Saṃyutta Nikāya
4. Saḷāyatana Vagga
42. Gāmani Saṃyutta
Sutta 8
Saṇkha-Dhama Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][than] Evaṃ me sutaṃ:|| ||
Ekaṃ samayaṃ Bhagavā Nāḷandāyaṃ viharati Pāvarikambavane.|| ||
Atha kho Asibandhaka putto gāmaṇi||
Nigaṇṭha-sāvako||
yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinno kho Asibandhakaputto gāmaṇim Bhagavā etad avoca:|| ||
"Kathan nu kho gāmaṇi, Nigaṇṭho Nātaputto sāvakānaṃ dhammaṃ desetī" ti?|| ||
"Evaṃ kho bhante Nigaṇṭho Nātaputto sāvakānaṃ dhammaṃ deseti:|| ||
'Yo koci pāṇam atipāteti sabbo so āpāyiko Nerayiko.|| ||
Yo koci adinnam ādiyati sabbo so āpāyiko Nerayiko.|| ||
Yo koci kāmesu micchā carati sabbo so āpāyiko Nerayiko.|| ||
Yo koci musā bhaṇati sabbo so āpāyiko Nerayiko.|| ||
Yaṃ bahulaṃ yaṃ bahulaṃ viharati||
tena tena niyyatī' ti.|| ||
Evaṃ kho bhante Nigaṇṭho Nātaputto sāvakānaṃ dhammaṃ desetī" ti.|| ||
"'Yaṃ bahulaṃ yaṃ bahulañ ca gāmaṇi viharati||
tena [318] tena niyyatī' ti.|| ||
Evaṃ sante na koci āpāyiko Nerayiko bhavissati yathā Nigaṇṭhassa Nātaputtassa vacanaṃ.
Taṃ kim maññasi gāmaṇi?|| ||
Yo so puriso pāṇ-ā-tipātī,||
rattiyā vā||
divasassa vā||
samayāsamayaṃ upādāya,||
katamo bahutaro samayo yaṃ vā||
so pāṇaṃ atipāteti yaṃ vā||
so pāṇaṃ nātipātetī" ti?|| ||
"Yo so bhante puriso pāṇ-ā-tipātī,||
rattiyā vā||
divasassa vā||
samayāsamayaṃ upādāya||
appataro so samayo yaṃ||
so pāṇaṃ atipāteti.|| ||
Atha kho so va bahutaro samayo yaṃ||
so pāṇaṃ nātipātetī" ti.|| ||
"'Yaṃ bahulaṃ yaṃ bahulañ ca gāmaṇi viharati tena tena nīyyatī' ti.|| ||
Evaṃ sante na koci āpāyiko Nerayiko bhavissati||
yathā Nigaṇṭhassa Nātaputtassa vacanaṃ.|| ||
■
Taṃ kim maññasi gāmaṇi?|| ||
Yo so puriso adinn'ādāyī,||
rattiyā vā||
divasassa vā||
samayāsamayaṃ upādāya||
katamo bahutaro samayo yaṃ vā||
so adinnaṃ ādiyati yaṃ vā||
so adinnaṃ nādiyatī" ti?|| ||
"Yo so bhante puriso adinn'ādāyī||
rattiyā vā||
divasassa vā||
samayāsamayaṃ upādāya,||
appataro so samayo yaṃ||
so adinnaṃ ādiyati.|| ||
Atha kho so va bahutaro samayo yaṃ so adinnaṃ nādiyatī" ti.|| ||
"'Yaṃ bahulaṃ yaṃ bahulañ ca gāmaṇi viharati tena tena nīyyatī' ti.|| ||
Evaṃ sante na koci āpāyiko Nerayiko bhavissati||
yathā Nigaṇṭhassa Nātaputtassa vacanaṃ.|| ||
■
Taṃ kim maññasi gāmaṇi?|| ||
Yo so puriso kāmesu micchā-cārī,||
rattiyā vā||
divasassa vā||
