Saṃyutta Nikāya
II. Nidāna Vagga
12. Nidāna Saṃyutta
3. Dasa-Balā Vagga
Sutta 25
Bhūmija Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][than][bodh][olds] Evaṃ me sutaṃ:|| ||
Ekaṃ samayaṃ Sāvatthiyaṃ-|| ||
2. Atha kho āyasmā Bhumijo||
sāyaṇha-samayaṃ patisallānā vuṭṭhito||
yen'āyasmā Sāriputto ten'upasaṇkami.|| ||
[38] Upasaṇkamitvā āyasmatā Sāriputtena saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā||
eka-m-antaṃ nisīdi.|| ||
Eka-m-antaṃ nisinno kho||
āyasmā Bhumijo āyasmantaṃ Sāriputtaṃ etad avoca:|| ||
3. Santāvuso Sāriputta,||
eke samaṇa-brāhmaṇā||
kamma-vādā||
sayaṃ-kataṃ sukha-dukkhaṃ paññāpenti.|| ||
Santi pan'āvuso Sāriputta,||
eke samaṇa-brāhmaṇā||
kamma-vādā||
paraṃ-kataṃ sukha-dukkhaṃ paññāpenti.|| ||
Santi pan'āvuso Sāriputta,||
eke samaṇa-brāhmaṇā||
kamma-vādā||
sayaṃ-katañ ca||
paraṃ-katañ ca||
sukha-dukkhaṃ paññāpenti.|| ||
Santi pan'āvuso Sāriputta,||
eke samaṇa-brāhmaṇā||
kamma-vādā||
asayaṃ-kāraṃ||
aparaṃ-kāraṃ||
adhicca-samuppannaṃ||
sukha-dukkhaṃ paññāpenti.|| ||
4. Idha pan'āvuso Sāriputta,||
Samaṇo Gotamo||
kiṃ vādī,||
kim akkhāyī?|| ||
Kathaṃ vyākaramānā ca mayaṃ vutta-vādino c'eva Samaṇassa Gotamassa assāma||
na ca Samaṇaṃ Gotamaṃ abhūtena abbhācikkheyyāma?|| ||
Dhammassa c'ānudhammaṃ vyākareyyāma||
na ca koci saha-dhammiko vādānupāto gārayhaṃ ṭhānaṃ āgaccheyyā" ti?|| ||
Paṭicca-samuppannaṃ kho āvuso sukha-dukkhaṃ vuttaṃ Bhagavatā.
Kim paṭicca?|| ||
Phassaṇ paṭicca.|| ||
Iti vadaṃ vuttavādī c'eva Bhagavato assa||
na ca Bhagavantaṃ abhūtena abbh'ācikkheyya||
dhammassa c'ānudhammaṃ vyākareyya||
na ca koci saha-dhammiko vādānupāto gārayhaṃ ṭhānaṃ āgaccheyya.|| ||
8. Tatra āvuso ye te samaṇa-brāhmaṇā kamma-vādā sayaṃ-kataṃ sukha-dukkhaṃ paññāpenti,||
tad api phassapacacayā.|| ||
Ye pi te samaṇa-brāhmaṇā kamma-vādā paraṃ-kataṃ sukha-dukkhaṃ paññāpenti||
tad api phassa-paccayā.|| ||
Ye pi te samaṇa-brāhmaṇā kamma-vādā sayaṃ-katañ ca paraṃ-katañ ca sukha-dukkhaṃ paññāpenti,||
tad api phassa-paccayā.|| ||
Ye pi te samaṇa-brāhmaṇā kamma-vādā asayaṃ-kāraṃ aparaṃ-kāraṃ adhicca-samuppannaṃ sukha-dukkhaṃ paññāpenti,||
tad api phassa-paccayā.|| ||
9. Tatra āvuso ye te samaṇa-brāhmaṇā kamma-vādā sayaṃ-kataṃ sukha-dukkhaṃ paññāpenti,||
te vata aññatra phassā paṭisaṃvedissantīti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā paraṃ-kataṃ sukha-dukkhaṃ paññāpenti,||
