Akusala-Dhamma Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][bodh] Evam me sutaṃ:|| ||

Ekaṃ samayam Bhagavā Sāvatthiyaṃ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṃ.|| ||

Bhagavā etad avoca:|| ||

"Akusale ca vo bhikkhave, dhamme desissāmi||
kusale ca dhamme.|| ||

Taṃ suṇātha.|| ||

Katamañ ca bhikkhave, akusalā dhammā?|| ||

Seyyath'īdaṃ:|| ||

Micchā-diṭṭhi,||
micchā-saṇkappo,||
micchā-vācā,||
micchā-kammanto,||
micchā-ājīvo,||
micchā-vāyāmo,||
micchā-sati,||
micchā-samādhi.|| ||

Idaṃ vuccati bhikkhave, akusalā dhammā.|| ||

Katame ca bhikkhave, kusalā dhammā?|| ||

Seyyath'īdaṃ:|| ||

Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Idaṃ vuccati bhikkhave, kusalā dhammā" ti.|| ||