samayāsamayaṃ upādāya||
katamo bahutaro samayo yaṃ vā||
so kāmesu micchā carati yaṃ vā||
so kāmesu micchā na caratī" ti?|| ||
"Yo so bhante puriso kāmesu micjācārī,||
rattiyā vā||
divasassa vā||
samayāsamayaṃ upādāya||
appataro so samayo yaṃ||
so kāmesu micchā carati.|| ||
Atha kho sova bahutaro samayo yaṃ so kāmesu micchā na cara" ti.|| ||
"'Yaṃ bahulaṃ yaṃ bahulañca gāmaṇi viharati tena tena [319] nīyayatī' ti.|| ||
Evaṃ sante na koci āpāyiko Nerayiko bhavissati||
yathā Nigaṇṭhassa Nātaputtassa vacanaṃ.|| ||
■
Taṃ kim maññasi gāmaṇi?|| ||
Yo so puriso musā-vādī||
rattiyā vā||
divasassa vā||
samayāsamayaṃ upādāya||
katamo bahutaro samayo yaṃ vā||
so musā bhaṇati yaṃ vā||
so musā na bhaṇatī" ti?|| ||
"Yo so bhante puriso musā-vādī||
rattiyā vā||
divasassa vā||
samayāsamayaṃ upādāya appataro||
so samayo yaṃ||
so musā bhaṇati.|| ||
Atha kho sova bahutaro samayo yaṃ so musā na bhaṇatī" ti.|| ||
"'Yaṃ bahulaṃ yaṃ bahulañca gāmaṇi viharati tena tena nīyyatī' ti.|| ||
Evaṃ sante na koci āpāyiko Nerayiko bhavissati||
yathā Nigaṇṭhassa Nātaputtassa vacanaṃ.|| ||
§
Idha gāmaṇi ekacco Satthā evaṃ-vādī hoti||
evaṃ diṭṭhi:|| ||
'Yo koci pāṇam atipāteti sabbo so āpāyiko Nerayiko.|| ||
Yo koci adinnam ādiyati sabbo so āpāyiko Nerayiko.|| ||
Yo koci kāmesu micchā carati sabbo so āpāyiko Nerayiko.|| ||
Yo koci musā bhaṇati sabbo so āpāyiko Nerayiko.'|| ||
Tasmiṃ kho pana gāmaṇi satthari sāvako abhi-p-pasanno hoti.|| ||
Tassa evaṃ hoti:|| ||
'Mayhaṃ kho Satthā evaṃ vādī evaṃ diṭṭhi:|| ||
"Yo koci pāṇam atipāteti sabbo so āpāyiko Nerayiko" ti.|| ||
Atthi kho pana mayā pāṇo atipātito.|| ||
Aham pi āpāyiko Nerayiko' ti,|| ||
diṭṭhiṃ paṭilabhati.|| ||
Taṃ gāmaṇi vācaṃ a-p-pahāya||
taṃ cittaṃ a-p-pahāya||
taṃ diṭṭhiṃ appaṭi-nissajjitvā||
yathā hataṃ nikkhitto evaṃ Niraye.|| ||
■
'Mayhaṃ kho Satthā evaṃ vādī evaṃ diṭṭhi:|| ||
"Yo koci adinnaṃ ādiyati sabbo so āpāyiko Nerayiko" ti.|| ||
Atthi kho pana mayā adinnaṃ ādinnaṃ.|| ||
Aham pamhi āpāyiko Nerayiko' ti,|| ||
diṭṭhiṃ paṭilabhati.|| ||
Taṃ gāmaṇi vācaṃ a-p-pahāya||
taṃ cittaṃ a-p-pahāya||
taṃ diṭṭhiṃ appaṭi-nissajjitvā||
yathā hataṃ nikkhitto evaṃ Niraye.|| ||
■
'Mayhaṃ kho Satthā evaṃ vādī evaṃ diṭṭhi:|| ||
"Yo koci kāmesu micachā carati, sabbo [320] so āpāyiko Nerayiko" ti.|| ||
Atthi kho pana mayā kāmesu micchā ciṇṇaṃ.|| ||
