāyī kāmesu micchā-cārī musā-vādī pisunā-vāco pharusā-vāco sampha-p-palāpī abhijjhālu vyāpanna-citto micchā-diṭṭhi,||
kāyassa bhedā param maraṇā,||
apāyaṃ duggatiṃ vinipātaṃ Nirayaṃ upapa-j-jeyya,||
no brāhmaṇo.|| ||
Suddova nu kho pāṇ-ā-tipātī adinn'ādāyī kāmesu micchā-cārī musā-vādī pisunā-vāco parusāvāco samphappalā pi abhijjhālu vyāpanna-citto micchā-diṭṭhi,||
kāyassa bhedā param maraṇā apāyaṃ duggatiṃ vinīpātaṃ Nirayaṃ upapa-j-jeyya,||
no brāhmaṇoti.|| ||
No h'idaṃ bho Gotama,||
khattiyopi hi bho Gotama,||
pāṇ-ā-tipātī adinn'ādāyī kāmesu micchā-cārī musā-vādī pisunā-vāco pharusā-vāco samphappalā pi abhijjhālu vyāpanna-citto micchā-diṭṭhi,||
kāyassa bhedā param maraṇā apāyaṃ duggatiṃ vinipātaṃ Nirayaṃ upapa-j-jeyya,||
brāhmaṇopi hi bho Gotama pāṇ-ā-tipātī|| ||
Adinn'ādāyī kāmesu micchā-cārī musā-vādī pisunā-vāco pharusā-vāco sampha-p-palāpi abhijjhālu vyāpanna-citto micchā-diṭṭhi,||
kāyassa bhedā param maraṇā apāyaṃ duggatiṃ vinipātaṃ Nirayaṃ upapa-j-jeyya,||
vessopi hi bho Gotama pāṇ-ā-tipātī|| ||
Adinn'ādāyī kāmesu micchā-cārī musā-vādī pisunā-vāco pharusā-vāco sampha-p-palāpi abhijjhālu vyāpanna-citto micchā-diṭṭhi,||
kāyassa bhedā param maraṇā apāyaṃ duggatiṃ vinipātaṃ Nirayaṃ upapa-j-jeyya,||
suddopi hi bho Gotama pāṇ-ā-tipātī|| ||
Adinn'ādāyī kāmesu micchā-cārī musā-vādī pisunā-vāco pharusā-vāco sampha-p-palāpi abhijjhālu vyāpanna-citto micchā-diṭṭhi,||
kāyassa bhedā param maraṇā apāyaṃ duggatiṃ vinipātaṃ Nirayaṃ upapa-j-jeyya,sabbepi hi bho Gotama,cattāro vaṇṇā pāṇ-ā-tipātī|| ||
Adinn'ādāyī [150] kāmesu micchā-cārī musā-vādī pisunā-vācā pharusā-vācā sampha-p-palāpī abhijjhālu vyāpanna-cittā micchā-diṭṭhī,||
kāyassa bhedā param maraṇā apāyaṃ duggatiṃ vinipātaṃ Nirayaṃ upapajjeyyun' ti.|| ||
Ettha Assalāyana,||
brāhmaṇānaṃ kiṃ balaṃ ko assāso,yadettha brāhmaṇā evam āhaṃsu: ' brāhmaṇāva seṭṭho vaṇṇo ,hīno añño vaṇṇo.|| ||
Brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Kiñ cāpi bhavaṃ Gotamo evam āha.|| ||
Atha kho ettha [151] brāhmaṇā evam etaṃ maññanti:|| ||
'Brāhmaṇāva seṭṭho vaṇṇo hīno añño vaṇṇo,brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Taṃ kiṃ maññasi Assalāyana,||
brāhmaṇova nu kho pāṇ-ā-tipātā paṭivirato adinn'ādānā paṭivirato kāmesu micchā-cārā paṭivirato musā-vāda paṭivirato pisunā-vācā paṭivirato pharusā-vācā paṭivirato sampha-p-palāpā paṭivirato anabhijjhālu avyāpanna-citto sammā-diṭṭhi kāyassa bhedā param maraṇā sugatiṃ saggaṃ lokaṃ upapa-j-jeyya.|| ||
