Majjhima Nikāya
III. Upari Paṇṇāsa
4. Vibhaṇga Vagga
Sutta 132
Ānanda Bhadd'Eka-Ratta Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][chlm][pts][upal] Evaṃ me sutaṃ:
Ekaṃ samayaṃ Bhagavā Sāvatthīyaṃ viharati Jetavane Anāthapiṇḍikassa ārāme. Tena kho pana samayen'āyasmā Ānando upaṭṭhāna-sālayaṃ bhikkhū1 dhammiyā kathāya sandasseti. Samādapeti samuttejeti [190] samp'ahaṃseti bhaddekarattassa uddesañca vibhaṇgañca bhāsati.|| ||
Atha kho Bhagavā sāyaṇha-samayaṃ patisallānaṃ vuṭṭhito yena upaṭṭhānasālā, ten'upasaṇkami. Upasaṇkamitvā paññatte āsane nisīdi. Nisajja kho Bhagavā bhikkhū āmantesi 'ko nu kho bhikkhave upaṭṭhāna-sālāyaṃ bhikkhū1 dhammiyā kathāya sandassesi samādapesi samuttejesi samp'ahaṃsesi bhaddekarattassa uddesañca vibhaṇgañca abhāsī' ti.|| ||
Āyasmā bhante, Ānando upāṭṭhānasālāyaṃ bhikkhū dhammiyā kathāya sandassesi samādapesi samuttejesi samp'ahaṃsesi bhaddekarattassa uddesañca vibhaṇgañca abhāsī' ti.|| ||
Atha kho Bhagavā āyasmantaṃ Ānandaṃ āmantesi 'yathā kathaṃ pana tvaṃ Ānanda, bhikkhū dhammiyā kathāya sandassesi samādapesi samuttejesi samp'ahaṃsesi bhaddekarattassa uddesañca vibhaṇgañca abhāsī' ti?|| ||
Evaṃ kho ahaṃ bhante, bhikkhū dhammiyā kathāya sandassesiṃ samādapesiṃ samuttejesiṃ samp'ahaṃsesiṃ bhaddekarattassa uddesañca vibhaṇgañca abhāsiṃ:|| ||
Atītaṃ nānvāgameyya nappaṭikaṇkhe anāgataṃ,||
Yadatītaṃ pahīnaṃ taṃ appattañ ca anāgataṃ.|| ||
Paccuppannañca yo dhammaṃ tattha tattha vipassati,||
Asaṃhīraṃ asaṇkuppaṃ taṃ vidvā manubrūhaye.|| ||
Ajjeva kiccaṃ ātappaṃ ko jaññā maraṇaṃ suve,||
Na hi no saṇgāraṃ tena mahāsenena maccunā.|| ||
Evaṃ vihāriṃ ātāpiṃ ahorattamatanditaṃ,||
Taṃ ve bhaddekarattoti santo ācikkhate munīti.|| ||
Kathañcāvuso atītaṃ anvāgameti: eva-rūpo ahosiṃ atītam addhānanti tattha nandiṃ samanvāneti. Evaṃvedano ahosiṃ atītam addhānanti tattha nandiṃ samanvāneti. Evaṃsañño ahosiṃ atītam addhānanti tattha nandiṃ samanvāneti. Evaṃsaṇkhāro ahosiṃ atītam addhānanti tattha nandiṃ samanvāneti. Evaṃviññāṇo ahosiṃ atītam addhānanti tattha nandiṃ samanvāneti. Evaṃ kho āvuso atītaṃ anvāgameti.|| ||
Kathañcāvuso atītaṃ nānvāgameti: evaṃ-rūpo ahosiṃ atītam addhānanti tattha nandiṃ na samanvāneti. Evaṃvedano ahosiṃ atītam addhānanti tattha nandiṃ na samanvāneti. Evaṃsañño ahosiṃ atītam addhānanti tattha nandiṃ na samanvāneti. Evaṃsaṇkhāro ahosiṃ atītam addhānanti tattha nandiṃ na samanvāneti. Evaṃviññāṇo ahosiṃ atītam addhānanti tattha nandiṃ na samanvāneti. Evaṃ kho āvuso atītaṃ nānvāgameti.|| ||
