Saṃyutta Nikāya
5. Mahā-Vagga
55. Sot'Āpatti Saṃyutta
5. Sagātha-Puññā-Bhisanda Vagga

Sutta 42

Dutiya Abhisanda or Sahyaka or Asaṇkheyya Suttaṃ

 

---

[401]

[1][pts]Evam me sutaṃ:|| ||

Ekaṃ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṃ.|| ||

Bhagavā etad avoca:|| ||

"Cattāro me bhikkhave, puññ-ā-bhisandā||
kusal-ā-bhisandā||
sukhass'āhārā.|| ||

Katame cattāro?|| ||

Idha bhikkhave, ariya-sāvako Buddhe avecca pasādena samannāgato hoti:|| ||

'Iti pi so Bhagavā||
arahaṃ||
Sammā Sambuddho||
vijjā-caraṇa-sampanno||
Sugato||
loka-vidu||
anuttaro purisa-damma-sārathī||
Satthā deva-manussānaṃ||
Buddho||
Bhagavā' ti.

Ayaṃ paṭhamo puññ-ā-bhisando kusal-ā-bhisando sukhass'āhāro.|| ||

■

Dhamme avecca pasādena samannāgato hoti:|| ||

'Svākkhāto Bhagavatā dhammo||
sandiṭṭhiko||
akāliko||
ehi passiko||
opanayiko||
paccattaṃ veditabbo viññūhī' ti.|| ||

Ayaṃ dutiyo puññ-ā-bhisando kusal-ā-bhisando sukhass'āhāro.|| ||

■

Saṇghe avecca pasādena samannāgato hoti:|| ||

'Su-paṭipanno Bhagavato sāvaka-saṇgho,||
uju-paṭipanno Bhagavato sāvaka-saṇgho,||
ñāya-paṭipanno Bhagavato sāvaka-saṇgho,||
sāmīci-paṭipanno Bhagavato sāvaka-saṇgho,||
yad idaṃ cattāri purisa-yugāni||
aṭṭhapurisa-puggalā,||
esa Bhagavato sāvaka-saṇgho.|| ||

Āhuneyyo||
pāhuneyyo||
dakkhiṇeyyo||
añjali-karaṇīyo||
anuttaraṃ puññakettaṃ lokassā' ti.|| ||

Ayaṃ tatiyo puññ-ā-bhisando kusal-ā-bhisando sukhass'āhāro.|| ||

■

Puna ca paraṃ bhikkhave, ariya-sāvako vigata-mala-maccerena cetasā agāraṃ ajjhā-vasati.|| ||

Mutta-cāgo payata-pāṇī||
vossagga-rato||
yā cayogo||
dāna-saṃvibhāga-rato.|| ||

Ayaṃ catuttho puññ-ā-bhisando kusal-ā-bhisando sukhass'āhāro.|| ||

Ime kho bhikkhave, cattāro puññ-ā-bhisandā||
kusal-ā-bhisandā||
sukhass'āhārā.|| ||

Imehi kho bhikkhave, catūhi puññ-ā-bhisandehi||
kusal-ā-bhisandehi||
samannāgatassa||
ariya-sāvakassa na sukaraṃ||
puññassa||
pamāṇaṃ gaṇetuṃ.|| ||

'Ettako puññ-ā-bhisando||
kusal-ā-bhisando||
sukhass'āhāro' ti.|| ||

Atha kho 'asaṇkheyyo||
appameyyo||
mahā-puñña-k-khandho'||
tv'eva saṇkhaṃ gacchati.|| ||

Seyyathā pi, bhikkhave, yatthimā mahā-nadiyo saṃsandanti, samenti.|| ||

Seyyath'īdaṃ:||
Gaṇgā||
Yamunā||
Aciravatī||
Sarabhū||
Mahī.|| ||

Tattha na sukaraṃ udakassa pamāṇaṃ gaṇetuṃ, || ||

'ettakāni udak'āḷhakānī' ti vā||
'ettakāni udak'āḷhaka satānī' ti vā||
'ettakāni udak'āḷhaka-sahassānī' ti vā.|| ||

Atha kho 'asaṇkheyyo||
appameyyo||
mahā-udaka-k-khandho'||
tv'eva saṇkhaṃ gacchati.|| ||

Evam eva kho bhikkhave, imehi catūhi puññ-ā-bhisandehi||
kusal-ā-bhisandehi||
samannāgatassa||
ariya-sāvakassa na sukaraṃ puññassa pamāṇaṃ gaṇetuṃ,||
'ettako puññ-ā-bhisando||
kusal-ā-bhisando||
sukhass'āhāro' ti.|| ||

Atha kho asaṇkheyyo||
appameyyo||
mahā-puñña-k-khandho||
tv'eva saṇkhaṃ gacchatī'" ti.|| ||

Idam avoca Bhagavā.|| ||

 

---

 

Idaṃ vatvā Sugato athāparaṃ||
etad avoca Satthā:|| ||

"Mahodadhiṃ aparimitaṃ mahāsaraṃ,||
Bahubheravaṃ ratanagaṇānam ālayaṃ||
Najjo yathā naragaṇaSaṇghasevitā,||
Puthū savantī upayanti sāgaraṃ.|| ||

Evaṃ naraṃ annadapānavatthadaṃ||
Seyyānisajjattharaṇassa dāyakaṃ,||
Puññassa dhārā upayanti paṇaḍitaṃ||
Najjo yathā vārivahāva sāgaran" ti.|| ||