No khattiyo,||
no vesso,||
no suddo' ti.|| ||
No h'idaṃ bho Gotama,||
khattiyopi hi bho Gotama,||
pāṇ-ā-tipātā paṭivirato adinn'ādānā paṭivirato kāmesu micchā-cārā paṭivirato musā-vādā paṭivirato pisunā-vācā paṭivirato pharusā-vācā paṭivirato sampha-p-palāpā paṭivirato anabhijjhālu avyāpanna-citto sammā-diṭṭhi kāyassa bhedā param maraṇā sugatiṃ saggaṃ lokaṃ upapa-j-jeyya.|| ||
No khattiyo,||
no vesso,||
no suddo' ti.|| ||
No h'idaṃ bho Gotama,||
brāhmaṇo pi hi bho Gotama,||
pāṇ-ā-tipātā paṭivirato adinn'ādānā paṭivirato kāmesu micchā-cārā paṭivirato musā-vādā paṭivirato pisunā-vācā paṭivirato pharusā-vācā paṭivirato sampha-p-palāpā paṭivirato anabhijjhālu avyāpanna-citto sammā-diṭṭhi kāyassa bhedā param maraṇā sugatiṃ saggaṃ lokaṃ upapa-j-jeyya.|| ||
No h'idaṃ bho Gotama,||
vessopi hi bho Gotama,||
pāṇ-ā-tipātā paṭivirato adinn'ādānā paṭivirato kāmesu micchā-cārā paṭivirato musā-vādā paṭivirato pisunā-vācā paṭivirato pharusā-vācā paṭivirato sampha-p-palāpā paṭivirato anabhijjhālu avyāpanna-citto sammā-diṭṭhi kāyassa bhedā param maraṇā sugatiṃ saggaṃ lokaṃ upapa-j-jeyya.|| ||
No h'idaṃ bho Gotama,||
suddopi hi bho Gotama,||
pāṇ-ā-tipātā paṭivirato adinn'ādānā paṭivirato kāmesu micchā-cārā paṭivirato musā-vādā paṭivirato pisunā-vācā paṭivirato pharusā-vācā paṭivirato sampha-p-palāpā paṭivirato anabhijjhālu avyāpanna-citto sammā-diṭṭhi kāyassa bhedā param maraṇā sugatiṃ saggaṃ lokaṃ upapa-j-jeyya.|| ||
No h'idaṃ bho Gotama,sabbepi hi bho Gotama,cattāro vaṇṇā pāṇ-ā-tipātā paṭiviratā adinn'ādānā paṭiviratā kāmesu micchā-cārā paṭiviratā musā-vādā paṭiviratā pisunā-vācā paṭiviratā pharusā-vācā paṭiviratā sampha-p-palāpā paṭiviratā anabhijjhālu avyāpanna-citto sammā-diṭṭhi kāyassa bhedā param maraṇā sugatiṃ saggaṃ lokaṃ upapajjeyyun' ti.|| ||
Ettha Assalāyana,||
brāhmaṇānaṃ kiṃ balaṃ ko assāso,yadettha brāhmaṇā evam āhaṃsu:
'Brāhmaṇāva seṭṭho vaṇṇo,||
hīno añño vaṇṇo.|| ||
Brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Kiñ cāpi bhavaṃ Gotamo evam āha.|| ||
Atha kho ettha brāhmaṇā evam etaṃ maññanti: 'brāhmaṇāva seṭṭho vaṇṇo hīno añño vaṇṇo,brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Taṃ kiṃ maññasi Assalāyana,||
brāhmaṇova nu kho pahoti asmiṃ padese averaṃ avyāpajjhaṃ mettaṃ cittaṃ bhāvetuṃ no khattiyo no vesso no suddo' ti.|| ||
