Saṃyutta Nikāya
II. Nidāna Vagga
12. Nidāna Saṃyutta
4. Kaḷara-Khattiya Vagga
Sutta 33
Paṭhama Ñāṇassa Vatthuṇi Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evaṃ me sutaṃ.|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Tatra kho Bhagavā bhikkhu āmantesi:|| ||
"Bhikkhavo" ti.|| ||
"Bhadante" ti||
te bhikkh Bhagavato paccassosuṃ|| ||
Bhagavā etad avoca:|| ||
2. "catu-cattārīsaṃ vo bhikkhave, ñāṇa-vatthūni desissāmi.|| ||
Taṃ suṇātha.|| ||
Sādhukaṃ manasi-karotha.|| ||
Bhāsissāmī" ti.|| ||
"Evaṃ bhante" ti kho te bhikkhū Bhagavato paccassosuṃ.|| ||
Bhagavā etad avoca:|| ||
"Katamāni bhikkhave, catu-cattārīsaṃ ñāṇa-vatthūni?|| ||
[57] Jarā-māraṇe ñāṇaṃ,||
jarā-māraṇa-samudaye ñāṇaṃ,||
jarā-māraṇa-nirodhe ñāṇaṃ,||
jarā-māraṇa-nirodha-gāminiyā paṭipadāya ñāṇaṃ.|| ||
Jātiyā ñāṇaṃ,||
jāti-samudaye ñāṇaṃ,||
jāti-nirodhe ñāṇaṃ,||
jāti-nirodha-gāminiyā paṭipadāya ñāṇaṃ.|| ||
Bhave ñāṇaṃ,||
bhava-samudaye ñāṇaṃ,||
bhava-nirodhe ñāṇaṃ,||
bhava-nirodha-gāminiyā paṭipadāya ñāṇaṃ.|| ||
Upādāne ñāṇaṃ,||
upādāna-samudaye ñāṇaṃ,||
upādāna-nirodhe ñāṇaṃ,||
upādāna-nirodha-gāminiyā paṭipadāya ñāṇaṃ.|| ||
Taṇhāya ñāṇaṃ,||
taṇhā-samudaye ñāṇaṃ,||
taṇhā-nirodhe ñāṇaṃ,||
taṇhā-nirodha-gāminiyā paṭipadāya ñāṇaṃ.|| ||
Vedanāya ñāṇaṃ,||
vedanā-samudaye ñāṇaṃ,||
vedanā-nirodhe ñāṇaṃ,||
vedanā-nirodha-gāminiyā paṭipadāya ñāṇaṃ.|| ||
Phasse ñāṇaṃ,||
phassa-samudaye ñāṇaṃ,||
phassa-nirodhe ñāṇaṃ,||
phassa-nirodha-gāminiyā paṭipadāya ñāṇaṃ.|| ||
Saḷāyatane ñāṇaṃ,||
saḷāyatana-samudaye ñāṇaṃ,||
saḷāyatana-nirodhe ñāṇaṃ,||
saḷāyatana-nirodha-gāminiyā paṭipadāya ñāṇaṃ.|| ||
Nāma-rūpe ñāṇaṃ,||
nāma-rūpa-samudaye ñāṇaṃ,||
nāma-rūpa-nirodhe ñāṇaṃ,||
nāma-rūpa-nirodha-gāminiyā paṭipadāya ñāṇaṃ.|| ||
Viññāṇe ñāṇaṃ,||
viññāṇa-samudaye ñāṇaṃ,||
viññāṇa-nirodhe ñāṇaṃ,||
viññāṇa-nirodha-gāminiyā paṭipadāya ñāṇaṃ.|| ||
Saṇkhāresu ñāṇaṃ,||
saṇkhāra-samudaye ñāṇaṃ,||
saṇkhāra-nirodhe ñāṇaṃ,||
saṇkhāra-nirodha-gāminiyā paṭipadāya ñāṇaṃ.|| ||
Imāni vuccanti bhikkhave catu-cattārīsaṃ ñāṇa-vatthūni.|| ||
Katamañ ca bhikkhave, jarā-māraṇaṃ?|| ||
Yā tesaṇ tesaṇ sattāṇaṃ tamhi tamhi satta-nikāye jarā jīraṇatā khaṇḍiccaṃ pāliccaṃ valittacatā āyuno saṇhāni indriyānaṃ paripāko,||
ayaṃ vuccati jarā.|| ||
Yā tesaṇ tesaṇ sattāṇaṃ tamhā tamhā satta-nikāyā cuti cavanatā bhedo antara-dhānaṃ maccu-māraṇaṃ kāla-kiriyā khandhānaṃ bhedo kaḷebarassa nikkhepo jīvit'indriyassa upacchedo,||
idaṃ vuccati māraṇaṃ.|| ||
Iti ayañ ca jarā idaṃ ca māraṇaṃ idaṃ vuccati bhikkhave jarā-māraṇaṃ.|| ||
Jāti-samudayā jarā-māraṇa-samudayo,||
jāti-nirodhā jarā-māraṇa-nirodho.|| ||
Ayam eva Ariyo Aṭṭhaṇgiko Maggo jarā-māraṇa-nirodha-gāminī paṭipadā.|| ||
Seyyath'īdaṃ:|| ||
Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||
Yato kho bhikkhave, ariya-sāvako evaṃ jarā-māraṇaṃ pajānāti,||
evaṃ jarā-māraṇa-samudayaṃ pajānāti,||
