Saṃyutta Nikāya
4. Saḷāyatana Vagga
44. Avyākata Saṃyutta
Sutta 2
Anurādha Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][than][bodh] Evaṃ me sutaṃ:|| ||
Ekaṃ samayaṃ Bhagavā Vesāliyaṃ viharati Mahāvane Kūṭāgāra-sālāyaṃ.|| ||
Tena kho pana samayen'āyasmā Anurādho Bhagavato avidūre arañña-kuṭi-kāyaṃ viharati.|| ||
Atha kho sambahulā añña-titthiyā paribbājakā yen'āyasmā Anurādho ten'upasaṇkamiṃsu.|| ||
Upasaṇkamitvā āyasmatā Anurādhena saddhiṃ sammodiṃsu.|| ||
Sammodaniyaṃ kathaṃ sārāṇīyaṃ vīti-sāretvā eka-m-antaṃ nisīdiṃsu.|| ||
Eka-m-antaṃ nisinno kho te añña-titthiyā paribbājakā āyasmantaṃ Anurādhaṃ etad avocuṃ:|| ||
"Yo so āvuso Anurādha, Tathāgato uttama-puriso parama-puriso paramapattippatto,||
taṃ Tathāgato imesu catusu ṭhānesu paññā-payamāno paññāpeti:|| ||
'Hoti Tathāgato param maraṇā' ti vā.|| ||
'Na hoti Tathāgato param maraṇā' ti vā.|| ||
'Hoti ca na ca hoti Tathāgato param maraṇā' ti vā.|| ||
'N'eva hoti na na hoti Tathāgato param maraṇā' ti vā" ti.|| ||
■
"Yo so āvuso Tathāgato uttama-puriso parama-puriso paramapattippatto,||
taṃ Tathāgato aññatra imehi catūhi ṭhānehi paññā-payamāno paññāpeti:|| ||
'Hoti Tathāgato param maraṇā' ti vā.|| ||
'Na hoti Tathāgato param maraṇā' ti vā.|| ||
'Hoti ca na ca hoti Tathāgato param maraṇā' ti vā.|| ||
'N'eva hoti na na hoti Tathāgato param maraṇā' ti vā" ti.|| ||
■
Evaṃ vutte añña-titthiyā paribbājakā āyasmantaṃ Anurādhaṃ etad avocuṃ:|| ||
"So c'āyaṃ bhikkhu navo bhavissati acira-pabba-jito,||
thero vā pana bālo avyatto" ti.|| ||
Atha te añña-titthiyā paribbājanakā āyasmantaṃ Anurādhaṃ nava vādena ca bālavādena ca apasādetvā uṭṭhāy āsanā pakkamiṃsu.|| ||
§
[381] Atha kho āyasmato Anurādhassa acira-pakkantesu tesu añña-titthiyesu paribbājakesu etad ahosi:|| ||
"Sa ce kho maṃ te añña-titthiyā paribbājakā uttariṃ puccheyyuṃ.|| ||
Kathaṃ vyākaramāno nu khv'āhaṃ tesaṃ añña-titthiyānaṃ paribbājakānaṃ vuttavādī c'eva Bhagavato assaṃ,||
na ca Bhagavantaṃ abhūtena abbh'ācikkheyyaṃ,||
Dhammassa c'ānudhammaṃ vyākareyyaṃ.|| ||
Na ca koci saha-dhammiko vād'ānuvādo gārayhaṃ ṭhānaṃ āgaccheyyā" ti.|| ||
§
Atha kho āyasmā Anurādho yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinno kho āyasmā Anurādho Bhagavantaṃ etad avoca:|| ||
"Idh'āhaṃ bhante, Bhagavato avidūre arañña-kuṭi-kāyaṃ viharāmi,||
atha kho bhante sambahulā añña-titthiyā paribbājakā yenāhaṃ ten'upasaṇkamiṃsu.|| ||
Upasaṇkamitvā mama saddhiṃ sammodiṃsu,||
sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdiṃsu.|| ||