te vata aññatra phassā paṭisaṃvedissantīti||
n'etaṃ ṭhānaṃ vijjati.|| ||
Ye pi te [39] samaṇa-brāhmaṇā kamma-vādā sayaṃ-katañ ca paraṃ-katañ ca sukha-dukkhaṃ paññāpenti,||
te vata aññatra phassā paṭisaṃvedissantīti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā asayaṃ-kāraṃ aparaṃ-kāraṃ adhicca-samuppannaṃ sukha-dukkhaṃ paññāpenti,||
te vata aññatra phassā paṭisaṃvedissantīti||
n'etaṃ ṭhānaṃ vijjatī" ti.|| ||
Assosi kho āyasmā Ānando āyasmato Sāriputtassa āyasmatā Bhūmijena saddhiṃ imaṃ kathā-sallāpaṃ.|| ||
Atha kho āyasmā Ānando yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā emantaṃ nisīdi.|| ||
Eka-m-antaṃ nisinno kho āyasmā Ānando yāvatako āyasmato Sāriputtassa āyasmatā Bhūmijena saddhiṃ ahosi kathā-sallāpo,||
taṃ sabbaṃ Bhagavato ārocesi.|| ||
Sādhu sādhu Ānanda,||
yathā taṃ Sāriputto ca sammā vyākaramāno vyākareyya,||
paṭicca-samuppannaṃ kho Ānanda sukha-dukkhaṃ vuttaṃ mayā.|| ||
Kiṃ paṭicca?|| ||
Phassaṇ paṭicca.|| ||
Iti vadaṃ vuttavādī c'eva me assa||
na ca maṃ abhūtena abbh'ācikkheyya,||
dhammassa c'ānudhammaṃ vyākareyya,||
na ca ko ci saha-dhammiko vādānupāto gārayhaṃ ṭhānaṃ āgaccheyya.|| ||
13. Tatr'Ānanda, ye te samaṇa-brāhmaṇā kamma-vādā sayaṃ-kataṃ sukha-dukkhaṃ paññāpenti,||
tad api phassa-paccayā.|| ||
Ye pi te samaṇa-brāhmaṇā kamma-vādā paraṃ-kataṃ sukha-dukkhaṃ paññāpenti,||
tad api phassa-paccayā.|| ||
Ye pi te samaṇa-brāhmaṇā kamma-vādā sayaṃ-katañ ca paraṃ-katañ ca sukha-dukkhaṃ paññāpenti,||
tad api phassa-paccayā.|| ||
Ye pi te samaṇa-brāhmaṇā kamma-vādā asayaṃ-kāraṃ aparaṃ-kāraṃ adhicca-samuppannaṃ sukha-dukkhaṃ paññāpenti,||
tad api phassa-paccayā.|| ||
14. Tatr'Ānanda ye pi te samaṇa-brāhmaṇā kamma-vādā sayaṃ-kataṃ sukha-dukkhaṃ paññāpenti,||
te vata aññatra phassā paṭisaṃvedissantīti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā paraṃ-kataṃ sukha-dukkhaṃ paññāpenti, te vata aññatra phassā paṭisaṃvedissantīti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā sayaṃ-katañ ca paraṃ-katañ ca sukha-dukkhaṃ paññāpenti, te vata aññatra phassā paṭisaṃvedissantīti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā asayaṃ-kāraṃ aparaṃ-kāraṃ adhicca-samuppannaṃ sukha-dukkhaṃ paññāpenti, te vata aññatra phassā paṭisaṃvedissantīti||
n'etaṃ ṭhānaṃ vijjati.|| ||