[58] evaṃ jarā-māraṇa-nirodhaṃ pajānāti,||
evaṃ jarā-māraṇa nirodha-gāminiṃ paṭipadaṃ pajānāti,||
idam assa dhamme ñāṇaṃ.|| ||
So iminā dhammena diṭṭhena viditena akālikena pattena pariyogāḷhena atīt-ā-nāgate nayaṃ neti.|| ||
Ye kho keci atītam addhānaṃ samaṇā vā brāhmaṇā vā jarā-māraṇaṃ abbhaññaṃsu,||
jarā-māraṇa-samudayaṃ abbhaññaṃsu,||
jarā-māraṇa-nirodhaṃ abbhaññaṃsu,||
jarā-māraṇa-nirodha-gāminiṃ paṭipadaṃ abbhaññaṃsu,||
sabbe te evam evam abbhaññaṃsu.|| ||
Seyyathā-pahaṃ etarahi.|| ||
Ye pi hi keci anāgatam addhānaṃ samaṇā vā brāhmaṇā vā jarā-māraṇaṃ abhijānissanti,||
jarā-māraṇa-samudayaṃ abhijānissanti||
jarā-māraṇa-nirodhaṃ abhijānissanti,||
jarā-māraṇa-nirodha-gāminiṃ paṭipadaṃ abhijānissanti,||
sabbe te evam evam abhijānissanti|| ||
Seyyathā-pahaṃ etarahi.|| ||
Idam assa anvaye ñāṇaṃ.|| ||
Yato kho bhikkhave ariya-sāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaṃ vuccati bhikkhave ariya-sāvako||
diṭṭhi-sampanno iti pi,||
dassana-sampanno iti pi,||
āgato imaṃ Sad'Dhammaṃ iti pi,||
passati imaṃ Sad'Dhammaṃ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
Dhamma-sotaṃ samāpanno iti pi,||
ariyo nibbedhika-pañño iti pi,||
amatadvāraṃ āhacca tiṭṭhati iti pī.
■
Katamā ca bhikkhave jāti?|| ||
Yā tesaṇ tesaṇ sattāṇaṃ tamhi tamhi satta-nikāye jāti sañjāti okkanti nibbatti abhinibbatti,||
khandhānaṃ pātu-bhāvo āyatanānaṃ paṭilābho,||
ayaṃ vuccati bhikkhave jāti.|| ||
Bhava-samudayā jāti-samudayo.|| ||
Bhava-nirodhā jāti-nirodho.|| ||
Ayam eva Ariyo Aṭṭhaṇgiko Maggo jāti-nirodha-gāminī paṭipadā.|| ||
Seyyath'īdaṃ:|| ||
Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||
Yato kho bhikkhave, ariya-sāvako evaṃ jātiṃ pajānāti,||
evaṃ jāti samudayaṃ pajānāti,||
evaṃ jāti-nirodhaṃ pajānāti,||
evaṃ jāti-nirodha-gāminiṃ paṭipadaṃ pajānāti,||
idam assa dhamme ñāṇaṃ.|| ||
So iminā dhammena diṭṭhena viditena akālikena pattena pariyogāḷhena atīt-ā-nāgate nayaṃ neti.|| ||
Ye kho keci atītam addhānaṃ samaṇā vā brāhmaṇā vā jāti abbhaññaṃsu,||
jāti-samudayaṃ abbhaññaṃsu,||
jāti-nirodhaṃ abbhaññaṃsu,||
jāti-nirodha-gāminiṃ paṭipadaṃ abbhaññaṃsu,||
sabbe te evam evam abbhaññaṃsu.|| ||
Seyyathā p'ahaṃ etarahi.|| ||
Ye pi hi keci anāgatam addhānaṃ samaṇā vā brāhmaṇā vā jāti abhijānissanti,||
jāti-samudayaṃ abhijānissanti||
jāti-nirodhaṃ abhijānissanti,||
jāti-nirodha-gāminiṃ paṭipadaṃ abhijānissanti,||
sabbe te evam evam abhijānissanti|| ||
Seyyathā p'ahaṃ etarahi.|| ||
Idam assa anvaye ñāṇaṃ.|| ||
Yato kho bhikkhave ariya-sāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaṃ vuccati bhikkhave ariya-sāvako||
diṭṭhi-sampanno iti pi,||
dassana-sampanno iti pi,||
āgato imaṃ Sad'Dhammaṃ iti pi,||
passati imaṃ Sad'Dhammaṃ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
Dhamma-sotaṃ samāpanno iti pi,||
ariyo nibbedhika-pañño iti pi,||
amatadvāraṃ āhacca tiṭṭhati iti pī.
