Saṃyutta Nikāya
5. Mahā-Vagga
46. Bojjhaṇga Saṃyutta
3. Udāyi Vagga
Sutta 27
Nirodha Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evam me sutaṃ:|| ||
Ekaṃ samayam Bhagavā Sāvatthiyaṃ viharati Jetavane Anāthapindikassa ārāme.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
"Yo bhikkhave, Maggo yā paṭipadā taṇhā-nirodhāya saṃvaṭṭati,||
taṃ Maggaṃ taṃ paṭipadaṃ bhāvetha.|| ||
Katamo ca bhikkhave, Maggo katamā ca paṭipadā taṇhā-nirodhāya saṃvaṭṭati?|| ||
Yad idaṃ satta-bojjh'aṇgā.|| ||
Katame satta?|| ||
Sati-sambojjh'aṇgo||
dhamma-vicaya-sambojjh'aṇgo||
viriya-sambojjh'aṇgo||
pīti-sambojjh'aṇgo||
passaddhi-sambojjh'aṇgo||
samādhi-sambojjh'aṇgo||
upekhā-sambojjh'aṇgo" ti.
"Kathaṃ bhāvitā ca bhikkhave satta bojjh'aṇgā||
kathaṃ bahulī-katā||
taṇhā-nirodhāya saṃvaṭṭanti?|| ||
"Idha Udāyi, Bhikkhu||
sati-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
■
Dhamma-vicaya-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
■
Viriya-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
■
Pīti-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
■
Passaddhi-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
■
Samādhi-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
■
Upekkhā-sambojjh'aṇgaṃ bhāveti,||
viveka-nissitaṃ,||
virāga-nissitaṃ,||
nirodha-nissitaṃ,||
vossagga-pariṇāmiṃ.|| ||
Evaṃ bhāvitā kho bhikkhave, satta bojjh'aṇgā||
evaṃ bahulī-katā||
taṇhā-nirodhāya saṃvaṭṭatī" ti.|| ||
