Saṃyutta Nikāya
5. Mahā-Vagga
47. Sati-Paṭṭhāna Saṃyutta
3. Sīla-ṭ-Ṭhiti Vagga
Sutta 29
Sirivaḍḍha Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evam me sutaṃ:|| ||
Ekaṃ samayaṃ āyasmā Rājagahe viharati Veḷuvane Kalandakanivāpe.|| ||
Tena kho pana samayena Sirivaḍḍho gahapati ābādhiko hoti dukkhito bāḷha-gilāno.|| ||
Atha kho Sirivaḍḍho gahapati||
aññataraṃ purisaṇ āmantesi:|| ||
"Ehi tvaṃ ambho purisa,||
yenāsmato Ānando ten'upasaṇkama,||
upasaṇkamitvā mama vacanena āyasmato Ānandassa pāde sirasā vanda:|| ||
'Sirivaḍḍho bhante Ānandassa pāde sirasā vandatī' ti.|| ||
Evañ ca vadehi:|| ||
'Sādhu kira bhante,||
āyasmā Ānando yena ca Sirivaḍḍhassa gahapatino nivesanaṃ||
ten'upasaṇkamatu||
anukampaṃ upādāyā'" ti.|| ||
"Evaṃ bhante" ti kho so puriso Sirivaḍḍhassa gahapatissa paṭi-s-sutvā yen'āyasmā Ānando ten'upasaṇkami.|| ||
Upasaṇkamitvā āyasmantaṃ Ānandaṃ abhivādetvā eka-m-antaṃ nisīdi.|| ||
Eka-m-antaṃ nisinno kho so puriso āyasmantaṃ Ānandaṃ etad avoca:|| ||
"Sirivaḍḍho bhante, gahapati ābādhiko dukkhito bāḷha-gilāno,||
so āyasmato Ānandassa pāde sirasā vandati,||
evañ ca vadeti:|| ||
'Sādhu kira bhante,||
āyasmā Ānando yena Sirivaḍḍhassa gahapatissa nivesanaṃ,||
ten'upasaṇkamatu,||
anukampaṃ upādāyā' ti.|| ||
[177] Adhivāsesi kho āyasmā Ānando tuṇhī-bhāvena.|| ||
Atha kho āyasmā Ānando pubbaṇha-samayaṃ nivāsetvā patta-cīvaram ādāya yena Sirivaḍḍhassa gahapatissa nivesanaṃ ten'upasaṇkami.|| ||
Upasaṇkamitvā paññatena āsane nisīdi.|| ||
Nisajja kho āyasmā Ānando Sirivaḍḍhaṃ gahapatiṃ etad avoca:|| ||
"Kacci te gahapati khamanīyaṃ,||
kacci yāpanīyaṃ,||
kacci dukkhā vedanā paṭi-k-kamanti||
no abhi-k-kamanti,||
paṭikkamosānaṃ paññāyati||
no abhi-k-kamo" ti?|| ||
"Na me bhante khamanīyaṃ,||
na yāpanīyaṃ bāḷhā me dukkhā vedanā abhi-k-kamanti||
no paṭi-k-kamanti,||
abhi-k-kam'osānaṃ paññāyati||
no paṭikkamo" ti.|| ||
"Tasmātiha te gahapati,||
evaṃ sikkhitabbaṃ:|| ||
'Kāye kāy'ānupassī viharissāmi||
ātāpī sampajāno satimā||
vineyya loke abhijjhā-domanassaṃ.|| ||
Vedanāsu vedan'ānupassī viharissāmi||
ātāpī sampajāno satimā||
vineyya loke abhijjhā-domanassaṃ.|| ||
Citte citt'ānupassī viharissāmi||
ātāpī sampajāno satimā||
vineyya loke abhijjhā-domanassaṃ.|| ||
Dhammesu Dhamm'ānupassī viharissāmi||
ātāpī sampajāno satimā||
vineyya loke abhijjhā-domanassaṃ.'|| ||
Evaṃ hi te gahapati sikkhitabban" ti.|| ||
"Ye me bhante, Bhagavatā cattāro sati-paṭṭhānā desitā,||
saṃvijjanti te dhammā mayi.|| ||
Ahañ ca tesu dhammesu sandissāmi.|| ||
Ahaṃ bhante, kāye kāy'ānupassī viharāmi||
ātāpī sampajāno satimā||
vineyya loke abhijjhā-domanassaṃ.|| ||
Vedanāsu vedan'ānupassī viharāmi||
ātāpī sampajāno satimā||
vineyya loke abhijjhā-domanassaṃ.|| ||
Citte citt'ānupassī viharāmi||
ātāpī sampajāno satimā||
vineyya loke abhijjhā-domanassaṃ.|| ||
Dhammesu Dhamm'ānupassī viharāmi||
ātāpī sampajāno satimā||
vineyya loke abhijjhā-domanassaṃ.|| ||
Yāni c'imāni bhante, Bhagavatā pañc'oram-bhāgiyāni saṃyojanāni desitāni,||
n-ā-haṃ tesaṇ kiñci attani a-p-pahīnaṃ samanupassāmī" ti.|| ||
"Lābhā te gahapati,||
su-laddhaṃ te gahapati,||
Anāgāmi-phalaṃ tayā gahapati,||
vyākatantī" ti.|| ||
