Saṃyutta Nikāya
5. Mahā-Vagga
46. Bojjhaṇga Saṃyutta
1. Pabbata Vagga
Namo tassa Bhagavato arahato Sammā Sambuddhassa
Sutta 1
Himavanta Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][than][bodh] Evam me sutaṃ:|| ||
Ekaṃ samayam Bhagavā Sāvatthiyaṃ viharati.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti||
te bhikkhū Bhagavato paccassosuṃ.|| ||
Bhagavā etad avoca:|| ||
"Himavantaṃ bhikkhave,||
pabba-tarājānaṃ nissāya||
nāgā kāyaṃ vaḍḍhenti||
balaṃ gāhenti.|| ||
Te tattha kāyaṃ vaḍḍhetvā||
balaṃ gāhetvā||
kussubbhe otaranti.|| ||
Kussubbhe otaritvā mahā-sobbhe otaranti.|| ||
Mahāsobbhe otaritvā kunnadiyo otaranti.|| ||
Kunnadiyo otaritvā mahā-nadiyo otaranti.|| ||
Mahānadiyo otaritvā mahā-samuddaṃ sāgaraṃ otaranti.|| ||
Te tattha mahantattaṃ vepullattaṃ āpajjanti kāyena.|| ||
■
Evam eva kho bhikkhave bhikkhu sīlaṃ nissāya||
sīle patiṭṭhāya||
satta-bojjh'aṇge bhāvento||
satta-bojjh'aṇge bahulī-karonto||
mahantattaṃ||
vepullattaṃ||
pāpuṇāti dhammesu.|| ||
Kathañ ca bhikkhave, bhikkhu sīlaṃ nissāya||
sīle patiṭṭhāya||
satta-bojjh'aṇge bhāvento||
satta-bojjh'aṇge bahulī-karonto||
mahantattaṃ||
vepullattaṃ||
pāpuṇāti dhammesu?|| ||
Idha bhikkhave, Bhikkhu||
sati-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
[64] Dhamma-vicaya-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
Viriya-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
Pīti-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
Passaddhi-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
Samādhi-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
Upekkhā-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
Evaṃ kho bhikkhave bhikkhu sīlaṃ nissāya||
sīle patiṭṭhāya||
satta-bojjh'aṇge bahulī-karonto||
mahantattaṃ||
vepullattaṃ||
pāpuṇāti dhammesū" ti.|| ||