Eka-m-antaṃ nisinnā kho bhante añña-titthiyā paribbājakā maṃ etad avocuṃ:|| ||
'Yo so āvuso Anurādha, Tathāgato uttama-puriso parama-puriso paramapattippatto,||
taṃ Tathāgato imesu catusu ṭhānesu paññā-payamāno paññāpeti:|| ||
"Hoti Tathāgato param maraṇā" ti vā.|| ||
"Na hoti Tathāgato param maraṇā" ti vā.|| ||
"Hoti ca na ca hoti Tathāgato param maraṇā" ti vā.|| ||
"N'eva hoti na na hoti Tathāgato param maraṇā" ti vā' ti.|| ||
■
Evam vutto ham bhante te añña-titthiye paribbājake etad avocaṃ:|| ||
'Yo so āvuso Tathāgato uttama-puriso parama-puriso paramapattippatto,||
taṃ Tathāgato aññatra imehi catūhi ṭhānehi paññā-payamāno paññāpeti:|| ||
"Hoti Tathāgato param maraṇā" ti vā.|| ||
"Na hoti Tathāgato param maraṇā" ti vā.|| ||
"Hoti ca na ca hoti Tathāgato param maraṇā" ti vā.|| ||
"N'eva hoti na na hoti Tathāgato param maraṇā" ti vā" ti.|| ||
■
Evaṃ vutte añña-titthiyā paribbājakā āyasmantaṃ Anurādhaṃ etad avocuṃ:|| ||
'So c'āyaṃ bhikkhu navo bhavissati acira-pabba-jito,||
thero vā pana bālo avyatto' ti.|| ||
Atha kho mam bhante te añña-titthiyā paribbājanakā āyasmantaṃ nava vādena ca bālavādena ca apasādetvā uṭṭhāy āsanā pakkamiṃsu.|| ||
■
Tassa mayham bhante acira-pakkantesu tesu añña-titthi- [382] yesu paribbājakesu etad ahosi:|| ||
'Sa ce kho maṃ te añña-titthiyā paribbājakā uttariṃ puccheyyuṃ.|| ||
Kathaṃ vyākaramāno nu khv'āhaṃ tesaṃ añña-titthiyānaṃ paribbājakānaṃ vuttavādī c'eva Bhagavato assaṃ,||
na ca Bhagavantaṃ abhūtena abbh'ācikkheyyaṃ,||
Dhammassa c'ānudhammaṃ vyākareyyaṃ.|| ||
Na ca koci saha-dhammiko vād'ānuvādo gārayhaṃ ṭhānaṃ āgaccheyyā'" ti.|| ||
§
"Taṃ kim maññasi Anurādha?|| ||
Rūpaṃ niccaṃ vā aniccaṃ vā" ti?|| ||
"Aniccaṃ bhante".|| ||
"Yaṃ panāniccaṃ dukkhaṃ vā taṃ sukhaṃ vā" ti?|| ||
"Dukkhaṃ bhante."|| ||
"Yaṃ panāniccaṃ dukkhaṃ vipariṇāma-dhammaṃ kallannu taṃ samanupassituṃ:|| ||
'Etaṃ mama,||
eso ham asmi,||
eso me attā" ti?"|| ||
"No h'etaṃ bhante."|| ||
■
"Vedanā niccaṃ vā aniccaṃ vā" ti?|| ||
"Aniccaṃ bhante".|| ||
"Yaṃ panāniccaṃ dukkhaṃ vā taṃ sukhaṃ vā" ti?|| ||
"Dukkhaṃ bhante."|| ||
"Yaṃ panāniccaṃ dukkhaṃ vipariṇāma-dhammaṃ kallannu taṃ samanupassituṃ:|| ||
'Etaṃ mama,||
eso ham asmi,||
eso me attā'" ti?"|| ||
"No h'etaṃ bhante."|| ||
■
"Saññā niccaṃ vā aniccaṃ vā" ti?|| ||
"Aniccaṃ bhante".|| ||
"Yaṃ panāniccaṃ dukkhaṃ vā taṃ sukhaṃ vā" ti?|| ||
"Dukkhaṃ bhante."|| ||
"Yaṃ panāniccaṃ dukkhaṃ vipariṇāma-dhammaṃ kallannu taṃ samanupassituṃ:|| ||
