Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
Pañcaka-Nipāta
IV. Sumanā Vagga

Sutta 32

Cundī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[35]

[1][pts][bodh] Evaɱ me sutaɱ.|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

Atha kho Cundī rāja-kumārī pañcahi rathasatehi pañcahi kumāri satehi parivutā yena Bhagavā ten'upasankami.

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnā kho cundī rāja-kumārī Bhagavantaɱ etad avoca:|| ||

2. Amhākaɱ bhante bhātā Cundo nāma rāja-kumāro.|| ||

So evam āha:|| ||

"Yad'eva so hoti itthī vā puriso vā Buddhaɱ saraṇaɱ gato,||
dhammaɱ saraṇaɱ gato,||
saḍghaɱ saraṇaɱ gato,||
pāṇāti-pātā paṭivirato,||
adinn'ādānā paṭivirato,||
kāmesu micchā-cārā paṭivirato,||
musā-vādā paṭivirato,||
surā-mera-yamajja-pamā-daṭṭhānā paṭivirato,||
so kāyassa bhedā param maraṇā sugatiɱ yeva uppajjati, no duggatin' ti."|| ||

Sāhaɱ bhante Bhagavantaɱ pucchāmi:|| ||

'Kathaɱ-rūpe nu kho bhante Satthari pasanno kāyassa bhedā param maraṇā sugatiɱ yeva uppajjati,||
no duggatiɱ ti?|| ||

Sāhaɱ bhante Bhagavantaɱ pucchāmi:|| ||

'Kathaɱ-rūpe nu kho bhante dhamme pasanno kāyassa bhedā param maraṇā sugatiɱ yeva uppajjati,||
no duggatiɱ ti?|| ||

'Kathaɱ-rūpe nu kho bhante saŋghe pasanno kāyassa bhedā param maraṇā sugatiɱ yeva uppajjati,||
no duggatiɱ ti?|| ||

'Kathaɱ-rūpesu sīlesu paripūra-kāri kāyassa bhedā param maraṇā sugatiɱ yeva uppajjati,||
no duggatiɱ ti?|| ||

3. Yāvatā Cundi sattā apadā vā dipadā vā catuppadā vā bahuppadā vā,||
rūpino vā arūpino vā,||
saññino vā asaññino vā n'eva-saññi-nā-saññino vā,||
Tathāgato tesaɱ aggam akkhāyati arahaɱ Sammā-sambuddho.|| ||

Ye kho Cundī Buddhe pasannā,||
agge te pasannā.|| ||

Agge kho pana pasannānaɱ aggo vipāko hoti.|| ||

Yāvatā Cundī dhammā saɱkhatā vā asaɱkhatā vā,||
virāgo tesaɱ aggam akkhāyati,||
yad idaɱ madanimmadano pipāsa-vinayo ālaya-samugghāto vaṭṭūpacchedo taṇhakkhayo virāgo nirodho Nibbānaɱ.|| ||

Ye kho [36] Cundī virāge dhamme pasannā.|| ||

Agge te pasannā,||
agge kho pana pasannānaɱ aggo vipāko hoti.|| ||

Yāvatā Cundī saŋghā vā gaṇā vā,||
Tathāgata-sāvaka-saŋgho tesaɱ aggam akkhāyati,||
yad idaɱ cattāri purisa-yugāni aṭṭha purisa-puggalā.|| ||

Esa Bhagavato sāvaka-saŋgho āhuneyyo pāhuneyyo dakkhiṇeyyo añjali-karaṇīyo anuttaraɱ puñña-k-khettaɱ lokassa.|| ||

Ye kho Cundī saɱghe pasannā,||
agge te pasannā,||
agge kho pana pasannānaɱ aggo vipāko hoti.|| ||

Yāvatā Cundī sīlāni,||
ariya-kantāni tesaɱ aggam akkhāyati,||
yad idaɱ akhaṇaŋḍāni acchiddāni asa-balāni akammā-sāni bhujissāni viññuppa-satthāni aparām-aṭṭhāni samādhi saŋvatta-nikāni.|| ||

Ye kho Cundī ariya kantesu sīlesu paripūra-kārino,||
agge te paripūra-kārino.|| ||

Agge kho pana paripūra-kārīnaɱ aggo vipāko hotī ti.|| ||

Aggato ve pasannānaɱ aggaɱ dhammaɱ vijānataɱ||
Agge Buddhe pasannānaɱ dakkhiṇeyye anuttare,||
Agge dhamme pasannānaɱ virāg'ūpasame sukhe||
Agge saɱghe pasannānaɱ puñña-k-khette anuttare,||
Aggasmiɱ dānaɱ dadataɱ aggaɱ puññaɱ pavaḍḍhati||
Aggaɱ āyuva vaṇṇo ca yaso kitti sukhaɱ balaɱ||
Aggassa dātā medhāvī agga-dhamma-samāhito||
Devabhūto manusso vā aggappatto pamodatī ti.|| ||

 


Copyright Statement