No h'idaṃ bho Gotama,||
khattiyopi hi bho Gotama,||
pahoti asmiṃ padese averaṃ avyāpajjhaṃ mettaṃ cittaṃ bhāvetuṃ,||
brāhmaṇopi hi bho Gotama,||
pahoti asmiṃ padese averaṃ avyāpajjhaṃ mettaṃ cittaṃ bhāvetuṃ,vessopi hi bho Gotama,||
pahoti asmiṃ padese averaṃ avyāpajjhaṃ mettaṃ cittaṃ bhāvetuṃ,||
suddopi hi bho Gotama pahoti asmiṃ padese averaṃ avyāpajjhaṃ mettaṃ cittaṃ bhāvetuṃ,||
sabbepi hi bho gogatama,||
cattāro vaṇṇā pahonti asmiṃ padese averaṃ avyāpajjhaṃ mettaṃ cittaṃ bhāvetun' ti.|| ||
Ettha Assalāyana,brāhmaṇānaṃ kiṃ balaṃ ko assāso, yadettha brāhmaṇā evam āhaṃsu:|| ||
'Brāhmaṇāva seṭṭho vaṇṇo,||
hīno añño vaṇṇo.|| ||
Brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Kiñ cāpi bhavaṃ Gotamo evam āha.|| ||
Atha kho ettha brāhmaṇā evam etaṃ maññanti: 'brāhmaṇāva seṭṭho vaṇṇo,||
hīno añño vaṇṇo.|| ||
Brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Taṃ kiṃ maññasi Assalāyana,||
brāhmaṇova nu kho pahoti sottiṃ sināniṃ ādāya nadiṃ gantvā rajojallaṃ pavāhetuṃ,no khattiyo no vesso no suddo' ti.|| ||
No h'idaṃ bho Gotama,||
khattiyo pi hi bho Gotama,||
pahoti sottiṃ sināniṃ1 ādāya nadiṃ gantvā rajojallaṃ pavāhetuṃ,||
brāhmaṇopi hi bho Gotama,||
pahoti sottiṃ sināniṃ ādāya nadiṃ gantvā rajojallaṃ pavāhetuṃ,||
vessopi hi bho Gotama,||
pahoti sottiṃ sināniṃ ādāya nadiṃ gantvā rajojallaṃ pavāhetuṃ,||
suddopi hi bho Gotama,||
pahoti sottiṃ sināniṃ ādāya nadiṃ gantvā rajojallaṃ pavāhetuṃ,||
sabbepi hi bho Gotama,||
cattāro vaṇṇā pahonti sottiṃ sināniṃ ādāya nadiṃ gantvā rajojallaṃ pavāhetunti.|| ||
Ettha Assalāyana brāhmaṇānaṃ kiṃ balaṃ ko assāso,||
yadettha brāhmaṇā evam āhaṃsu:|| ||
'Brāhmaṇāva seṭṭho vaṇṇo,||
hīno añño vaṇṇo.|| ||
Brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Kiñ cāpi bhavaṃ Gotamo evam āha,||
atha kho ettha brāhmaṇā evam etaṃ maññanti:|| ||
'Brāhmaṇāva seṭṭho vaṇṇo,||
hīno añño vaṇṇo.|| ||
Brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Taṃ kiṃ maññasi Assalāyana, idha rājā khattiyo [152] muddhā-vasitto nānājaccānaṃ purisānaṃ purisasataṃ sannipāteyya: āyantu bhonto,||
ye tattha khattiyakulā brāhmaṇakulā rājaññakulā uppannā sālassa vā sala'assa vā candanassa vā padumassa vā uttarāraṇiṃ ādāya aggiṃ abhinibbattentu,||
tejo pātu-karontu,||
āyantu puna bhonto,||
ye tattha caṇḍālakulā nesādakulā veṇakulā rathakārakulā pukkusakulā uppannā sāpānadoṇiyā vā sūkaradoṇiyā vā rajakadoṇiyā vā eḷaṇḍakaṭṭhassa vā uttarāraṇiṃ ādāya aggiṃ abhinibbattentu,||
