Saṃyutta Nikāya
5. Mahā-Vagga
48. Indriya Saṃyutta
7. Bodhi-Pakkhiya Vagga
Sutta 66
Satt'Ānisaṃsā Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayam Bhagavā Sāvatthiyaṃ viharati.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
"Pañc'imāni bhikkhave, indriyāni.|| ||
Katamāni pañca?|| ||
Saddh'indriyaṃ||
viriy'indriyaṃ||
sat'indriyaṃ||
samādh'indriyaṃ||
paññ'indriyaṃ.|| ||
Imāni kho bhikkhave, pañc'indriyāni.|| ||
Imesaṃ kho bhikkhave, pañcannaṃ indriyānaṃ||
bhāvitattā||
bahulī-katattā||
satta-phalā satta ānisaṃsā pāṭikaṇkhā.|| ||
Katame satta-phalā satta ānisaṃsā?|| ||
1. Diṭṭhe'va dhamme paṭigacca aññaṃ ārādheti.|| ||
2. No ce diṭṭhe'va dhamme paṭigacca aññaṃ ārādheti,||
atha māraṇa kāle aññaṃ ārādheti.|| ||
3. No ce diṭṭhe'va dhamme paṭigacca aññaṃ ārādheti||
no ce māraṇa kāle aññaṃ ārādheti,||
atha pañcannaṃ oram-bhāgiyānaṃ saṃyojanānaṃ parikkhayā||
antarā-parinibbāyī hoti.|| ||
4. No ce diṭṭhe'va dhamme paṭigacca aññaṃ ārādheti||
no ce māraṇa kāle aññaṃ ārādheti,||
no ce pañcannaṃ oram-bhāgiyānaṃ saṃyojanānaṃ parikkhayā||
antarā-parinibbāyī hoti||
atha upahacca parinibbāyī hoti.
5. No ce diṭṭhe'va dhamme paṭigacca aññaṃ ārādheti||
no ce māraṇa kāle aññaṃ ārādheti,||
no ce pañcannaṃ oram-bhāgiyānaṃ saṃyojanānaṃ parikkhayā||
antarā-parinibbāyī hoti||
no ce upahacca parinibbāyī hoti||
atha a-saṇkhāra parinibbāyī hoti.|| ||
6. No ce diṭṭhe'va dhamme paṭigacca aññaṃ ārādheti||
no ce māraṇa kāle aññaṃ ārādheti,||
no ce pañcannaṃ oram-bhāgiyānaṃ saṃyojanānaṃ parikkhayā||
antarā-parinibbāyī hoti||
no ce upahacca parinibbāyī hoti||
no ce a-saṇkhāra parinibbāyī hoti||
atha sa-saṇkhāra parinibbāyī hoti.|| ||
7. No ce diṭṭhe'va dhamme paṭigacca aññaṃ ārādheti||
no ce māraṇa kāle aññaṃ ārādheti,||
no ce pañcannaṃ oram-bhāgiyānaṃ saṃyojanānaṃ parikkhayā||
antarā-parinibbāyī hoti||
no ce upahacca parinibbāyī hoti||
no ce a-saṇkhāra parinibbāyī hoti||
no ce sa-saṇkhāra parinibbāyī hoti||
atha uddhaṃ-soto Akaniṭṭha-gāmī.|| ||
Imesaṃ kho bhikkhave, pañcannaṃ indriyānaṃ||
bhāvitattā||
bahulī-katattā||
ime satta-phalā sattānisaṃsā pāṭikaṇkhā" ti.|| ||
