Saṃyutta Nikāya
3. Khandha Vagga
28. Sāriputta Saṃyutta
Sutta 7
Akiñcañña Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ āyasmā Sāriputto Sāvatthiyaṃ viharati||
Jetavane Anāthapiṇḍikassa ārāme.|| ||
Atha kho āyasmā Sāriputto pubbaṇha-samayaṃ nivāsetvā patta-cīvaram ādāya||
Sāvatthiṃ piṇḍāya pāvisi.|| ||
Sāvatthiyaṃ piṇḍāya caritvā pacchā-bhattaṃ piṇḍa-pāta-paṭikkanto||
yena andhavanaṃ ten'upasaṇkami divā-vihārāya.|| ||
Andhavanaṃ ajjhoga-hetvā aññatarasmiṃ||
rukkha-mūle divā-vihāraṃ nisīdi.|| ||
Atha kho āyasmā Sāriputto sāyaṇha-samayaṃ paṭisallānā vuṭṭhito||
yena Jetavanaṃ Anāthapiṇḍikassa ārāmo ten'upasaṇkami.|| ||
Addsā kho āyasmā Ānando āyasmantaṃ Sāriputtaṃ dūrato va āga-c-chantaṃ.|| ||
Disvāna āyasmantaṃ Sāriputtaṃ etad avoca:|| ||
"Vi-p-pasannāni kho te āvuso Sāriputta,||
indriyāni parisuddho mukha-vaṇṇo pariyodāto.|| ||
Katamen'āyasmā Sāriputto ajja vihārena vihāsī" ti?|| ||
"Idh'āhaṃ āvuso,||
sabbaso Viññāṇañ-c'āyatanaṃ samatikkamma||
'N'atthi kiñcī' ti||
Ākiñcaññ'āyatanaṃ upasampajja viharāmi.|| ||
Tassa mayhaṃ āvuso na evaṃ hoti:|| ||
'Ahaṃ "N'atthi kiñcī" ti Ākiñcaññ'āyatanaṃ samāpajjāmī' ti|| ||
vā|| ||
'Ahaṃ "N'atthi kiñcī" ti Ākiñcaññ'āyatanaṃ samāpanno' ti|| ||
vā|| ||
'Ahaṃ "N'atthi kiñcī" ti Ākiñcaññ'āyatanaṃ vuṭṭhito' ti vā" ti.|| ||
"Tathā hi pan'āyasmato Sāriputtassa dīgha-rattaṃ abhiṃ kāramami-ṃ-kāramān-ā-nusayā susamūhatā.|| ||
Tasmā āyasmato Sāriputtassa na evaṃ hoti:|| ||
'Ahaṃ "N'atthi kiñcī" ti Ākiñcaññ'āyatanaṃ samāpajjāmī' ti|| ||
vā|| ||
'Ahaṃ "N'atthi kiñcī" ti Ākiñcaññ'āyatanaṃ samāpanno' ti|| ||
vā|| ||
'Ahaṃ "N'atthi kiñcī" ti Ākiñcaññ'āyatanaṃ vuṭṭhito' ti vā" ti.|| ||
