Saṃyutta Nikāya
4. Saḷāyatana Vagga
42. Gāmani Saṃyutta
Sutta 10
Manicūḷaka Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][than] Evaṃ me sutaṃ:|| ||
Ekaṃ samayaṃ Bhagavā Rājagahe viharati||
Veḷuvane Kalandakanivāpe.|| ||
Tena kho pana samayena||
rājantepure||
rājaparisāyaṃ||
sanni-sinnānaṃ||
sanni-patitānaṃ||
ayam antarā kathā udapādi:|| ||
"Kappati samaṇānaṃ Sakya-puttiyānaṃ jāta-rūpa-rajataṃ,||
sādiyanti samaṇā Sakya-puttiyā jāta-rūpa-rajataṃ.|| ||
Patigaṇhanti samaṇā Sakya-puttiyā jāta-rūpa-rajatan" ti.|| ||
Tena kho pana samayena Manicūḷako gāmaṇī tassaṃ parisāyaṃ nisinno hoti.|| ||
Atha kho Manicūḷako gāmaṇī taṃ parisaṃ etad avoca:|| ||
"Mā ayyā evaṃ avacuttha,||
na kappati samaṇānaṃ Sakya-puttiyānaṃ jāta-rūpa-rajataṃ,||
na sādiyanti samaṇā Sakya-puttiyā jāta-rūpa-rajataṃ,||
na patigaṇhanti samaṇā Sakya-puttiyā jāta-rūpa-rajataṃ,||
nikkhittamaṇi-suvaṇṇā samaṇā Sakya-puttiyā apetajāta-rūpa-rajatā" ti.|| ||
Asakkhi kho Manicūḷako gāmaṇi taṃ parisaṃ saññapetuṃ.|| ||
Atha kho Manicūḷako gāmaṇi yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā eka-m-antaṃ nisīdi.|| ||
[326] Eka-m-antaṃ nisinno kho Manicūḷako gāmaṇi Bhagavantaṃ etad avoca:|| ||
"Idha bhante rājantepure||
rājaparisāyaṃ||
sanni-sinnānaṃ||
sanni-patinānaṃ||
ayam antarā kathā udapādi:|| ||
'Kappati samaṇānaṃ Sakya-puttiyānaṃ jāta-rūpa-rajataṃ,||
sādiyanti samaṇā sākya-puttiyā jāta-rūpa-rajataṃ,||
patigaṇhanti samaṇā Sakya-puttiyā jāta-rūpa-rajatan' ti.|| ||
Evaṃ vuttāhaṃ bhante taṃ parisaṃ etad avoca:|| ||
'Mā ayyā evaṃ avacuttha,||
na kappati samaṇānaṃ Sakya-puttiyānaṃ jāta-rūpa-rajataṃ,||
na sādiyanti samaṇā Sakya-puttiyā jāta-rūpa-rajataṃ,||
na patigaṇhanti samaṇā Sakya-puttiyā jāta-rūpa-rajataṃ,||
nikkhittamaṇi-suvaṇṇā samaṇā Sakya-puttiyā apetajāta-rūpa-rajatā' ti.|| ||
Asakkhiṃ kho haṃ taṃ bhante parisaṃ saññapetuṃ.|| ||
Kacc'āhaṃ bhante evaṃ vyākaramāno vuttavādī c'eva Bhagavato homi.|| ||
Na ca Bhagavantaṃ abhūtena abbh'ācikkhāmi,||
Dhammassa c'ānudhammaṃ vyākaromi,||
na ca koci saha dhammiko vādānupāto gārayhaṃ ṭhānaṃ āga-c-chatī" ti.|| ||
"Taggha tvaṃ gāmaṇi||
evaṃ vyākaramāno vuttavādī c'eva me hosi,||
na ca maṃ abhūtena abbh'ācikkhasi,||
Dhammassa c'ānudhammaṃ vyākarosi,||
na ca koci saha-dhammiko vādānupāto gārayhaṃ ṭhānaṃ āgacchati.|| ||
Na hi kappati gāmaṇi samaṇānaṃ Sakya-puttiyānaṃ jāta-rūpa-rajataṃ,||
na sādiyanti samaṇā Sakya-puttiyā jāta-rūpa-rajataṃ,||
na patigaṇhanti samaṇā Sakya-puttiyā jāta-rūpa-rajataṃ,||
nikkhitta maṇisuvaṇṇā samaṇā sākya-puttiyā apetajāta-rūpa-rajatā.|| ||
Yassa kho gāmaṇi jāta-rūpa-rajataṃ kappati,||
pañca pi tassa kāma-guṇā kappanti.|| ||
Yassa pañcakāma-guṇā kappanti,||
ekaṃsen'etaṃ gāmaṇi dhāreyyāsi:||
'Assamaṇa-dhammo||
asakkiya-puttiya-dhammo' ti.|| ||
Api c'āhaṃ gāmaṇi evaṃ vadāmi:
Tiṇaṃ tiṇatthikena pariyesitabbaṃ,||
dāruṃ dārutthikena pariyesitabbaṃ,||
sakaṭaṃ sakaṭatthikena pariyesitabbaṃ||
puriso purisatthikena [327] pariyesitabbo.|| ||
Natvevāhaṃ gāmaṇi kenaci pariyāyena||
jāta-rūpa-rajataṃ sāditabbaṃ pariyesitabbanti vadāmī" ti.|| ||
