Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka Nipāta
III: Pañc'aŋgika Vagga

Sutta 30

Nāgita Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[30]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Kosalesu cārikaɱ cara-māno mahatā bhikkhu-saŋghena saddhiɱ yena Icchānangalaɱ nāma Kosalānaɱ brāhmaṇa-gāmo tad avasari.|| ||

Tatra sudaɱ Bhagavā Icchānaŋgale viharati Icchānangala-vana-saṇḍe.|| ||

Assosuɱ kho Icchānangalakā brāhmaṇa-gahapatikā:|| ||

"Samaṇo khalu bho Gotamo Sakya-putto Sakya-kulā pabba-jito Icchānangalaɱ anuppatto Icchānaŋgale viharati Icchānangala-vana-saṇḍe.|| ||

Taɱ kho pana bhavantaɱ Gotamaɱ evaɱ kalyāṇo kitti-saddo abbhu-g-gato:|| ||

'Iti pi so Bhagavā arahaɱ Sammā-sambuddho vijjā-caraṇa-sampanno Sugato loka-vidū anuttaro purisa-damma-sārathī Satthā deva-manussānaɱ Buddho Bhagavā' ti.|| ||

So imaɱ lokaɱ sa-devakaɱ sa-mārakaɱ sa-brahmakaɱ sa-s-samaṇa-brāhmaṇiɱ pajaɱ sa-deva-manussaɱ sayaɱ abhiññā sacci-katvā pavedeti.|| ||

So dhammaɱ deseti ādi-kalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañ janaɱ kevala-paripuṇṇaɱ parisuddhaɱ,||
brahma-cariyaɱ pakāseti.|| ||

Sādhu kho pana tathā-rūpānaɱ arahataɱ dassanaɱ hotī" ti.|| ||

Atha kho Icchānangalakā brāhmaṇa-gahapatikā tassā rattiyā accayena pahūtaɱ khādanīyaɱ bhojanīyaɱ ādāya yena Icchānangala-vana-saṇḍo ten'upasankamiɱsu.|| ||

Upasaŋkamitvā bahi-dvāra-koṭṭhake aṭṭhaɱsu uccā-saddā mahā-saddā.|| ||

[31] 2. Tena kho pana samayen'āyasmā Nāgito Bhagavato upaṭṭhāko hoti.|| ||

Atha kho Bhagavā āyasmantaɱ Nāgitaɱ āmantesi:|| ||

"Ke pan'ete Nāgita uccā-saddā mahā-saddā,||
kevaṭṭā maññe macche vilopen" ti?|| ||

"Ete bhante Icchānaɱgalakā brahmaṇa-gahapatikā pahutaɱ khādanīyaɱ bhojanīyaɱ ādāya bahi-dvāra-koṭṭhake ṭhitā Bhagavantaɱ yeva uddissa bhikkhu-Saŋghañ cā" ti.|| ||

"Māhaɱ Nāgita yasena samāgamaɱ,||
mā ca mayā yaso.|| ||

Yo kho Nāgita na-y-imassa nekkhamma-sukhassa paviveka-sukhassa upasama-sukhassa samkhodha-sukhassa nikāma-lābhī assa akiccha-lābhī akasira-lābhī,||
yassāhaɱ nekkhamma-sukhassa paviveka-sukhassa upasama-sukhassa sambodha-sukhassa nikāma-lābhi akiccha-lābhi akasira-lābhi,||
so taɱ mīḷha-sukhaɱ middha-sukhaɱ lābha-sakkāra-siloka-sukhaɱ sādiyeyyā" ti.|| ||

"Adhivāsetu dāni bhanne Bhagavā, adhivāsetu Sugato.|| ||

Adhivāsana-kālo dāni bhante Bhagavato.|| ||

Yena yen'eva dāni bhante Bhagavā gamissati,||
tanninnā'va bhavissanti brāhmaṇa gahapatikā negamā c'eva jāna-padā ca.|| ||

Seyyathā pi bhante thulla-phusitake deve vassante yathāninnaɱ udakāni pavattanti,||
evam eva kho bhante yena yen'eva dāni Bhagavā gamissati,||
tanninnā'va bhavissanti brāhmaṇa-gahapatikā negamā c'eva jāna-padā ca.|| ||

Taɱ kissa hetu?|| ||

Tathāhi bhante Bhagavato sīla-paññāṇan" ti.|| ||

Māhaɱ Nāgita yasena samāgamo,||
mā ca mayā yaso.|| ||

Yo kho Nāgita na-y-imassa nekkhamma-sukhassa paviveka-sukhassa upasama-sukhassa samkhodha-sukhassa nikāma-lābhī assa akiccha-lābhī akasira-lābhī,||
yassāhaɱ nekkhamma-sukhassa paviveka-sukhassa upasama-sukhassa sambodha-sukhassa nikāma-lābhi akiccha-lābhi akasira-lābhi,||
so taɱ mīḷha-sukhaɱ middha-sukhaɱ lābha-sakkāra-siloka-sukhaɱ sādiyeyyā.|| ||

[32] Asita-pīta-khāyita-sāyitassa kho Nāgita uccāra-passāvo.|| ||

Eso tassa nissando.|| ||

Piyānaɱ kho Nāgita viparinā-maññathā-bhāvā uppajjanti soka-parideva-dukkha-domanass'upāyāsā.|| ||

Eso tassa nissando.|| ||

Asubha-nimittānuyogaɱ anuyuttassa kho Nāgita subha-nimitte pāṭikkūlyatā saṇṭhāti.|| ||

Eso tassa nissando.|| ||

Chassu kho Nāgita phassāyatanesu anicc'ānupassīno viharato phasse pāṭikkūlyatā saṇṭhāti.|| ||

Eso tassa nissando.|| ||

Pañcasu kho Nāgita upādāna-k-khandhesu udayabbayānupassino viharato upādāne pāṭikkūlyatā saṇṭhāti.|| ||

Eso tassa nissando" ti.|| ||

Pañc'aŋgika Vagga Tatiya.

 


Copyright Statement