Aham pamhi āpāyiko Nerayiko' ti,|| ||
diṭṭhiṃ paṭilabhati.|| ||
Taṃ gāmaṇi vācaṃ a-p-pahāya||
taṃ cittaṃ a-p-pahāya||
taṃ diṭṭhiṃ appaṭi-nissajjitvā||
yathā hataṃ nikkhitto evaṃ Niraye.|| ||
■
'Mayhaṃ kho Satthā evaṃ vādī evaṃ diṭṭhi:|| ||
"Yo koci musā bhaṇati sabbo so āpāyiko Nerayiko" ti.|| ||
Atthi kho pana mayā kāmesu micchāciṇṇaṃ.|| ||
Aham pamhi āpāyiko Nerayiko' ti,|| ||
diṭṭhiṃ paṭilabhati.|| ||
Taṃ gāmaṇi vācaṃ a-p-pahāya||
taṃ cittaṃ a-p-pahāya||
taṃ diṭṭhiṃ appaṭi-nissajjitvā||
yathā hataṃ nikkhitto evaṃ Niraye.|| ||
§
Idha pana gāmaṇi Tathāgato loke uppajjati||
arahaṃ||
Sammā Sambuddho||
vijjā-caraṇa-sampanno||
Sugato||
loka-vidū||
anuttaro purisa-damma-sārathī||
Satthā deva-manussānaṃ||
Buddho||
Bhagavā.|| ||
So aneka pariyāyena pāṇ-ā-tipātaṃ garahati vigarahati||
pāṇ-ā-tipātā-viramathāti cāha,||
adinnādānaṃ garahati vigarahati||
ādinnādānā viramathāti cāha||
kāmesu micchā-cāraṃ garahati vigarahati||
kāmesu micchā-cārā viramathāti cāha,||
musā-vādaṃ garahati vigarahati||
musā-vādā viramathāti cāha.|| ||
Tasmiṃ kho pana gāmaṇi satthari sāvako abhi-p-pasanno hoti,||
so iti paṭisañcikkhati:|| ||
'Bhagavā kho aneka-pariyāyena||
pāṇ-ā-tipātaṃ garahati vigarahati:|| ||
"Pāṇ-ā-tipātā viramathāti cāha".|| ||
Atthi kho pana mayā pāṇo atipātito||
yāvatako vā||
tāvatako vā;||
taṃ na suṭṭhu||
taṃ na sādhu.|| ||
Ahañ c'eva kho pana ta-p-paccayā vippaṭisārī assaṃ||
"na me taṃ pāpakaṃ kammaṃ akataṃ bhavissatī"' ti|| ||
So iti paṭisaṇkhāya taṃ c'eva pāṇ-ā-tipātaṃ pajahati,||
āyatiñ ca pāṇ-ā-tipātā paṭivirato hoti;||
evam etassa pāpassa kammassa pahānaṃ hoti,||
evam etassa pāpassa kammassa samati-k-kamo hoti.|| ||
■
'Bhagavā kho aneka-pariyāyena||
adinnādānaṃ garahati vigarahati:|| ||
"Adinn'ādāna viramathāti cāha".|| ||
Atthi kho pana mayā adinnaṃ ādinnaṃ||
yāvatakaṃ vā||
tāvatakaṃ vā;||
taṃ na suṭṭhu||
taṃ na sādhu.|| ||
Ahañ c'eva kho pana ta-p-paccayā vippaṭisārī assaṃ||
"na me taṃ pāpakaṃ kammaṃ akataṃ bhavissatī"' ti|| ||
So iti paṭisaṇkhāya taṃ c'eva [321] adinnādānaṃ pajahati,||
āyatiñ ca adinn'ādānā paṭivirato hoti;||
evam etassa pāpassa kammassa pahānaṃ hoti,||
evam etassa pāpassa kammassa samati-k-kamo hoti.|| ||
■
'Bhagavā kho aneka-pariyāyena kāmesu micchā-cāraṃ garahati vigarahati:|| ||
"Kāmesu micchā-cārā viramathāti cāha".|| ||