■
Katamo ca bhikkhave, bhavo?|| ||
Tayo me bhikkhave, bhavā:|| ||
Kāma-bhavo,||
rūpa-bhavo,||
arūpa-bhavo.|| ||
Ayaṃ vuccati bhikkhave, bhavo.|| ||
Upādāna-samudayā bhava-samudayo.|| ||
Upādāna-nirodhā bhava-nirodho.|| ||
Ayam eva Ariyo Aṭṭhaṇgiko Maggo bhava-nirodha-gāminī paṭipadā.|| ||
Seyyath'īdaṃ:|| ||
Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||
Yato kho bhikkhave, ariya-sāvako evaṃ bhavaṃ pajānāti,||
evaṃ bhavasamudayaṃ pajānāti,||
evaṃ bhava-nirodhaṃ pajānāti,||
evaṃ bhava-nirodha-gāminiṃ paṭipadaṃ pajānāti,||
idam assa dhamme ñāṇaṃ.|| ||
So iminā dhammena diṭṭhena viditena akālikena pattena pariyogāḷhena atīt-ā-nāgate nayaṃ neti.|| ||
Ye kho keci atītam addhānaṃ samaṇā vā brāhmaṇā vā bhava abbhaññaṃsu,||
bhava-samudayaṃ abbhaññaṃsu,||
bhava-nirodhaṃ abbhaññaṃsu,||
bhava-nirodha-gāminiṃ paṭipadaṃ abbhaññaṃsu,||
sabbe te evam evam abbhaññaṃsu.|| ||
Seyyathā p'ahaṃ etarahi.|| ||
Ye pi hi keci anāgatam addhānaṃ samaṇā vā brāhmaṇā vā bhava abhijānissanti,||
bhava-samudayaṃ abhijānissanti||
bhava-nirodhaṃ abhijānissanti,||
bhava-nirodha-gāminiṃ paṭipadaṃ abhijānissanti,||
sabbe te evam evam abhijānissanti|| ||
Seyyathā p'ahaṃ etarahi.|| ||
Idam assa anvaye ñāṇaṃ.|| ||
Yato kho bhikkhave ariya-sāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaṃ vuccati bhikkhave ariya-sāvako||
diṭṭhi-sampanno iti pi,||
dassana-sampanno iti pi,||
āgato imaṃ Sad'Dhammaṃ iti pi,||
passati imaṃ Sad'Dhammaṃ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
Dhamma-sotaṃ samāpanno iti pi,||
ariyo nibbedhika-pañño iti pi,||
amatadvāraṃ āhacca tiṭṭhati iti pī.
