Saṃyutta Nikāya
5. Mahā-Vagga
45. Magga Saṃyutta
1. Avijjā Vagga

Sutta 10

Nandiya Suttaṃ

 

---

[11]

[1][pts][bodh] Evam me sutaṃ:|| ||

Ekaṃ samayam Bhagavā Sāvatthiyaṃ viharati Jetavane Anāthapindikassa ārāme.|| ||

Atha kho Nandiyo paribbājako yena Bhagavā ten'upasaṇkami.|| ||

Upasaṇkamitvā Bhagavatā saddhiṃ sammodi.|| ||

Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||

Eka-m-antaṃ nisinno kho Nandiyo paribbājako Bhagavantaṃ etad avoca:|| ||

"Kati nu kho bho Gotama,||
dhammā bhāvitā bahulī-katā Nibbānagamā honti||
Nibbānaparāyaṇā||
Nibbānapariyosānā" ti?|| ||

■

"Aṭṭha kho Nandiya,||
dhammā bhāvitā bahulī-katā Nibbānagamā honti||
Nibbānaparāyaṇā||
Nibbānapariyosānā.|| ||

Katame aṭṭha?|| ||

Sammā-diṭṭhi||
sammā-saṇkappo||
sammā-vācā||
sammā-kammanto||
sammā ājīvo||
sammā-vāyāmo||
sammā-sati||
sammā-samādhi.|| ||

Ime kho Nandiya,||
aṭṭha dhammā bhāvitā bahulī-katā Nibbānagamā honti||
Nibbānaparāyaṇā||
Nibbānapariyosānā" ti.|| ||

■

Evaṃ vutte Nandiyo paribbājako Bhagavantaṃ etad avoca:|| ||

"Abhikkantaṃ bho Gotama!|| ||

Abhikkantaṃ bho [12] Gotama!|| ||

Seyyathā pi bho Gotama,||
nikkujjitaṃ vā ukkujjeyya,||
paṭicchantaṃ vā vivareyya,||
mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rūpāni dakkhinti.

Evam evaṃ bhotā Gotamena aneka-pariyāyena Dhammo pakāsito.|| ||

Es'āhaṃ bhante, Bhagavantaṃ Gotamaṃ saraṇaṃ gacchāmi,||
Dhammañ ca||
bhikkhu-saṇghañ ca.|| ||

Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.

Avijjā Vagga Paṭhama