tejo pātu-karontu' ti.|| ||
Taṃ kiṃ maññasi Assalāyana yo evaṃ nu kho so khattiyakulā brāhmaṇakulā rājaññakulā uppannehi sālassa vā sala'assa vā candanassa vā padumassa vā uttarāraṇiṃ ādāya aggi abhinibbatto tejo pātukato,||
so evanukhvāssa aggi accimā ca vaṇṇavā ca pabhassaro ca.|| ||
Tena ca sakkā agginā aggikaraṇīyaṃ kātuṃ.|| ||
Yo pana so caṇḍālakulā nesādakulā veṇakulā rathakārakulā pukkusakulā uppannehi sāpānadoṇiyā vā sūkaradoṇiyā vā rajakadoṇiyā vā eḷaṇḍakaṭṭhassa vā uttarāraṇiṃ ādāya aggi abhinibbatto tejo pātukato,||
svāssa aggi na c'eva accimā,||
na ca vaṇṇavā,||
na ca pabhassaro,||
na ca tena sakkā agginā aggikaraṇīyaṃ kātun' ti.|| ||
No h'idaṃ bho Gotama,||
yo so bho Gotama,||
khattiyakulā brāhmaṇakulā rājaññakulā uppannehi sālassa vā sala'assa vā candanassa vā padumassa vā uttarāraṇiṃ ādāya aggi abhinibbatto tejo pātukato,||
svāssa aggi accimā ca vaṇṇavā ca pabhassaro ca.|| ||
Tena ca sakkā agginā aggikaraṇiyaṃ kātuṃ.|| ||
Yo pi so caṇḍālakulā nesāda kulā veṇakulā rathakārakulā pukkusakulā uppannehi sāpānadoṇiyā vā sūkaradoṇiyā vā rajakadoṇiyā vā eḷaṇḍakaṭṭhassa vā uttarāraṇiṃ ādāya aggi abhinibbatto tejo pātukato,||
so c'assa agginā accimā ca vaṇṇavā,||
ca pabhassaro ca,||
tena ca sakkā agginā aggikaraṇīyaṃ kātuṃ sabbopi hi bho Gotama,||
aggi accimā [153] ca vaṇṇavā ca pabhassaro ca sabbena pi ca sakkā agginā aggikaraṇīyaṃ kātun' ti.|| ||
Ettha Assalāyana,||
brāhmaṇānaṃ kiṃ balaṃ ko assāso,||
yadettha brāhmaṇā evam āhaṃsu: brāhmaṇāva seṭṭho vaṇṇo,||
hīno añño vaṇṇo brāhmaṇāva sukko vaṇṇo,||
kaṇho añño vaṇaṇo.|| ||
Brāhmaṇāva sujjhanti no abrāhmaṇā.|| ||
Brāhamaṇāva brahmuno puttā orasā mukhato jātā brahmajā brahmanimmitā brahmadāyādāti.|| ||
Kiñ cāpi bhavaṃ Gotamo evam āha, atha kho ettha brāhmaṇā evam etaṃ maññanti:|| ||
'Brāhmaṇāva seṭṭho vaṇṇo,||
hīno añño vaṇṇo.|| ||
Brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Taṃ kiṃ maññasi Assalāyana,||
idha khattiya-kumāro brāhmaṇa-kaññāya saddhiṃ saṃvāsaṃ kappeyya.|| ||
Tesaṃ saṃvāsamanvāya putto jāyetha,||
yo so khattikumārena brāhmaṇa-kaññāya putto uppanno siyā,||
so mātupi sadiso.|| ||
Pitupi sadiso 'khattiyo' tipi vattabbo 'brāhmaṇo' tipi vattabbo' ti.|| ||
Yo so bho Gotama,||
khattiya-kumārena brāhmaṇa-kaññāya putto uppanno siyā,||
so mātupi sadiso, pitu pi sadiso,||