■
Katamañ ca bhikkhave upādānaṃ?|| ||
Cattār'imāni bhikkhave, upādānāni:|| ||
Kām'ūpadānaṃ,||
diṭṭh'ūpadānaṃ,||
sīla-b-bat'ūpadānaṃ,||
att'avād'ūpādānaṃ.|| ||
Idaṃ vuccati bhikkhave upādānaṃ.|| ||
Taṇhā-samudayā upādāna-samudayo.|| ||
Taṇhā-nirodhā upādāna-nirodho.|| ||
Ayam eva Ariyo Aṭṭhaṇgiko Maggo upādāna-nirodha-gāminī paṭipadā.|| ||
Seyyath'īdaṃ:|| ||
Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||
Yato kho bhikkhave, ariya-sāvako evaṃ upādānaṃ pajānāti,||
evaṃ upādāna-samudayaṃ pajānāti,||
evaṃ upādāna-nirodhaṃ pajānāti,||
evaṃ upādāna-nirodha-gāminiṃ paṭipadaṃ pajānāti,||
idam assa dhamme ñāṇaṃ.|| ||
So iminā dhammena diṭṭhena viditena akālikena pattena pariyogāḷhena atīt-ā-nāgate nayaṃ neti.|| ||
Ye kho keci atītam addhānaṃ samaṇā vā brāhmaṇā vā upādāna abbhaññaṃsu,||
upādāna-samudayaṃ abbhaññaṃsu,||
upādāna-nirodhaṃ abbhaññaṃsu,||
upādāna-nirodha-gāminiṃ paṭipadaṃ abbhaññaṃsu,||
sabbe te evam evam abbhaññaṃsu.|| ||
Seyyathā p'ahaṃ etarahi.|| ||
Ye pi hi keci anāgatam addhānaṃ samaṇā vā brāhmaṇā vā upādāna abhijānissanti,||
upādāna-samudayaṃ abhijānissanti||
upādāna-nirodhaṃ abhijānissanti,||
upādāna-nirodha-gāminiṃ paṭipadaṃ abhijānissanti,||
sabbe te evam evam abhijānissanti|| ||
Seyyathā p'ahaṃ etarahi.|| ||
Idam assa anvaye ñāṇaṃ.|| ||
Yato kho bhikkhave ariya-sāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaṃ vuccati bhikkhave ariya-sāvako||
diṭṭhi-sampanno iti pi,||
dassana-sampanno iti pi,||
āgato imaṃ Sad'Dhammaṃ iti pi,||
passati imaṃ Sad'Dhammaṃ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
Dhamma-sotaṃ samāpanno iti pi,||
ariyo nibbedhika-pañño iti pi,||
amatadvāraṃ āhacca tiṭṭhati iti pī.
■
Katamā ca bhikkhave taṇhā?|| ||
Chayime bhikkhave, taṇhā-kāyā:|| ||
Rūpa-taṇhā,||
sadda-taṇhā,||
gandha-taṇhā,||
rasa-taṇhā,||
phoṭṭhabba-taṇhā,||
dhamma-taṇhā.|| ||
Ayaṃ vuccati bhikkhave taṇhā.|| ||
Vedanā-samudayā taṇhā-samudayo.|| ||
Vedanā-nirodhā taṇhā-nirodho.|| ||
Ayam eva Ariyo Aṭṭhaṇgiko Maggo taṇhā-nirodha-gāminī paṭipadā.|| ||
Seyyath'īdaṃ:|| ||
Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||
Yato kho bhikkhave, ariya-sāvako evaṃ taṇhaṃ pajānāti,||
evaṃ taṇhā-samudayaṃ pajānāti,||
evaṃ taṇhā-nirodhaṃ pajānāti,||
evaṃ taṇhā-nirodha-gāminiṃ paṭipadaṃ pajānāti,||
idam assa dhamme ñāṇaṃ.|| ||
So iminā dhammena diṭṭhena viditena akālikena pattena pariyogāḷhena atīt-ā-nāgate nayaṃ neti.|| ||
Ye kho keci atītam addhānaṃ samaṇā vā brāhmaṇā vā taṇhā abbhaññaṃsu,||
taṇhā-samudayaṃ abbhaññaṃsu,||
taṇhā-nirodhaṃ abbhaññaṃsu,||
taṇhā-nirodha-gāminiṃ paṭipadaṃ abbhaññaṃsu,||
sabbe te evam evam abbhaññaṃsu.|| ||
Seyyathā p'ahaṃ etarahi.|| ||
Ye pi hi keci anāgatam addhānaṃ samaṇā vā brāhmaṇā vā taṇhā abhijānissanti,||
taṇhā-samudayaṃ abhijānissanti||
taṇhā-nirodhaṃ abhijānissanti,||
taṇhā-nirodha-gāminiṃ paṭipadaṃ abhijānissanti,||
sabbe te evam evam abhijānissanti|| ||
Seyyathā p'ahaṃ etarahi.|| ||
Idam assa anvaye ñāṇaṃ.|| ||
Yato kho bhikkhave ariya-sāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaṃ vuccati bhikkhave ariya-sāvako||
diṭṭhi-sampanno iti pi,||
dassana-sampanno iti pi,||
āgato imaṃ Sad'Dhammaṃ iti pi,||
passati imaṃ Sad'Dhammaṃ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
Dhamma-sotaṃ samāpanno iti pi,||
ariyo nibbedhika-pañño iti pi,||
amatadvāraṃ āhacca tiṭṭhati iti pī.