Atthi kho pana mayā kāmesu micchāciṇṇaṃ||
yāvatakaṃ vā||
tāvatakaṃ vā;||
taṃ na suṭṭhu||
taṃ na sādhu.|| ||
Ahañ c'eva kho pana ta-p-paccayā vippaṭisārī assaṃ||
"na me taṃ pāpakaṃ kammaṃ akataṃ bhavissatī"' ti|| ||
So iti paṭisaṇkhāya taṃ c'eva kāmesu micchā-cāraṃ pajahati,||
āyatiñ ca kāmesu micchā-cārā paṭivirato hoti;||
evam etassa pāpassa kammassa pahānaṃ hoti,||
evam etassa pāpassa kammassa samati-k-kamo hoti.|| ||
■
'Bhagavā kho aneka-pariyāyena musā-vādaṃ garahati vigarahati:|| ||
"Musāvadā viramathāti cāha".|| ||
Atthi kho pana mayā musā bhaṇitaṃ||
yāvatakaṃ vā||
tāvatakaṃ vā;||
taṃ na suṭṭhu||
taṃ na sādhu.|| ||
Ahañ c'eva kho pana ta-p-paccayā vippaṭisārī assaṃ||
"na me taṃ pāpakaṃ kammaṃ akataṃ bhavissatī"' ti|| ||
So iti paṭisaṇkhāya taṃ c'eva musā-vādaṃ pajahati,||
āyatiñ ca musā-vādā paṭivirato hoti;||
evam etassa pāpassa kammassa pahānaṃ hoti,||
evam etassa pāpassa kammassa samati-k-kamo hoti.|| ||
So pāṇ-ā-tipātaṃ pahāya||
pāṇ-ā-tipātā paṭivirato hoti.|| ||
Adinn'ādānaṃ pahāya||
adinn'ādānā paṭivirato hoti.|| ||
Kāmesu micchā-cāraṃ pahāya||
kāmesu micchā-cārā paṭivirato hoti.|| ||
Musā-vādaṃ pahāya||
musā-vādā paṭivirato hoti.|| ||
Pisuṇā-vācaṃ pahāya||
pisuṇāyavācāya paṭivirato hoti.|| ||
Pharusaṃvācaṃ pahāya||
pharusāya vācāya paṭivirato hoti.|| ||
Sampha-p-palāpaṃ pahāya||
sampha-p-palāpā paṭivirato hoti.|| ||
Abhijjhaṃ pahāya||
anabhijjhālū hoti.|| ||
Vyāpāda-dosaṃ [322] pahāya||
avyāpanna-citto hoti.|| ||
Micchā-diṭṭhiṃ pahāya||
sammā-diṭṭhiko hoti.|| ||
§
Sa kho so gāmaṇi ariya-sāvako||
evaṃ vigat-ā-bhijjho||
vigata-vyāpādo||
asammūḷho||
sampajāno||
patissato||
mettā-saha-gatena cetasā ekaṃ disaṃ pharitvā viharati,||
tathā dutiyaṃ,||
tathā tatiyaṃ,||
tathā catutthiṃ;||
iti uddham-adhotiriyaṃ||
sabbadhi||
sabbattatāya||
sabbā-vantaṃ lokaṃ||
mettā-saha-gatena cetasā vipulena||
mahaggatena||
appamāṇena||
averena||
avyāpajjhena||
pharitvā viharati.|| ||
Seyyathā pi gāmaṇi balavā saṇkha-dhamo||
appakasireṇeva catu-d-disā viññāpeyya,||
evam eva kho gāmaṇi||
evaṃ bhāvitāya mettāya ceto-vimuttiyā||
evaṃ bahulī-katāya yaṃ pamāṇakataṃ kammaṃ||
na taṃ tatrāvasissati,||
na taṃ tatrāvatiṭṭhati.|| ||
■
Sa kho so gāmaṇi ariya-sāvako||
evaṃ vigat-ā-bhijjho||
vigata-vyāpādo||
asammūḷho||
sampajāno||
patissato||
karuṇā-saha-gatena cetasā ekaṃ disaṃ pharitvā viharati,||
