Avijjā Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][than][bodh] Evam me sutaṃ:|| ||

Ekaṃ samayam Bhagavā Sāvatthiyaṃ viharati Jetavane Anāthapindikassa ārāme.|| ||

Tatra kho Bhagavā bhikkhū āmantesi:||
"Bhikkhavo" ti.|| ||

"Bhadante" ti te bhikkhū Bhagavato paccassosuṃ.|| ||

Bhagavā etad avoca:|| ||

"Avijjā bhikkhave pubbaṇgamā||
akusalānaṃ dhammānaṃ samāpattiyā||
anu-d-eva ahirikaṃ anottappaṃ.

Avijjā-gatassa bhikkhave aviddasuno||
micchā-diṭṭhi pahoti.|| ||

Micchā-diṭṭhissa micchā-saṇkappo pahoti.|| ||

Micchā-saṇkappassa micchā-vācā pahoti.|| ||

Micchā-vācassa micchā-kammanto pahoti.|| ||

Micchā-kammantassa micchā-ājīvo pahoti.|| ||

Micchā-ājīvassa micchā-vāyāmo pahoti.|| ||

Micchā-vāyāmassa micchā-sati pahoti.|| ||

Micchā-satissa micchā-samādhi pahoti.|| ||

Vijjā ca kho bhikkhave pubbaṇgamā kusalānaṃ dhammānaṃ samāpattiyā anu-d-eva hir'ottappaṃ.|| ||

Vijjāgatassa [2] bhikkhave viddasuno sammā-diṭṭhi pahoti.|| ||

Sammā-diṭṭhissa sammā-saṇkappo pahoti.|| ||

Sammā-saṇkappassa sammā-vācā pahoti.|| ||

Sammā-vācassa sammā-kammanto pahoti.|| ||

Sammā-kammantassa sammā-ājīvo pahoti.|| ||

Sammā-ājīvassa sammā-vāyāmo pahoti.|| ||

Sammā-vāyāmassa sammā-sati pahoti.|| ||

Sammā-satissa sammā-samādhi pahotī" ti.|| ||