Saṃyutta Nikāya
4. Saḷāyatana Vagga
35. Saḷāyatana Saṃyutta
§ III: Paññāsaka Tatiya
5. Nava-Purāṇa Vagga
Sutta 147
Dutiya Sappāya Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evaṃ me sutaṃ:|| ||
Ekaṃ samayaṃ Bhagavā bhikkhū āmantesi|| ||
"Bhikkhavo" ti.|| ||
"Bhadante" ti||
te bhikkhū Bhagavato paccassosuṃ.|| ||
Bhagavā etad avoca:|| ||
"Nibbāna-sappāyaṃ vo bhikkhave paṭipadaṃ desissāmi.|| ||
Taṃ suṇātha,||
sādhukaṃ manasi karotha,||
bhāsissāmī.|| ||
Katamā ca sā bhikkhave Nibbāna-sappāyā paṭipadā?|| ||
Idha bhikkhave bhikkhu cakkhuṃ dukkhānti passati,||
rūpā dukkhāti passati,||
cakkhu-viññāṇaṃ dukkhānti passati,||
cakkhu-samphasso dukkhoti passati,||
yam pidaṃ cakkhu-samphassa-paccayā uppajjati vedayitaṃ sukhaṃ vā dukkhaṃ vā adukkha-m-asukhaṃ vā||
tam pi dukkhānti passati.|| ||
Sotaṃ dukkhānti passati,||
saddā dukkhāti passati,||
sota-viññāṇaṃ dukkhānti passati,||
sota-samphasso dukkhoti passati,||
yam pidaṃ sota-samphassa-paccayā uppajjati vedayitaṃ sukhaṃ vā dukkhaṃ vā adukkha-m-asukhaṃ vā||
tam pi dukkhānti passati.|| ||
Ghānaṃ dukkhānti passati,||
ghandha dukkhāti passati,||
ghāna-viññāṇaṃ dukkhānti passati,||
ghāna-samphasso dukkhoti passati,||
yam pidaṃ ghāna-samphassa-paccayā uppajjati vedayitaṃ sukhaṃ vā dukkhaṃ vā adukkha-m-asukhaṃ vā||
tam pi dukkhāti passati.|| ||
Jivhā dukkhānti passati,||
rasā dukkhāti passati,||
jivhā-viññāṇaṃ dukkhānti passati,||
jivhā-samphasso dukkhoti passati,||
yam pidaṃ jivhā-samphassa-paccayā uppajjati vedayitaṃ sukhaṃ vā dukkhaṃ vā adukkha-m-asukhaṃ vā||
tam pi dukkhānti passati.|| ||
Kāyo dukkhoti passati,||
phoṭṭhabbā dukkhāti passati,||
kāya-viññāṇaṃ dukkhānti passati,||
kāyo-samphasso dukkhoti passati,||
yam pidaṃ kāya-samphassa-paccayā uppajjati vedayitaṃ sukhaṃ vā dukkhaṃ vā adukkha-m-asukhaṃ vā||
tam pi dukkhānti passati.|| ||
Mano dukkhoti passati,||
dhammā dukkhāti passati,||
mano-viññāṇaṃ dukkhāti passati,||
mano-samphasso dukkhoti passati,||
yam pidaṃ mano-samphassa-paccayā uppajjati vedayitaṃ sukhaṃ vā dukkhaṃ vā adukkha-m-asukhaṃ vā||
tam pi dukkhānti passati.|| ||
Ayaṃ kho sā bhikkhave Nibbāna-sappāyā paṭipadā" ti.|| ||
