Saṃyutta Nikāya
II. Nidāna Vagga
16. Kassapa Saṃyutta
Sutta 4
Kul'Ūpaga Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Tatra kho Bhagavā bhikkhu āmantesi:|| ||
"Bhikkhavo" ti.|| ||
"Bhadante" ti te bhikkh Bhagavato paccassosuṃ|| ||
Bhagavā etad avoca:|| ||
"Taṃ kiṃ maññatha bhikkhave?|| ||
Kathaṃ-rūpo bhikkhū arahati kul'ūpago hotuṃ.|| ||
Kathaṃ-rūpo bhikkhū arahati na kul'ūpago hotun" ti?|| ||
"Bhagava mūlakā no bhante,||
dhammā Bhagavannettikā Bhagavam-paṭisaraṇā.|| ||
Sādhu vata bhante,||
Bhagavantaṃ yeva paṭibhātu etassa bhāsitassa||
attho Bhagavato sutvā bhikkhū dhāressantī" ti.|| ||
"Tena hi bhikkhave suṇātha,||
sādhukaṃ manasi-karotha||
bhāsissāmī" ti.|| ||
"Evaṃ bhante" ti||
kho te bhikkhū Bhagavato paccassosuṃ.|| ||
Bhagavā etad avoca:|| ||
"Yo hi koci bhikkhave,||
bhikkhu evaṃ citto kulāni upasaṇkamati:|| ||
"Dentu yeva me,||
mā ādaṃsu.|| ||
Bahukaññeva me dentu,||
mā thokaṃ.|| ||
Paṇitaññeva me dentu,||
mā lūkhaṃ.|| ||
Sīghaññeva me dentu,||
mā dandhaṃ.|| ||
Sakkacc'aññeva me dentu,||
mā asakkaccan" ti.|| ||
■
Tassa ce bhikkhave,||
bhikkhuno evaṃ cittassa kulāni upasaṇkamato,||
na denti,||
tena bhikkhu sandīyati||
so tato nidānaṃ dukkhaṃ domanassaṇ paṭisaṃvedayati.|| ||
Thokaṃ denti,||
no bahukaṃ,||
tena bhikkhu sandīyati,||
so tato nidānaṃ dukkhaṃ domanassaṇ paṭisaṃvedayati.|| ||
Lūkhaṃ denti,||
no paṇītaṃ,||
tena bhikkhu sandīyati,||
so tato nidānaṃ dukkhaṃ domanassaṇ paṭisaṃvedayati.|| ||
Dandhaṃ denti,||
no sīghaṃ,||
tena bhikkhu sandīyati,||
so tato nidānaṃ dukkhaṃ domanassaṇ paṭisaṃvedayati.|| ||
Asakkaccaṃ denti,||
no sakkaccaṃ,||
tena bhikkhu sandīyati,||
[201] so tato nidānaṃ dukkhaṃ domanassaṇ paṭisaṃvedayati.|| ||
Eva-rūpo kho bhikkhave,||
bhikkhū na arahati kul'ūpago hotuṃ.|| ||
■
Yo ca kho bhikkhave, bhikkhu evaṃ citto kulāni upasaṇkamati.|| ||
"Taṃ kutettha labbhā parakulesu-dentu yeva me,||
mā nādaṃsu||
bahuññeva me dentu||
mā thokaṃ;||
paṇītaṃ yeva me dentu||
mā lūkhaṃ;||
sīghaṃ yeva me dentu||
mā dandhaṃ;||
sakkaccaṃ yeva me dentu||
mā asakkaccan" ti.|| ||
Tassa ce bhikkhave,||
bhikkhuno evaṃ cittassa kulāni upasaṇkamato||
na denti,||
tena bhikkhu na sandīyati||
so na tato nidānaṃ dukkhaṃ domanassaṇ paṭisaṃvedayati.|| ||
Thokaṃ denti||
no bahukaṃ,||
tena bhikkhu na sandīyati||
so na tato nidānaṃ dukkhaṃ domanassaṇ paṭisaṃvedayati.|| ||
Lūkhaṃ denti||
no paṇītaṃ,||
tena bhikkhu na sandīyati||
so na tato nidānaṃ dukkhaṃ domanassaṇ paṭisaṃvedayati.|| ||
Dandhaṃ denti||
no sīghaṃ,||
tena bhikkhu na sandīyati||
so na tato nidānaṃ dukkhaṃ domanassaṇ paṭisaṃvedayati.|| ||
Asakkaccaṃ denti||
no sakkaccaṃ,||
tena bhikkhu na sandīyati||
so na tato nidānaṃ dukkhaṃ domanassaṇ paṭisaṃvedayati.|| ||
Eva-rūpo kho bhikkhave bhikkhu arahati kul'ūpago hotuṃ.|| ||
§
Kassapo bhikkhave, evaṃ citto kulāni upasaṇkamati:|| ||
'Taṃ kutettha labbhā parakulesu dentu yeva me,||
mā ādaṃsu,||
bahuññ eva me dentu||
mā thokaṃ,||
paṇītaṃ yeva me dentu,||
mā lūkhaṃ,||
sīghaṃ yeva me dentu||
mā dandhaṃ,||
sakkaccaṃ yeva me dentu,||
mā asakkaccan' ti.|| ||
Tassa ce bhikkhave,||
Kassapassa evaṃ cittassa kulāni upasaṇkamato||
na denti,||
tena Kassapo na sandīyati||
so na tatonidānaṃ dukkhaṃ domanassaṇ paṭisaṃvedayati.|| ||
Thokaṃ denti||
no bahukaṃ,||
tena Kassapo na sandīyati||
so na tatonidānaṃ dukkhaṃ domanassaṇ paṭisaṃvedayati.|| ||
Lūkhaṃ denti||
no paṇītaṃ,||
tena Kassapo na sandīyati||
so na tatonidānaṃ dukkhaṃ domanassaṇ paṭisaṃvedayati.|| ||
Dandhaṃ denti||
no sīghaṃ,||
tena Kassapo na sandīyati||
[202] so na tatonidānaṃ dukkhaṃ domanassaṇ paṭisaṃvedayati.|| ||
Asakkaccaṃ denti||
no sakkaccaṃ,||
tena Kassapo na sandīyati||
so na tatonidānaṃ dukkhaṃ domanassaṇ paṭisaṃvedayati.|| ||
Kassapena vā hi vo te bhikkhave,||
ovadissāmi,||
yo vā panassa Kassapasadiso.|| ||
Ovaditehi ca pana te tathattāya paṭipajjitabban" ti.|| ||