tathā dutiyaṃ,||
tathā tatiyaṃ,||
tathā catutthiṃ;||
iti uddham-adhotiriyaṃ||
sabbadhi||
sabbattatāya||
sabbā-vantaṃ lokaṃ||
karuṇā-saha-gatena cetasā vipulena||
mahaggatena||
appamāṇena||
averena||
avyāpajjhena||
pharitvā viharati.|| ||
Seyyathā pi gāmaṇi balavā saṇkha-dhamo||
appakasiren'eva catu-d-disā viññāpeyya,||
evam eva kho gāmaṇi||
evaṃ bhāvitāya karuṇāya ceto-vimuttiyā||
evaṃ bahulī-katāya yaṃ pamāṇakataṃ kammaṃ||
na taṃ tatrāvasissati,||
na taṃ tatrāvatiṭṭhati.|| ||
Sa kho so gāmaṇi ariya-sāvako||
evaṃ vigat-ā-bhijjho||
vigata-vyāpādo||
asammūḷho||
sampajāno||
patissato||
muditā-saha-gatena cetasā ekaṃ disaṃ pharitvā viharati,||
tathā dutiyaṃ,||
tathā tatiyaṃ,||
tathā catutthiṃ;||
iti uddham-adhotiriyaṃ||
sabbadhi||
sabbattatāya||
sabbā-vantaṃ lokaṃ||
muditā-saha-gatena cetasā vipulena||
mahaggatena||
appamāṇena||
averena||
avyāpajjhena||
pharitvā viharati.|| ||
Seyyathā pi gāmaṇi balavā saṇkha-dhamo||
appakasiren'eva catu-d-disā viññāpeyya,||
evam eva kho gāmaṇi||
evaṃ bhāvitāya muditāya ceto-vimuttiyā||
evaṃ bahulī-katāya yaṃ pamāṇakataṃ kammaṃ||
na taṃ tatrāvasissati,||
na taṃ tatrāvatiṭṭhati.|| ||
Sa kho so gāmaṇi ariya-sāvako||
evaṃ vigat-ā-bhijjho||
vigata-vyāpādo||
asammūḷho||
sampajāno||
patissato||
upekhāsaha-gatena cetasā ekaṃ disaṃ pharitvā viharati,||
tathā dutiyaṃ,||
tathā tatiyaṃ,||
tathā catutthiṃ;||
iti uddham-adhotiriyaṃ||
sabbadhi||
sabbattatāya||
sabbā-vantaṃ lokaṃ||
upekhāsaha-gatena cetasā vipulena||
mahaggatena||
appamāṇena||
averena||
avyāpajjhena||
pharitvā viharati.|| ||
Seyyathā pi gāmaṇi balavā saṇkha-dhamo||
appakasiren'eva catu-d-disā viññāpeyya,||
evam eva kho gāmaṇi||
evaṃ bhāvitāya upekhāya ceto-vimuttiyā||
evaṃ bahulī-katāya yaṃ pamāṇakataṃ kammaṃ||
na taṃ tatrāvasissati,||
na taṃ tatrāvatiṭṭha" ti.|| ||
Evaṃ vutte Asibandhaka-putto gāmaṇī Bhagavantaṃ etad avoca:|| ||
"Abhikkantaṃ bhante!|| ||
Abhikkantaṃ bhante!
Seyyathā pi bhante nikkujjitaṃ vā ukkujjeyya,||
paṭi-c-channaṃ vā vivareyya||
mūḷahassa vā Maggaṃ ācikkheyya,||
andha-kāre vā tela-pajjotaṃ dhāreyya||
'cakkhu-manto rūpāni dakkhinti' ti.|| ||
Evam evaṃ Bhagavatā aneka-pariyāyena Dhammo pakāsito.|| ||
Es'āhaṃ bhante Bhagavantaṃ saraṇaṃ gacchāmi||
Dhammañ ca||
bhikkhu-saṇghañ ca,||
upāsakaṃ maṃ Bhagavā dhāretu ajja-t-agge pāṇupetaṃ saraṇaṃ gatan" ti.|| ||