13. Kāye vā h'Ānanda sati||
kāya-sañcetanā-hetu||
uppajjati||
[40] ajjhattaṃ sukha-dukkhaṃ;|| ||
vācāya vā h'Ānanda sati||
vacī-sañcetanā-hetu||
uppajjati||
ajjhattaṃ sukha-dukkhaṃ;|| ||
mane vā h'Ānanda sati||
mano-sañcetanā-hetu||
uppajjati||
ajjhattaṃ sukha-dukkhaṃ.|| ||
§
Avijjā-paccayā va||
sāmaṃ vā||
taṃ, Ānanda, kāya-saṇkhāraṃ abhisaṇkhāroti||
yam paccayāssa taṃ||
uppajjati||
ajjhattaṃ sukha-dukkhaṃ;|| ||
pare vāssa taṃ, Ānanda,||
kāya-saṇkhāraṃ abhisaṇkhāronti||
yam paccayāssa taṃ||
uppajjati||
ajjhattaṃ sukha-dukkhaṃ.|| ||
Sampajāno vā taṃ, Ānanda,||
kāya-saṇkhāraṃ abhisaṇkhāroti||
yaṃ paccayāssa taṃ||
uppajjati||
ajjhattaṃ sukha-dukkhaṃ;|| ||
asampajāno vā taṃ, Ānanda,||
kāya-saṇkhāraṃ abhisaṇkhāroti||
yaṃ paccayāssa taṃ||
uppajjati||
ajjhattaṃ sukha-dukkhaṃ.|| ||
-◦-
Avijjā-paccayā va||
sāmaṃ vā taṃ, Ānanda,||
vacī-saṇkhāraṃ abhisaṇkhāroti||
yam paccayāssa taṃ||
uppajjati||
ajjhattaṃ sukha-dukkhaṃ,||
pare vāssa taṃ, Ānanda,||
vacī-saṇkhāraṃ abhisaṇkhāronti||
yam paccayāssa taṃ||
uppajjati||
ajjhattaṃ sukha-dukkhaṃ.|| ||
Sampajāno vā taṃ, Ānanda,||
vacī-saṇkhāraṃ abhisaṇkhāroti||
yaṃ paccayāssa taṃ||
uppajjati||
ajjhattaṃ sukha-dukkhaṃ,||
asampajāno vā taṃ, Ānanda,||
vacī-saṇkhāraṃ abhisaṇkhāroti||
yaṃ paccayāssa taṃ||
uppajjati||
ajjhattaṃ sukha-dukkhaṃ.|| ||
-◦-
Avijjā-paccayā va||
sāmaṃ vā taṃ, Ānanda,||
mano-saṇkhāraṃ abhisaṇkhāroti||
yam paccayāssa taṃ||
uppajjati||
ajjhattaṃ sukha-dukkhaṃ,||
pare vāssa taṃ, Ānanda,||
mano-saṇkhāraṃ abhisaṇkhāronti||
yam paccayāssa taṃ||
uppajjati||
ajjhattaṃ sukha-dukkhaṃ.|| ||
Sampajāno vā taṃ, Ānanda,||
mano-saṇkhāraṃ abhisaṇkhāroti||
yaṃ paccayāssa taṃ||
uppajjati||
ajjhattaṃ sukha-dukkhaṃ,||
asampajāno vā taṃ, Ānanda,||
mano-saṇkhāraṃ abhisaṇkhāroti||
yaṃ paccayāssa taṃ||
uppajjati||
ajjhattaṃ sukha-dukkhaṃ.|| ||
Imesu, Ānanda,||
dhammesu avijjā anupatitā.|| ||
§
Avijjāya tv'eva, Ānanda,||
asesa-virāga-nirodhā||
so kāyo na hoti||
yaṃ paccayāssa taṃ||
uppajjati||
ajjhattaṃ sukha-dukkhaṃ.|| ||
Sā vācā na hoti||
yaṃ paccayāssa taṃ||
uppajjati||
ajjhattaṃ sukha-dukkhaṃ.|| ||
So mano na hoti||
yaṃ paccayāssa taṃ||
[41] uppajjati||
ajjhattaṃ sukha-dukkhaṃ.|| ||
Khettaṃ taṃ na hoti||
vatthu taṃ na hoti||
āyatanaṃ taṃ na hoti||
adhikaraṇaṃ taṃ na hoti||
yaṃ paccayāssa taṃ||
uppajjati||
ajjhattaṃ sukha-dukkhan ti."|| ||