'khattiyo' ti pi vattabbo,||
brāhmaṇo' ti pi vattabboti.|| ||
Taṃ kiṃ maññasi Assalāyana,||
idha brāhmaṇa-kumāro khattiya-kaññāya saddhiṃ saṃvāsaṃ kappeyya.|| ||
Tesaṃ saṃvāsamanvāya putto jāyetha.|| ||
Yo so brāhmaṇa-kumārena khattiya-kaññāya putto uppanno siyā,||
so mātupi sadiso,||
pitu pi sadiso,||
khattiyoti pi vattabbo,||
brāhmaṇotipi vattabbo' ti.|| ||
Yo so bho Gotama,||
brāhmaṇa-kumārena khattiya-kaññāya putto uppanno siyā,||
so mātu pi sadiso,||
pitu pi sadiso,||
khattiyo ti pi vattabbo,||
brāhmaṇoti pi vattabbo' ti.|| ||
Taṃ kiṃ maññasi Assalāyana,||
idha vaḷavaṃ gadrabhena sampayojeyyuṃ?|| ||
Tesaṃ sampayogamanvāya kisoro jāyetha.|| ||
Yo so vaḷavāya gadrabhena kisoro uppanno siyā,||
so mātu pi sadiso pitu pi sadiso,||
assoti vattabbo,||
gadrabhoti vattabbo' ti.|| ||
Vekurañjāya hi so bho Gotama,||
assataro hoti.|| ||
Idaṃ [154] hi'ssa bho Gotama,||
nānā-karaṇaṃ passāmi.|| ||
Amutra ca pan'esānaṃ2 na kiñci nānā-karaṇaṃ3 passāmī ti.|| ||
Taṃ kiṃ maññasi Assalāyana,||
idhassu dve māṇavakā bhātaro saudariyā,||
eko ajjhāyako upanīto,||
eko anajjhāyako anupanīto.|| ||
Kamettha brāhmaṇā paṭhamaṃ bhojeyyuṃ saddhe vā thālipāke vā yaññe vā pāhune4 vāti?|| ||
Yo so bho Gotama,||
māṇavako ajjhāyako upanīto tamettha brāhmaṇā paṭhamaṃ bhojeyyuṃ saddhe vā thālipāke vā yaññe vā pāhune vā.|| ||
Kiṃ hi bho Gotama,||
anajjhāyake anupanīte dinnaṃ maha-p-phalaṃ bhavissatī' ti?|| ||
Taṃ kiṃ maññasi Assalāyana,||
idhassu dve māṇavakā bhātaro saudariyā,||
eko ajjhāyako upanīto du-s-sīlo pāpa-dhammo,||
eko anajjhāyako anupanīto sīlavā kalyāṇa-dhammo.|| ||
Kamettha brāhmaṇā paṭamaṃ bhojeyyuṃ saddhe vā thālipāke vā yaññe vā pāhune vā ti?|| ||
Yo so bho Gotama,||
māṇavako anajjhāyako anupanīto sīlavā kalyāṇa-dhammo,||
tamettha brāhmaṇā paṭhamaṃ bhojeyyuṃ saddho vā thālipāke vā yaññe vā pāhune vā.|| ||
Kiṃ hi bho Gotama,||
du-s-sīle papadhamme dinnaṃ maha-p-phalaṃ bhavissa' ti?|| ||
Pubbe kho tvaṃ Assalāyana,||
jātiṃ agamāsi.|| ||
Jātiṃ gantvā mante agamāsi.|| ||
Mante gantvā tape agamāsi.|| ||
Tape gantvā cātuvaṇṇiṃ suddhiṃ paccāgato yam ahaṃ paññāpemī' ti.|| ||
Evaṃ vute Assalāyano māṇavo tuṇhī-bhūto maṇku-bhūto patta-k-khandho adho-mukho pajjhāyanto appaṭibhāno nisīdi.|| ||
Atha kho Bhagavā Assalāyanaṃ māṇavaṃ tuṇhī-bhūtaṃ maṇku-bhūtaṃ patta-k-khandhaṃ adho-mukhaṃ pajjhāyan taṃ appaṭibhānaṃ viditvā Assalāyanaṃ māṇavaṃ etad avoca.|| ||