'Etaṃ mama,||
eso ham asmi,||
eso me attā'" ti?"|| ||
"No h'etaṃ bhante."|| ||
■
"Saṇkhārā niccaṃ vā aniccaṃ vā" ti?|| ||
"Aniccaṃ bhante".|| ||
"Yaṃ panāniccaṃ dukkhaṃ vā taṃ sukhaṃ vā" ti?|| ||
"Dukkhaṃ bhante."|| ||
"Yaṃ panāniccaṃ dukkhaṃ vipariṇāma-dhammaṃ kallannu taṃ samanupassituṃ:|| ||
'Etaṃ mama,||
eso ham asmi,||
eso me attā'" ti?"|| ||
"No h'etaṃ bhante."|| ||
■
"Viññāṇaṃ niccaṃ vā aniccaṃ vā" ti?|| ||
"Aniccaṃ bhante".|| ||
"Yaṃ panāniccaṃ dukkhaṃ vā taṃ sukhaṃ vā" ti?|| ||
"Dukkhaṃ bhante."|| ||
"Yaṃ panāniccaṃ dukkhaṃ vipariṇāma-dhammaṃ kallannu taṃ samanupassituṃ:|| ||
'Etaṃ mama,||
eso ham asmi,||
eso me attā'" ti?|| ||
"No h'etaṃ bhante."|| ||
■
"Tasmātiha Anurādha, yaṃ kiñcirūpaṃ atīt-ā-nāgata pacc'uppannaṃ||
ajjhattaṃ vā bahiddhā vā||
oḷārikaṃ vā sukhumaṃ vā||
hīnaṃ vā paṇītaṃ vā||
yaṃ dūre santike vā,||
sabbaṃ rūpaṃ:|| ||
'N'etaṃ mama,||
n'eso ham asmi,||
na me so attā' ti.|| ||
Evam etaṃ yathā-bhūtaṃ samma-p-paññāya daṭṭhabbaṃ.|| ||
■
Yā kāci vedanā atīt-ā-nāgata pacc'uppannaṃ||
ajjhattaṃ vā bahiddhā vā||
oḷārikaṃ vā sukhumaṃ vā||
hīnaṃ vā paṇītaṃ vā||
yaṃ dūre santike vā,||
sabbaṃ vedanaṃ:|| ||
'N'etaṃ mama,||
n'eso ham asmi,||
na me so attā' ti.|| ||
Evam etaṃ yathā-bhūtaṃ samma-p-paññāya daṭṭhabbaṃ.|| ||
■
Yā kāci saññā atīt-ā-nāgata pacc'uppannaṃ||
ajjhattaṃ vā bahiddhā vā||
oḷārikaṃ vā sukhumaṃ vā||
hīnaṃ vā paṇītaṃ vā||
yaṃ dūre santike vā,||
sabbaṃ saññā:|| ||
'N'etaṃ mama,||
n'eso ham asmi,||
na me so attā' ti.|| ||
Evam etaṃ yathā-bhūtaṃ samma-p-paññāya daṭṭhabbaṃ.|| ||
■
Ye keci saṇkhārā atīt-ā-nāgata pacc'uppannaṃ||
ajjhattaṃ vā bahiddhā vā||
oḷārikaṃ vā sukhumaṃ vā||
hīnaṃ vā paṇītaṃ vā||
yaṃ dūre santike vā,||
sabbaṃ saṇkhārā:|| ||
'N'etaṃ mama,||
n'eso ham asmi,||
na me so attā' ti.|| ||
Evam etaṃ yathā-bhūtaṃ samma-p-paññāya daṭṭhabbaṃ.|| ||
■
Yaṃ kiñci viññāṇaṃ atīt-ā-nāgata pacc'uppannaṃ||
ajjhattaṃ vā bahiddhā vā||
oḷārikaṃ vā sukhumaṃ vā||
hīnaṃ vā paṇītaṃ vā||
yaṃ dūre santike vā,||
sabbaṃ viññāṇaṃ:|| ||
'N'etaṃ mama,||
n'eso ham asmi,||
[383] na me so attā' ti.|| ||
Evam etaṃ yathā-bhūtaṃ samma-p-paññāya daṭṭhabbaṃ.|| ||
■
Evaṃ passaṃ Anurādha, sutavā ariya-sāvako||
rūpasmim pi nibbindati,||
vedanāya pi nibbindati,||
saññāya pi nibbindati,||
saṇkhāresu pi nibbindati,||
viññāṇasmim pi nibbindati,||
nibbindaṃ virajjati.|| ||
Virāgā vimuccati vimuttasmiṃ||
vimuttamiti ñāṇaṃ hoti:|| ||
'Khīṇā jāti||
Vusitaṃ Brahma-cariyaṃ,||
kataṃ karaṇīyaṃ,||
nāparaṃ itthattāyā' ti pajānāti.|| ||
