Saṃyutta Nikāya
4. Saḷāyatana Vagga
39. Sāmaṇḍaka Saṃyutta
Sutta 16
Dukkaraṃ Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ āyasmā Sāriputto vajjīsu Viharati||
Ukkavelāyaṃ Gaṇgāya nadiyā tīre.|| ||
Atha kho Sāmaṇḍakāni paribbājako yen'āyasmā Sāriputto ten'upasaṇkami.|| ||
Upasaṇkamitvā āyasmatā Sāriputtena saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
Eka-m-antaṃ nisinno kho Sāmaṇḍakāni paribbājako āyasmantaṃ Sāriputtaṃ etad avoca:|| ||
"Kin nu kho āvuso Sāriputta imasmiṃ Dhamma-Vinaye dukkaran" ti?|| ||
"Pabbajjā kho āvuso imasmiṃ Dhamma-Vinaye dukkarā" ti.|| ||
"Pabbajitena pan'āvuso kiṃ dukkaran" ti?|| ||
"Pabbajitena kho āvuso abhirati dukkarā" ti.|| ||
"Abhiratena pana āvuso kiṃ dukkaran" ti?|| ||
"Abhiratena kho āvuso Dhamm-ā-nu-Dhamma-paṭipatti dukkarā" ti.|| ||
"Kiṃ va ciraṃ pan'āvuso Dhamm-ā-nu-Dhamma-paṭipanno bhikkhu arahaṃ assā" ti?|| ||
"Na ciraṃ āvuso" ti.|| ||
