Saṃyutta Nikāya
5. Mahā-Vagga
55. Sot'Āpatti Saṃyutta
1. Veḷu-Dvāra Vagga
Sutta 4
Paṭhama Sāriputta Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ āyasmā ca Sāriputto||
āyasmā ca Ānando||
Sāvatthiyaṃ viharanti||
Jetavane Anāthapiṇḍikassa ārāme.|| ||
Atha kho āyasmā Ānando sāyanha-samayaṃ paṭisallāṇā vuṭṭhito yen'āyasmā Sāriputto ten'upasaṇkami.|| ||
Upasaṇkamitvā āyasmatā Sāriputtena sadadhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
Eka-m-antaṃ nisinno kho āyasmā Ānando āyasmantaṃ Sāriputtaṃ etad avoca:|| ||
"Katinnaṃ nu kho āvuso Sāriputta||
dhammānaṃ samannā-gamana-hetu||
evam ayaṃ pajā Bhagavatā vyākatā Sot'āpannā||
avinipāta-dhammā niyatā sambodhi-parāyaṇā" ti?|| ||
[347] Catunnaṃ kho āvuso, dhammānaṃ samannā-gamana-hetu||
evam ayaṃ pajā Bhagavatā vyākatā Sot'āpannā||
avinipāta-dhammā niyatā sambodhi-parāyaṇā.|| ||
Katamesaṇ catunnaṃ?|| ||
Idh'āvuso, ariya-sāvako Buddhe avecca pasādena samannāgato hoti:|| ||
'Iti pi so Bhagavā||
arahaṃ||
Sammā Sambuddho||
vijjā-caraṇa-sampanno||
Sugato||
loka-vidu||
anuttaro purisa-damma-sārathī||
Satthā deva-manussānaṃ||
Buddho||
Bhagavā' ti.|| ||
Dhamme avecca pasādena samannāgato hoti:|| ||
'Svākkhāto Bhagavatā dhammo||
sandiṭṭhiko||
akāliko||
ehi passiko||
opanayiko||
paccattaṃ veditabbo viññūhī' ti.|| ||
Saṇghe avecca pasādena samannāgato hoti:|| ||
'Su-paṭipanno Bhagavato sāvaka-saṇgho,||
uju-paṭipanno Bhagavato sāvaka-saṇgho,||
ñāya-paṭipanno Bhagavato sāvaka-saṇgho,||
sāmīci-paṭipanno Bhagavato sāvaka-saṇgho,||
yad idaṃ cattāri purisa-yugāni||
aṭṭhapurisa-puggalā,||
esa Bhagavato sāvaka-saṇgho.|| ||
Āhuneyyo||
pāhuneyyo||
dakkhiṇeyyo||
añjali-karaṇīyo||
anuttaraṃ puññakettaṃ lokassā' ti.|| ||
Ariya-kantehi sīlehi samannāgato hoti||
akhaṇḍehi||
acchiddehi||
asabalehi||
akammāsehi||
bhujissehi||
viññ'uppasatthehi||
aparām-aṭṭhehi||
samādhi-saṃvaṭṭa-nikehi.|| ||
Imesaṃ kho āvuso, catunnaṃ dhammānaṃ samannā-gamana-hetu||
evam ayaṃ pajā Bhagavatā vyākatā Sot'āpannā||
avinipāta-dhammā niyatā sambodhi-parāyaṇā" ti.|| ||