Kathañcāvuso anāgataṃ paṭikaṇkhati: eva-rūpo siyaṃ anāgatam addhānanti tattha nandiṃ samanvāneti. Evaṃvedano siyaṃ anāgatam addhānanti tattha nandiṃ samanvāneti.|| ||
Evaṃsañño siyaṃ anāgatam addhānanti tattha nandiṃ samanvāneti. Evaṃsaṇkhāro siyaṃ anāgatam addhānanti tattha nandiṃ samanvāneti. Evaṃviññāṇo siyaṃ anāgatam addhānanti tattha nandiṃ samanvāneti. Evaṃ kho āvuso anāgataṃ paṭikaṇkhati.|| ||
Kathañcāvuso anāgataṃ nappaṭikaṇkhati: evaṃ-rūpo siyaṃ anāgatam addhānanti tattha nandiṃ na samanvāneti. Evaṃvedano siyaṃ anāgatam addhānanti tattha nandiṃ na samanvāneti. Evaṃsañño siyaṃ anāgatam addhānanti tattha nandiṃ na samanvāneti. Evaṃsaṇkhāro siyaṃ anāgatam addhānanti tattha nandiṃ na samanvāneti. Evaṃviññāṇo siyaṃ anāgatam addhānanti tattha nandiṃ na samanvāneti. Evaṃ kho āvuso anāgataṃ nappaṭikaṇkhati1.|| ||
Kathañcāvuso pacc'uppannesu dhammesu saṃhīrati: idh'āvuso a-s-sutavā puthujjano ariyānaṃ adassāvī ariya-Dhammassa akovido ariya-Dhamme avinīto sappurisānaṃ adassāvī sappurisa-Dhammassa akovido sappurisa-Dhamme avinīto rūpaṃ attato samanupassati, rūpavantaṃ vā attāṇaṃ, attani vā rūpaṃ, rūpasmiṃ vā attāṇaṃ. Vedanaṃ attato samanupassati, vedanā-vantaṃ vā attāṇaṃ, attani vā vedanaṃ, vedanāya vā attāṇaṃ. Saññaṃ attato samanupassati, saññā-vantaṃ vā attāṇaṃ, attani vā saññaṃ, saññāya vā attāṇaṃ. Saṇkhāre attato samanupassati, saṇkāravantaṃ vā attāṇaṃ, attani vā saṇkhāre, saṇkhāresu vā attāṇaṃ. Viññāṇaṃ attato samanupassati, viññāṇa-vantaṃ vā attāṇaṃ, attani vā viññāṇaṃ, viññāṇasmiṃ vā attāṇaṃ. Evaṃ kho āvuso pacc'uppannesu dhammesu saṃhīrati.|| ||
Kathañcāvuso, pacc'uppannesu dhammesu na saṃhīrati: idh'āvuso, sutavā ariya-sāvako ariyānaṃ dassāvi ariya-Dhammassa kovido ariya-Dhamme suvinīto2 sappurisānaṃ dassāvī sappurisa-Dhammassa kovido sappurisa-Dhamme suvinīto2 na rūpaṃ attato samanupassati. Na rūpavantaṃ vā attāṇaṃ, nāttani vā rūpaṃ na rūpasmiṃ vā attāṇaṃ. Na vedanaṃ attato samanupassati, vedanā-vantaṃ vā attāṇaṃ, na attani vā vedanaṃ, na vedanāya vā attāṇaṃ. Na saññaṃ attato samanupassati, na saññā-vantaṃ vā attāṇaṃ, na attani vā saññaṃ, na saññāya vā attāṇaṃ. Na saṇkhāre attato samanupassati, na saṇkāravantaṃ vā attāṇaṃ, na attani vā saṇkhāre, na saṇkhāresu vā attāṇaṃ. Na viññāṇaṃ attato samanupassati, na viññāṇa-vantaṃ vā attāṇaṃ, na attani vā na viññāṇaṃ, na viññāṇasmiṃ vā attāṇaṃ. Evaṃ kho āvuso pacc'uppannesu dhammesu na saṃhīrati. [191] atītaṃ nānvāgameyya nappaṭikaṇkhe anāgataṃ, yadatītaṃ pahīnaṃ taṃ appattañ ca anāgataṃ.|| ||