■
Katamā ca bhikkhave vedanā?|| ||
Chayime bhikkhave, vedanākāyā:|| ||
Cakkhu-samphassajā vedanā,||
sota-samphassajā vedanā,||
ghāṇa-samphassajā vedanā,||
jivhā-samphassajā vedanā,||
kāya-samphassajā vedanā,||
mano-samphassajā vedanā.|| ||
Ayaṃ vuccati bhikkhave vedanā.|| ||
Phassa-samudayā vedanā-samudayo.|| ||
Phassa-nirodhā vedanā-nirodho.|| ||
Ayam eva Ariyo Aṭṭhaṇgiko Maggo vedanā-nirodha-gāminī paṭipadā.|| ||
Seyyath'īdaṃ:|| ||
Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||
Yato kho bhikkhave, ariya-sāvako evaṃ vedanaṃ pajānāti,||
evaṃ vedanā-samudayaṃ pajānāti,||
evaṃ vedanā-nirodhaṃ pajānāti,||
evaṃ vedanā-nirodha-gāminiṃ paṭipadaṃ pajānāti,||
idam assa dhamme ñāṇaṃ.|| ||
So iminā dhammena diṭṭhena viditena akālikena pattena pariyogāḷhena atīt-ā-nāgate nayaṃ neti.|| ||
Ye kho keci atītam addhānaṃ samaṇā vā brāhmaṇā vā vedanā abbhaññaṃsu,||
vedanā-samudayaṃ abbhaññaṃsu,||
vedanā-nirodhaṃ abbhaññaṃsu,||
vedanā-nirodha-gāminiṃ paṭipadaṃ abbhaññaṃsu,||
sabbe te evam evam abbhaññaṃsu.|| ||
Seyyathā p'ahaṃ etarahi.|| ||
Ye pi hi keci anāgatam addhānaṃ samaṇā vā brāhmaṇā vā vedanā abhijānissanti,||
vedanā-samudayaṃ abhijānissanti||
vedanā-nirodhaṃ abhijānissanti,||
vedanā-nirodha-gāminiṃ paṭipadaṃ abhijānissanti,||
sabbe te evam evam abhijānissanti|| ||
Seyyathā p'ahaṃ etarahi.|| ||
Idam assa anvaye ñāṇaṃ.|| ||
Yato kho bhikkhave ariya-sāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaṃ vuccati bhikkhave ariya-sāvako||
diṭṭhi-sampanno iti pi,||
dassana-sampanno iti pi,||
āgato imaṃ Sad'Dhammaṃ iti pi,||
passati imaṃ Sad'Dhammaṃ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
Dhamma-sotaṃ samāpanno iti pi,||
ariyo nibbedhika-pañño iti pi,||
amatadvāraṃ āhacca tiṭṭhati iti pī.
