Saṃyutta Nikāya
4. Saḷāyatana Vagga
38. Jambukhādaka Saṃyutta
Sutta 7
Vedanā Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ āyasmā Sāriputto Magadhesu viharati Nālagāmake.|| ||
Atha kho Jambukhādako paribbājako yen'āyasmā Sāriputto ten'upasaṇkami.|| ||
Upasaṇkamitvā āyasmatā Sāriputtena saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
Eka-m-antaṃ nisinno kho Jambukhādako paribbājako āyasmantaṃ Sāriputtaṃ etad avoca:|| ||
"'Vedanā, vedanā' ti||
āvuso Sāriputta vuccati.|| ||
Katamā nu kho āvuso vedanā" ti?|| ||
"Tisso imā āvuso vedanā,||
sukhā vedanā||
dukkhā vedanā||
adukkha-m-asukhā vedanā.|| ||
Imā kho āvuso tisso vedanā" ti.|| ||
"Atthi pan'āvuso Maggo||
atthi paṭipadā||
etāsaṃ vedanānaṃ pariññāyā" ti?|| ||
"Atthi kho āvuso Maggo||
atthi paṭipadā||
etāsaṃ vedanānaṃ pariññāyā" ti.|| ||
"Katamo pan'āvuso Maggo||
katamā paṭipadā||
etāsaṃ vedanānaṃ pariññāyā" ti?|| ||
"Ayam eva kho āvuso Ariyo Aṭṭh'aṇgiko Maggo||
etāsaṃ vedanānaṃ pariññāyā,||
seyyath'īdaṃ:|| ||
Sammā-diṭṭhi||
sammā-saṇkappo||
sammā-vācā||
sammā-kammanto||
sammā-ājīvo||
sammā-vāyāmo||
sammā-sati||
sammā-samādhi.|| ||
Ayaṃ kho āvuso Maggo||
ayaṃ paṭipadā||
etāsaṃ vedanānaṃ pariññāyā" ti.|| ||
"Bhaddako āvuso Maggo||
bhaddikā paṭipadā||
etāsaṃ vedanānaṃ pariññāyā,||
alañ ca pan'āvuso Sāriputta appamādāyā" ti.|| ||