Paccuppannañca yo dhammaṃ tattha tattha vipassati,||
Asaṃhīraṃ asaṇkuppaṃ taṃ vidvā manubrūhaye.|| ||
Ajjeva kiccaṃ ātappaṃ ko jaññā maraṇaṃ suve,||
Na hi no saṇgāraṃ tena mahāsenena maccunā.|| ||
Evaṃ vihāriṃ ātāpiṃ ahorattamatanditaṃ,||
Taṃ ve bhaddekarattoti santo ācikkhate munīti.|| ||
Evaṃ kho ahaṃ bhante, bhikkhū dhammiyā kathāya sandassesiṃ samādapesiṃ samuttejesiṃ samp'ahaṃsesiṃ, bhaddekarattassa uddesañca vibhaṇgañca abhāsinti.|| ||
Sādhu sādhu Ānanda sādhu kho tvaṃ Ānanda bhikkhū dhammiyā kathāya sandassesi samādapesi samuttejesi samp'ahaṃsesi. Bhaddekarattassa uddesañca vibhaṇgañca abhāsi.|| ||
Atītaṃ nānvāgameyya nappaṭikaṇkhe anāgataṃ,||
Yadatītaṃ pahīnaṃ taṃ appattañ ca anāgataṃ.|| ||
Paccuppannañca yo dhammaṃ tattha tattha vipassati||
Asaṃhīraṃ asaṇkuppaṃ taṃ vidvā manubrūhaye.|| ||
Ajjeva kiccaṃ ātappaṃ ko jaññā maraṇaṃ suve,||
Na hi no saṇgāraṃ tena mahāsenena maccunā.|| ||
Evaṃ vihāriṃ ātāpiṃ ahorattamatanditaṃ,||
Taṃ ve bhaddekarattoti santo ācikkhate munīti.|| ||
KathañcĀnanda, atītaṃ anvāgameti?|| ||
Evaṃ rūpo ahosiṃ atītam addhānanti tattha nandiṃ samanvāneti. Evaṃvedano ahosiṃ atītam addhānanti tattha nandiṃ samanvāneti. Evaṃsañño ahosiṃ atītam addhānanti tattha nandiṃ samanvāneti. Evaṃsaṇkhāro ahosiṃ atitamaddhānanti tattha nandiṃ samanvāneti. Evaṃviññāṇo ahosiṃ atītāmaddhānanti tattha nandiṃ samanvāneti. Evaṃ kho Ānanda atītaṃ anvāgameti.|| ||
KathañcĀnanda, atītā nānvāgameti?|| ||
Evaṃrūpo ahosiṃ atītam addhānanti tattha nandiṃ na samanvāneti. Evaṃvedano ahosiṃ atitamaddhānanti tattha nandiṃ na samanvāneti. Evaṃsañño ahosiṃ atītam addhānanti tattha nandiṃ na samanvāneti. Evaṃsaṇkhāro ahosiṃ atītam addhānanti tattha nandiṃ na samanvāneti. Evaṃviññāṇo ahosiṃ atītam addhānanti tattha nandiṃ na samanvāneti. Evaṃ kho Ānanda, atitaṃ nānvāgameti.|| ||
KatañcĀnanda, anāgataṃ paṭikaṇkhati?|| ||
Evaṃrūpo siyaṃ anāgatam addhānanti tattha nandiṃ samanvāneti. Evaṃvedano siyaṃ anāgatam addhānanti tattha nandiṃ samanvāneti. Evaṃsañño siyaṃ anāgatam addhānanti tattha nandiṃ samanvāneti. Evaṃsaṇkhāro siyaṃ anāgatam addhānanti tattha nandiṃ samanvāneti. Evaṃviññāṇo siyaṃ anāgatam addhānanti tattha nandiṃ samanvāneti. Evaṃ kho Ānanda, anāgataṃ paṭikaṇkhati.|| ||
KathañcĀnanda, anāgataṃ nappaṭikaṇkhati?|| ||