■
Katamo ca bhikkhave phasso?|| ||
Chayime bhikkhave, phassa-kāyā:|| ||
Cakkhu-samphasso,||
sota-samphasso,||
ghāṇa-samphasso,||
jivhā-samphasso,||
kāya-samphasso,||
mano-samphasso.|| ||
Ayaṃ vuccati bhikkhave, phasso.|| ||
Saḷāyatana-samudayā phassa-samudayo.|| ||
Saḷāyatana-nirodhā phassa-nirodho.|| ||
Ayam eva Ariyo Aṭṭhaṇgiko Maggo phassa-nirodha-gāminī paṭipadā.|| ||
Seyyath'īdaṃ:|| ||
Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||
Yato kho bhikkhave, ariya-sāvako evaṃ phassaṇ pajānāti,||
evaṃ phassa-samudayaṃ pajānāti,||
evaṃ phassa-nirodhaṃ pajānāti,||
evaṃ phassa-nirodha-gāminiṃ paṭipadaṃ pajānāti,||
idam assa dhamme ñāṇaṃ.|| ||
So iminā dhammena diṭṭhena viditena akālikena pattena pariyogāḷhena atīt-ā-nāgate nayaṃ neti.|| ||
Ye kho keci atītam addhānaṃ samaṇā vā brāhmaṇā vā phassa abbhaññaṃsu,||
phassa-samudayaṃ abbhaññaṃsu,||
phassa-nirodhaṃ abbhaññaṃsu,||
phassa-nirodha-gāminiṃ paṭipadaṃ abbhaññaṃsu,||
sabbe te evam evam abbhaññaṃsu.|| ||
Seyyathā p'ahaṃ etarahi.|| ||
Ye pi hi keci anāgatam addhānaṃ samaṇā vā brāhmaṇā vā phassa abhijānissanti,||
phassa-samudayaṃ abhijānissanti||
phassa-nirodhaṃ abhijānissanti,||
phassa-nirodha-gāminiṃ paṭipadaṃ abhijānissanti,||
sabbe te evam evam abhijānissanti|| ||
Seyyathā p'ahaṃ etarahi.|| ||
Idam assa anvaye ñāṇaṃ.|| ||
Yato kho bhikkhave ariya-sāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaṃ vuccati bhikkhave ariya-sāvako||
diṭṭhi-sampanno iti pi,||
dassana-sampanno iti pi,||
āgato imaṃ Sad'Dhammaṃ iti pi,||
passati imaṃ Sad'Dhammaṃ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
Dhamma-sotaṃ samāpanno iti pi,||
ariyo nibbedhika-pañño iti pi,||
amatadvāraṃ āhacca tiṭṭhati iti pī.
■
Katamaṃ ca bhikkhave saḷāyatanaṃ?|| ||
Cakkhāyatanaṃ,||
sot'āyatanaṃ,||
ghāṇāyatanaṃ,||
jivh-ā-yatanaṃ,||
kāy'āyatanaṃ,||
man'āyatanaṃ.|| ||
Idaṃ vuccati bhikkhave, saḷāyatanaṃ.|| ||
Nāma-rūpa-samudayā saḷāyatana-samudayo.|| ||
Nāma-rūpa-nirodhā saḷāyatana-nirodho.|| ||
Ayam eva Ariyo Aṭṭhaṇgiko Maggo saḷāyatana-nirodha-gāminī paṭipadā.|| ||
Seyyath'īdaṃ:|| ||
Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||
Yato kho bhikkhave, ariya-sāvako evaṃ saḷāyatanaṃ pajānāti,||
evaṃ saḷāyatana-samudayaṃ pajānāti,||
evaṃ saḷāyatana-nirodhaṃ pajānāti,||
evaṃ saḷāyatana-nirodha-gāminiṃ paṭipadaṃ pajānāti,||
idam assa dhamme ñāṇaṃ.|| ||
So iminā dhammena diṭṭhena viditena akālikena pattena pariyogāḷhena atīt-ā-nāgate nayaṃ neti.|| ||
Ye kho keci atītam addhānaṃ samaṇā vā brāhmaṇā vā saḷāyatana abbhaññaṃsu,||
saḷāyatana-samudayaṃ abbhaññaṃsu,||
saḷāyatana-nirodhaṃ abbhaññaṃsu,||
saḷāyatana-nirodha-gāminiṃ paṭipadaṃ abbhaññaṃsu,||
sabbe te evam evam abbhaññaṃsu.|| ||
Seyyathā p'ahaṃ etarahi.|| ||
Ye pi hi keci anāgatam addhānaṃ samaṇā vā brāhmaṇā vā saḷāyatana abhijānissanti,||
saḷāyatana-samudayaṃ abhijānissanti||
saḷāyatana-nirodhaṃ abhijānissanti,||
saḷāyatana-nirodha-gāminiṃ paṭipadaṃ abhijānissanti,||
sabbe te evam evam abhijānissanti|| ||
Seyyathā p'ahaṃ etarahi.|| ||
Idam assa anvaye ñāṇaṃ.|| ||
Yato kho bhikkhave ariya-sāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaṃ vuccati bhikkhave ariya-sāvako||
diṭṭhi-sampanno iti pi,||
dassana-sampanno iti pi,||
āgato imaṃ Sad'Dhammaṃ iti pi,||
passati imaṃ Sad'Dhammaṃ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
Dhamma-sotaṃ samāpanno iti pi,||
ariyo nibbedhika-pañño iti pi,||
amatadvāraṃ āhacca tiṭṭhati iti pī.