Bhūta-pubbaṃ Assalāyana,||
sattannaṃ brāhmaṇisīnaṃ araññāyatane paṇṇakuṭīsu sammantānaṃ eva-rūpaṃ pāpakaṃ diṭṭhi-gataṃ uppannaṃ hoti: brāhmaṇāva seṭṭho vaṇṇo,||
hīno [155] añño vaṇṇo,||
brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Assosi kho Assalāyana,||
asito devalo isi sattannaṃ kira brāhmaṇisīnaṃ araññāyatane paṇṇa-kuṭisu sammantānaṃ eva-rūpaṃ pāpakaṃ diṭṭhi-gataṃ uppannaṃ hoti:brāhmaṇāva seṭṭho vaṇṇo hīno añño vaṇṇo brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti no abrāhmaṇā,||
brāhmaṇāva brahmuno puttā orasā mukhato jātā brahmajā brahmanimmitā brahmadāyādā' ti.|| ||
Atha kho Assalāyana,||
asito devalo isi kesa-massuṃ kappetvā mañjeṭṭhavaṇṇāni dussāni nivāsetvā aṭaliyo upāhanā āruhitvā jāta-rūpamayaṃ daṇḍaṃ gahetvā sattannaṃ brāhmaṇisīnaṃ patthaṇḍile pātu-r-ahosi.|| ||
Atha kho Assalāyana,||
asito devalo isi sattannaṃ brāhmaṇisīnaṃ patthaṇḍile caṇkamamāno evam āha: handa kva nu kho ime bhavante brāhmaṇisayo gatā.|| ||
Handa kva nu kho ime bhavanto brāhmaṇisayo gatā'ti atha kho Assalāyana,sattannaṃ brāhmaṇisīnaṃ etad ahosi: konāyaṃ gāmaṇḍalarūpo viya sattannaṃ brāhmaṇisīnaṃ patthaṇḍile caṇkamamāno evam āha: handa kva nu kho ime bhavanto brāhmaṇisayo gatā,||
handa kva nu kho ime bhavanto brāhmaṇisayo gatā' ti.|| ||
Handanaṃ abhisapāmāti.|| ||
Atha kho Assalāyana,||
sattabrāhmaṇisayo asitaṃ devalaṃ isiṃ abhisapiṃsu: bhasmā vasala hohīti5.|| ||
Yathā yathā kho Assalāyana,||
satta brāhmaṇisayo asitaṃ devalaṃ isiṃ abhisapiṃsu.|| ||
Tathā tathā asito devalo isi abhirūpataro c'eva hoti dassanīyataro ca pāsādikataro ca.|| ||
Atha kho Assalāyana,||
sattannaṃ brāhmaṇisīnaṃ etad ahosi: moghaṃ vata no tapo,||
aphalaṃ Brahma-cariyaṃ,||
mayaṃ hi pubbe yaṃ abhisapāma bhasmā vasala hohī'ti bhasmāva bhavati ekacco.|| ||
Imaṃ pana mayaṃ yathā yathā abhisapāma,||
tathā tathā abhirūpataro c'eva hoti dassanīyataro ca pāsādikataro cā' ti.|| ||
Na bhavantānaṃ moghaṃ tapo,||
nāphalaṃ6 Brahma-cariyaṃ.|| ||
Iṇgha bhavanto yo mayi manopadoso,||
taṃ pajahathāti.|| ||
[156]Yo bhavati manopadoso taṃ pajahāma.|| ||
Ko nu kho bhavaṃ hotī ti?|| ||
Suto no bhavataṃ asito devalo isi' ti?|| ||
Evaṃ bho.|| ||
So khv'āhaṃ homiti.|| ||
Atha kho Assalāyana,||
satta brāhmaṇisayo asitaṃ devalaṃ isiṃ abhivādetuṃ upasaṇkamiṃsu.|| ||
Atha kho Assalāyana,||
asito devalo isi satta brāhmaṇisayo etad avoca:|| ||
'Sutaṃ me taṃ bho,||