§
"Taṃ kiṃ maññasi Anurādha?|| ||
'Rūpaṃ Tathāgato' ti||
samanupassasī" ti?|| ||
"No h'etaṃ bhante."|| ||
■
"'Vedanaṃ Tathāgato'||
ti samanupassasī" ti?|| ||
"No h'etaṃ bhante."|| ||
■
"'Saññaṃ Tathāgato'||
ti samanupassasī" ti?|| ||
"No h'etaṃ bhante."|| ||
■
"'Saṇkhāre Tathāgato'||
ti samanupassasī" ti?|| ||
"No h'etaṃ bhante."|| ||
■
"'Viññāṇaṃ Tathāgato'||
ti samanupassasī" ti?|| ||
"No h'etaṃ bhante."|| ||
■
"Taṃ kiṃ maññasi Anurādha?|| ||
'Rūpasmiṃ Tathāgato'||
ti samanupassasī" ti?|| ||
"No h'etaṃ bhante."|| ||
■
"'Aññatra rūpā Tathāgato'||
ti samanupassasī" ti?|| ||
"No h'etaṃ bhante."|| ||
■
"'Vedanāya Tathāgato'||
ti samanupassasī" ti?|| ||
"No h'etaṃ bhante."|| ||
■
"'Aññatra vedanāya Tathāgato'||
ti samanupassasī" ti?|| ||
"No h'etaṃ bhante."|| ||
■
"'Saññāya Tathāgato'||
ti samanupassasī" ti?|| ||
"No h'etaṃ bhante."|| ||
■
"'Aññatra saññāya Tathāgato'||
ti samanupassasī" ti?|| ||
"No h'etaṃ bhante."|| ||
■
"'Saṇkhāresu Tathāgato'||
ti samanupassasī" ti?|| ||
"No h'etaṃ bhante."|| ||
■
"'Aññatra saṇkhārehi Tathāgato'||
ti samanupassasī" ti?|| ||
"No h'etaṃ bhante."|| ||
■
"'Viññāṇasmiṃ Tathāgato'||
ti samanupassasī" ti?|| ||
"No h'etaṃ bhante."|| ||
■
"'Aññatra viññāṇā Tathāgato'||
ti samanupassasī" ti?|| ||
"No h'etaṃ bhante."|| ||
■
"Taṃ kiṃ maññasi Anurādha?|| ||
Rūpaṃ Tathāgato'||
ti samanupassasī" ti?|| ||
"No h'etaṃ bhante."|| ||
■
"'Vedanaṃ Tathāgato'||
ti samanupassasī" ti?|| ||
"No h'etaṃ bhante."|| ||
■
"'Saññaṃ Tathāgato'||
ti samanupassasī" ti?|| ||
"No h'etaṃ bhante."|| ||
■
"'Saṇkhāre Tathāgato'||
ti samanupassasī" ti?|| ||
"No h'etaṃ bhante."|| ||
■
"'Viññāṇaṃ Tathāgato'||
ti samanupassasī" ti?|| ||
[384] "No h'etaṃ bhante."|| ||
■
"Taṃ kiṃ maññasi Anurādha?|| ||
Ayaṃ so arūpī||
avedano||
asaññī||
asaṇkhāro||
aviññāṇo Tathāgato'||
ti samanupassasī" ti?|| ||
"No h'etaṃ bhante."|| ||
■
"Ettha te Anurādha, diṭṭhe'va dhamme saccato thetato.|| ||
Tathāgate anupalabbhiyamāne Kallannu te taṃ vyākaraṇāya:|| ||
"Yo so āvuso Tathāgato uttama-puriso parama-puriso parama-pattipatto,||
taṃ Tathāgato aññatiramehi catūhi ṭhānehi paññā-payamāno paññāpeti.|| ||
'Hoti Tathāgato param maraṇā' ti vā||
'na hoti Tathāgato param maraṇā' ti vā||
'hoti ca na ca hoti Tathāgato param maraṇā' ti vā||
'n'eva hoti na na hoti Tathāgato param maraṇā' ti vā" ti?|| ||
"No h'etaṃ bhante"|| ||
"Sādhu sādhu Anurādha,||
pubbe c'āhaṃ Anurādha,||
etarahi ca dukkhañc'eva paññā-pemi||
dukkhassa ca nirodhan" ti.|| ||