■
Katamaṃ ca bhikkhave nāma-rūpaṃ?|| ||
Vedanā,||
saññā,||
cetanā,||
phasso,||
mana-sikāro,||
idaṃ vuccati nāmaṃ.|| ||
Cattāro ca mahā-bhūtā,||
catunnaṃ ca mahā-bhūtānaṃ upādāyarūpaṃ,||
idaṃ vuccati rūpaṃ.|| ||
Iti idañ ca nāmaṃ,||
idañ ca rūpaṃ,||
idaṃ vuccati bhikkhave, nāma-rūpaṃ.|| ||
Viññāṇa-samudayā nāma-rūpa-samudayo.|| ||
Viññāṇa-nirodhā nāma-rūpa-nirodho.|| ||
Ayam eva Ariyo Aṭṭhaṇgiko Maggo nāma-rūpa-nirodha-gāminī paṭipadā.|| ||
Seyyath'īdaṃ:|| ||
Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||
Yato kho bhikkhave, ariya-sāvako evaṃ nāma-rūpaṃ pajānāti,||
evaṃ nāma-rūpa-samudayaṃ pajānāti,||
evaṃ nāma-rūpa-nirodhaṃ pajānāti,||
evaṃ nāma-rūpa-nirodha-gāminiṃ paṭipadaṃ pajānāti,||
idam assa dhamme ñāṇaṃ.|| ||
So iminā dhammena diṭṭhena viditena akālikena pattena pariyogāḷhena atīt-ā-nāgate nayaṃ neti.|| ||
Ye kho keci atītam addhānaṃ samaṇā vā brāhmaṇā vā nāma-rūpa abbhaññaṃsu,||
nāma-rūpa-samudayaṃ abbhaññaṃsu,||
nāma-rūpa-nirodhaṃ abbhaññaṃsu,||
nāma-rūpa-nirodha-gāminiṃ paṭipadaṃ abbhaññaṃsu,||
sabbe te evam evam abbhaññaṃsu.|| ||
Seyyathā p'ahaṃ etarahi.|| ||
Ye pi hi keci anāgatam addhānaṃ samaṇā vā brāhmaṇā vā nāma-rūpa abhijānissanti,||
nāma-rūpa-samudayaṃ abhijānissanti||
nāma-rūpa-nirodhaṃ abhijānissanti,||
nāma-rūpa-nirodha-gāminiṃ paṭipadaṃ abhijānissanti,||
sabbe te evam evam abhijānissanti|| ||
Seyyathā p'ahaṃ etarahi.|| ||
Idam assa anvaye ñāṇaṃ.|| ||
Yato kho bhikkhave ariya-sāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaṃ vuccati bhikkhave ariya-sāvako||
diṭṭhi-sampanno iti pi,||
dassana-sampanno iti pi,||
āgato imaṃ Sad'Dhammaṃ iti pi,||
passati imaṃ Sad'Dhammaṃ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
Dhamma-sotaṃ samāpanno iti pi,||
ariyo nibbedhika-pañño iti pi,||
amatadvāraṃ āhacca tiṭṭhati iti pī.