Evaṃrūpo siyaṃ anāgatmaddhānanti tattha nandiṃ na samanvāneti. Evaṃvedano siyaṃ anāgatam addhānanti tattha nandiṃ na samanvāneti. Evaṃsañño siyaṃ anāgatmaddhānanti tattha nandiṃ na samanvāneti. Evaṃsaṇkhāro siyaṃ anāgatam addhānanti tattha nandiṃ na samanvāneti. Evaṃviññāṇo siyaṃ anāgatmaddhānanti tattha nandiṃ na samanvāneti. Evaṃ kho Ānanda, anāgataṃ nappaṭikaṇkhati.|| ||
KathañcĀnanda, pacc'uppannesu dhammesu saṃhīrati: idha bhikkhave a-s-sutavā puthujjano ariyānaṃ adassāvī ariya-Dhammassa akovido ariya-Dhamme avinīto sappurisānaṃ adassāvī sappurisa-Dhammassa akovido sappurisa-Dhamme avinīto rūpaṃ attato samanupassati, rūpavantaṃ vā attāṇaṃ, attani vā rūpaṃ, rūpasmiṃ vā attāṇaṃ.Vedanaṃ attato samanupassati, vedanā-vantaṃ vā attāṇaṃ, attani vā vedanaṃ. Vedanāya vā attāṇaṃ. Saññaṃ attato samanupassati, saññavantaṃ vā attāṇaṃ, attani vā saññaṃ, saññāya vā attāṇaṃ. Saṇkhāre attato samanupassati, saṇkhāra-vantaṃ vā attāṇaṃ, attani vā saṇkhāre, saṇkhāresu vā attāṇaṃ. Viññāṇaṃ attato samanupassati viññāṇa-vantaṃ vā attāṇaṃ, attani vā viññāṇaṃ, viññāṇasmiṃ vā attāṇaṃ. Evaṃ kho Ānanda, pacc'uppannesu dhammesu saṃhīrati.|| ||
KathañcĀnanda, pacc'uppannesu dhammesu na saṃhīrati: idha bhikkhave sutavā ariya-sāvako ariyānaṃ dassāvī ariya-Dhammassa kovido ariya-Dhamme suvinīto sappurisānaṃ dassāvī sappurisa-Dhammassa kovido sappurisa-Dhamme suvinīto na rūpaṃ attato samanupassati. Na rūpavantaṃ vā attāṇaṃ, na attanī vā rūpaṃ, na rūpasmiṃ vā attāṇaṃ, na vedanaṃ attato samanupassati. Na vedavantaṃ vā attāṇaṃ, na attani vā vedanaṃ, na vedanāya vā attāṇaṃ. Na saññaṃ attato samanupassati, na saññā-vantaṃ vā attāṇaṃ, na attani vā saññaṃ, na saññāya vā attāṇaṃ. Na saṇkhāre attato samanupassati, na saṇkhāra-vantaṃ vā attāṇaṃ, na attani vā saṇkhāre, na saṇkhāresu vā attāṇaṃ. Na viññāṇaṃ attato samanupassati na viññāṇa-vantaṃ vā attāṇaṃ, na attani vā viññāṇaṃ, na viññāṇasmiṃ vā attāṇaṃ.Evaṃ kho Ānanda, pacc'uppannesu dhammesu na saṃhīrati.|| ||
Atītaṃ nānvāgameyya nappaṭikaṇkhe anāgataṃ,||
Yadatītaṃ pahīnaṃ taṃ appattañ ca anāgataṃ.|| ||
Paccuppannañca yo dhammaṃ tattha tattha vipassati,||
Asaṃhīraṃ asaṇkuppaṃ taṃ vidvā manubrūhaye.|| ||
Ajjeva kiccaṃ ātappaṃ ko jaññā maraṇaṃ suve||
Na hi no saṇgāraṃ tena mahāsenena maccunā.|| ||
Evaṃ vihāriṃ ātāpiṃ ahorattamatanditaṃ,||
Taṃ ve bhaddekarattoti santo ācikkhate munīti.|| ||
Idam avoca Bhagavā, atta-mano āyasmā Ānando Bhagavato bhāsitaṃ 'abhinandī' ti.|| ||
Ānanda Bhadd'Eka-Ratta Suttaṃ