sattannaṃ kira brāhmaṇisīnaṃ araññāyatane paṇṇakuṭīsu vasantānaṃ eva-rūpaṃ pāpakaṃ diṭṭhi-gataṃ uppannaṃ: 'brāhmaṇāva seṭṭho vaṇṇo,||
hīno añño vaṇṇo.|| ||
Brāhmaṇāva sukko vaṇṇo,||
kaṇho añño vaṇṇo.|| ||
Brāhmaṇāva sujjhanti,||
no abrāhmaṇā.|| ||
Brāhmaṇāva brahmuno puttā orasā mukhato jātā brahmajā brahmanimmitā brahmadāyādāti.|| ||
Evam bho|| ||
Jānanti pana bhonto yā janikā mātā brāhmaṇaṃ yeva agamāsi.|| ||
No abrāhmaṇanti.|| ||
No h'idaṃ bho.|| ||
Jānanti pana bhonto yā janikāmātumātā yāva sattamā mātāmahayugā brāhmaṇaṃ yeva agamāsi,||
no abrāhmaṇanti.|| ||
No h'idaṃ bho.|| ||
Jānanti pana bhonto yo janako pitā brāhmaṇiṃ yeva agamāsi no abrāhmaṇinti.|| ||
No h'idaṃ bho.|| ||
Jānanti pana bhonto yo janakapitupitā yāvasattamā pitā-mah'ayugā brāhmaṇiṃ yeva agamāsi,||
no abrāhmaṇinti.|| ||
No h'idaṃ bho.|| ||
Jānanti pana bhonto yathā gabbhassa avakkanti hotī ti?|| ||
Jānāma mayaṃ bho yathā gabbhassa avakkanti hoti.|| ||
[157] idha mātā-pitaroca sanni-patitā honti.|| ||
Mātā ca utunī hoti,||
gandhabbo ca pacc'upaṭṭhito hoti.|| ||
Evaṃ tiṇṇaṃ sannipātā gabbhassa avakkanti hotī ti.|| ||
Jānanti pana bhonto yagghe so gandhabbo khattiyo vā brāhmaṇo vā vesso vā suddo vāti?|| ||
Na mayaṃ bho,||
jānāma yagghe so gandhabbo khattiyo vā brahmaṇo vā vesso vā suddo vāti.|| ||
Evaṃ sante bho jānātha ke tumhe hothāti1|| ||
Evaṃ sante bho,||
na mayaṃ jānāma ke ca mayaṃ homāti.|| ||
Tehi nāma Assalāyana,||
satta brāhmaṇisayo asitena devalena isinā sake jātivāde samanuyuñjiyamānā samanubhāsiyamānā samanugāhiyamānā na sampāyissanti.|| ||
Kiṃ pana tvaṃ etarahī mayā sakasmiṃ jātivāde samanuyuñjiyamāno samanubhāsiyamāno samanugāhiyamāno sampāyissasi.|| ||
Yesaṃ tvaṃ sācariyako na puṇṇo dabbigāhoti.|| ||
Evaṃ vutte Assalāyano māṇavo Bhagavantaṃ etad avoca: acchariyambhante,||
abbhūtambhante.|| ||
Kappiyaṃ vata bhante bhikkhū āhāraṃ āhārenti.|| ||
Anavajjaṃ vata bhante bhikkhū āhāraṃ āhārenti.|| ||
Abhikkantaṃ bho Gotama abhikkantaṃ bho Gotama,||
seyyathā pi bho Gotama nikkujjitaṃ vā ukkujjeyya,||
paṭi-c-channaṃ vā vivareyya,mūḷhassa vā Maggaṃ ācikkheyya' andha-kāre vā tela-pajjotaṃ dhāreyya,||
'cakkhu-manto rūpāni dakkhintī'ti,||
evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ Bhagavantaṃ Gotamaṃ saraṇaṃ gacchāmi Dhammañ ca bhikkhu-saṇghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatanti.|| ||
Assalāyana Suttaṃ
