Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
Pañcaka-Nipāta
IV. Sumanā Vagga

Sutta 31

Sumanā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[32]

[1][pts][olds][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa Ārāme.|| ||

Atha kho sumanā rāja-kumārī pañcahi rathasatehi pañcahi rāja-kumārisatehi parivutā yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnā kho sumanā rāja-kumārī Bhagavantaɱ etad avoca:|| ||

Idhassu bhante Bhagavato dve sāvakā samasaddhā samasīlā samapaññā,||
eko dāyako eko adāyako,||
te kāyassa [33] bhedā param maraṇā sugatiɱ saggaɱ lokaɱ uppajjeyyuɱ,||
deva-bhūtānam pana n'esaɱ bhante siyā viseso siyā nānā-karaṇan ti?|| ||

Siyā Sumane'ti Bhagavā avoca.|| ||

Yo so Sumane dāyako,||
so amuɱ adāyakaɱ deva-bhūto samāno pañcahi ṭhānehi adhigaṇhāti.|| ||

Dibbena āyunā,||
dibbena vaṇṇena,||
dibbena sukhena,||
dibbena yasena,||
dibbena ādhipateyyena.|| ||

Yo so Sumane dāyako,||
so amuɱ adāyakaɱ deva-bhūto samāno imehi pañcahi ṭhānehi adhigaṇhāti.|| ||

Sace pana te bhante tato cutā itthattaɱ āga-c-chanti,||
manussa bhūtānaɱ pana tesaɱ bhante siyā viseso,||
siyā nānā-karaṇanti?|| ||

Siyā Sumaneti Bhagavā avoca.|| ||

Yo so Sumane dāyako,||
so amuɱ adāyakaɱ manussa-bhuto samāno pañcahi ṭhānehi adhigaṇhāti:||
mānusa-kena āyunā,||
mānusa-kena vaṇṇena,||
mānusa-kena sukhena|| ||

Mānusa-kena yasena,||
mānusa-kena ādhipateyyena.|| ||

Yo so Sumane dāyako,||
so amuɱ adāyakaɱ manussa-bhuto samāno imehi pañcahi ṭhānehi adhigaṇhāti.|| ||

Sace pana te bhante ubho agārasmā anagāriyaɱ pabbajanti,||
pabba-jitānaɱ pana n'esaɱ bhante siyā viseso siyā nānā-karaṇanti?|| ||

Siyā Sumaneti Bhagavā avoca.|| ||

Yo so Sumane dāyako,||
so amuɱ adāyakaɱ pabba-jito samāno pañcahi ṭhānehi adhigaṇhāti:||
yācito'va bahulaɱ cīvaraɱ paribhuñjati appaɱ ayācito.|| ||

Yācitova bahulaɱ piṇḍa-pātaɱ paribhuñjati,||
appaɱ ayācito.|| ||

Yācito'va bahulaɱ sen'āsanaɱ paribhuñjati,||
appaɱ ayācito.|| ||

Yācito'va bahulaɱ gilāna paccaya bhesajja-parikkhāraɱ paribhuñjati,||
appaɱ ayācito:|| ||

Ye hi kho pana sabrahma-cārīhi saddhiɱ viharati,||
tyāssa manāpen'eva bahulaɱ kāya-kammena samud'ācaranti,||
appaɱ amanāpena,||
manāpen'eva bahulaɱ vacī-kammena samud'ācaranti,||
appaɱ amanāpena,||
manāpen'eva bahulaɱ mano-kammena samud'ācaranti,||
appaɱ amanāpena.|| ||

Manāpaɱ yeva upahāraɱ upaharanti,||
appaɱ [34] amanāpaɱ yo so Sumane dāyako,||
so amuɱ adāyakaɱ pabba-jito samāno imehi pañcahi ṭhānehi adhigaṇhāti.|| ||

Sace pana te bhante ubho Arahattaɱ pāpuṇanti,||
Arahattappantānaɱ pana n'esaɱ bhante siyā viseso siyā nānā-karaṇan ti?|| ||

Ettha kho pan'esāɱ Sumane na kiñci nānā-karaṇaɱ vadāmi yad idaɱ vimuttiyā vimuttin ti.|| ||

Acchariyaɱ bhante,||
abbhutaɱ bhante.|| ||

Yāvañ cidaɱ bhante alam eva dānāni dātuɱ,||
alaɱ puññāni kātuɱ,||
yatra hi nāma deva-bhūtassa pi upakārāni puññāni,||
manussa-bhutassa pi upakārāni puññāni,||
pabba-jitassa pi upakārāni puññānīti.|| ||

Idam avoca Bhagavā idaɱ vatvā Sugato athāparaɱ etad avoca Satthā:|| ||

 

Yathā pi cando vimalo gacchaɱ ākāsa-dhātuyā||
Sabbe tārā gaṇe loke ābhāya atirocati,||
Tath'eva sīla-sampanno saddho purisa-puggalo||
Sabbe maccharino loke cāgena atirocati.|| ||

Yathā pi megho thanayaɱ vijjumālī satakkaku||
Thalaɱ ninnaɱ ca pūreti abhivassaɱ vasundharaɱ,||
Evaɱ dassana sampanno sammā sambuddha-sāvako||
Macchariɱ adhigaṇhāti pañca-ṭhānehi paṇḍito:||
Āyunā yasasā veca vaṇṇena ca sukhena ca||
Sace bhoga paribbūḷho pecca sagge pamodatī ti|| ||

 


Contact:
E-mail
Copyright Statement