■
Katamaṃ ca bhikkhave viññāṇaṃ?|| ||
Chayime bhikkhave, viññāṇa-kāyā:|| ||
Cakkhu-viññāṇaṃ,||
sota-viññāṇaṃ,||
ghāṇa-viññāṇaṃ,||
jivhā-viññāṇaṃ,||
kāya-viññāṇaṃ,||
mano-viññāṇaṃ.|| ||
Idaṃ vuccati bhikkhave, viññāṇaṃ.|| ||
Saṇkhāra-samudayā viññāṇa-samudayo.|| ||
Saṇkhāra-nirodhā viññāṇa-nirodho.|| ||
Ayam eva Ariyo Aṭṭhaṇgiko Maggo viññāṇa-nirodha-gāminī paṭipadā.|| ||
Seyyath'īdaṃ:|| ||
Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||
Yato kho bhikkhave, ariya-sāvako evaṃ viññāṇaṃ pajānāti,||
evaṃ viññāṇa-samudayaṃ pajānāti,||
evaṃ viññāṇa-nirodhaṃ pajānāti,||
evaṃ viññāṇa-nirodha-gāminiṃ paṭipadaṃ pajānāti,||
idam assa dhamme ñāṇaṃ.|| ||
So iminā dhammena diṭṭhena viditena akālikena pattena pariyogāḷhena atīt-ā-nāgate nayaṃ neti.|| ||
Ye kho keci atītam addhānaṃ samaṇā vā brāhmaṇā vā viññāṇa abbhaññaṃsu,||
viññāṇa-samudayaṃ abbhaññaṃsu,||
viññāṇa-nirodhaṃ abbhaññaṃsu,||
viññāṇa-nirodha-gāminiṃ paṭipadaṃ abbhaññaṃsu,||
sabbe te evam evam abbhaññaṃsu.|| ||
Seyyathā p'ahaṃ etarahi.|| ||
Ye pi hi keci anāgatam addhānaṃ samaṇā vā brāhmaṇā vā viññāṇa abhijānissanti,||
viññāṇa-samudayaṃ abhijānissanti||
viññāṇa-nirodhaṃ abhijānissanti,||
viññāṇa-nirodha-gāminiṃ paṭipadaṃ abhijānissanti,||
sabbe te evam evam abhijānissanti|| ||
Seyyathā p'ahaṃ etarahi.|| ||
Idam assa anvaye ñāṇaṃ.|| ||
Yato kho bhikkhave ariya-sāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaṃ vuccati bhikkhave ariya-sāvako||
diṭṭhi-sampanno iti pi,||
dassana-sampanno iti pi,||
āgato imaṃ Sad'Dhammaṃ iti pi,||
passati imaṃ Sad'Dhammaṃ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
Dhamma-sotaṃ samāpanno iti pi,||
ariyo nibbedhika-pañño iti pi,||
amatadvāraṃ āhacca tiṭṭhati iti pī.
■
Katame ca bhikkhave saṇkhārā?|| ||
Tayo me bhikkhave, saṇkhārā:|| ||
[59] Kāya-saṇkhāro,||
vacī-saṇkhāro,||
citta-saṇkhāro,||
ime vuccanti bhikkhave, saṇkhārā.|| ||
Avijjā-samudayā saṇkhāra-samudayo.|| ||
Avijjā-nirodhā saṇkhāra-nirodho.|| ||
Ayam eva Ariyo Aṭṭhaṇgiko Maggo saṇkhāra-nirodha-gāminī paṭipadā.|| ||
Seyyath'īdaṃ:|| ||
Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||
Yato kho bhikkhave, ariya-sāvako evaṃ saṇkhāre pajānāti,||
evaṃ saṇkhāra-samudayaṃ pajānāti,||
evaṃ saṇkhāra-nirodhaṃ pajānāti,||
evaṃ saṇkhāra-nirodha-gāminiṃ paṭipadaṃ pajānāti,||
idam assa dhamme ñāṇaṃ.|| ||
So iminā dhammena diṭṭhena viditena akālikena pattena pariyogāḷhena atīt-ā-nāgate nayaṃ neti.|| ||
Ye kho keci atītam addhānaṃ samaṇā vā brāhmaṇā vā saṇkhāra abbhaññaṃsu,||
saṇkhāra-samudayaṃ abbhaññaṃsu,||
saṇkhāra-nirodhaṃ abbhaññaṃsu,||
saṇkhāra-nirodha-gāminiṃ paṭipadaṃ abbhaññaṃsu,||
sabbe te evam evam abbhaññaṃsu.|| ||
Seyyathā p'ahaṃ etarahi.|| ||
Ye pi hi keci anāgatam addhānaṃ samaṇā vā brāhmaṇā vā saṇkhāra abhijānissanti,||
saṇkhāra-samudayaṃ abhijānissanti||
saṇkhāra-nirodhaṃ abhijānissanti,||
saṇkhāra-nirodha-gāminiṃ paṭipadaṃ abhijānissanti,||
sabbe te evam evam abhijānissanti|| ||
Seyyathā p'ahaṃ etarahi.|| ||
Idam assa anvaye ñāṇaṃ.|| ||
Yato kho bhikkhave ariya-sāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaṃ vuccati bhikkhave ariya-sāvako||
diṭṭhi-sampanno iti pi,||
dassana-sampanno iti pi,||
āgato imaṃ Sad'Dhammaṃ iti pi,||
passati imaṃ Sad'Dhammaṃ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
Dhamma-sotaṃ samāpanno iti pi,||
ariyo nibbedhika-pañño iti pi,||
amatadvāraṃ āhacca tiṭṭhati iti pī" ti.|| ||
