Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka Nipāta
III: Pañc'aŋgika Vagga

Sutta 21

Paṭhama Agārava Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[14]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"So vata bhikkhave bhikkhu agāravo appatisso asabhāgavuttiko:|| ||

'Sabrahma-cārīsu ābhisamā-cārikaɱ dhammaɱ paripuressatī' ti||
n'etaɱ ṭhānaɱ vijjāti.|| ||

'Ābhisamā-cārikaɱ [15] dhammaɱ aparipūretvā sekkhaɱ dhammaɱ paripūressatī' ti||
n'etaɱ ṭhānaɱ vijjati.|| ||

'Sekhaɱ dhammaɱ aparipūretvā sīlāni paripūressatī' ti||
n'etaɱ ṭhānaɱ vijjati.|| ||

'Sīlāni aparipūretvā sammā-diṭṭhiɱ paripūressatī' ti||
n'etaɱ ṭhānaɱ vijjati.|| ||

'Sammā-diṭṭhiɱ aparipūretvā sammā-samādhiɱ paripuressatī' ti||
n'etaɱ ṭhānaɱ vijjati.|| ||

2. So vata bhikkhave bhikkhu sagāravo sappatisso sabhāgavuttiko:|| ||

'Sabrahma-cārīsu ābhisamā-cārikaɱ dhammaɱ paripūressatī'||
ti ṭhāname taɱ vijjati.|| ||

'Ābhisamā-cārikaɱ dhammaɱ paripūretvā sekhaɱ dhammaɱ paripūressatī'||
ti ṭhāname taɱ vijjati.|| ||

'Sekhaɱ dhammaɱ paripūretvā sīlāni paripūressatī' ti||
ṭhāname taɱ vijjati.|| ||

'Sīlāni paripūretvā sammā-diṭaṭhiɱ paripūressatī' ti||
ṭhāname taɱ vijjati.|| ||

'Sammā-diṭṭhiɱ paripūretvā sammā-samādhiɱ paripūressatī'||
ti ṭhāname taɱ vijjati.

 


Contact:
E-mail
Copyright Statement