Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
Pañcaka-Nipāta
IV. Sumanā Vagga

Sutta 33

Uggaho Meṇḍakanattā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[36]

[1][pts][bodh] Evaɱ me sutaɱ.|| ||

Ekaɱ samayaɱ Bhagavā bhaddiye viharati Jātiyā vane.|| ||

Atha kho Uggaho Meṇḍakanattā yena Bhagavā tenupaŋkami.|| ||

Upasaŋkamitvā Bhagavannaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Uggaho Meṇaŋakanattā Bhagavantaɱ etad avoca:|| ||

2. "Adhivāsetu me bhante Bhagavā svātanāya attacatuttho [37] bhattan" ti.|| ||

Adhivāsesi Bhagavā tuṇhī-bhāvena.|| ||

Atha kho Uggaho Meṇḍakanattā Bhagavato adhivāsanaɱ viditvā uṭṭhāy āsanā Bhagavantaɱ abhivādetvā padakkhiṇaɱ katvā pakkāmi.|| ||

Atha kho Bhagavā tassā rattiyā accayena pubbaṇha-samayaɱ nivāsetvā patta-cīvaram ādāya yena Uggahassa Meṇḍakanattuno nivesanaɱ ten'upasankami.|| ||

Upasaŋkamitvā paññatte āsane nisīdi.|| ||

Atha kho Uggaho Meṇḍakanattā Bhagavannaɱ paṇītena khādanīyena bhojanīyena sahatthā santappesi sampavāresi.|| ||

Atha kho Uggaho Meṇḍakanattā Bhagavantaɱ bhuttāviɱ onīta-patta-pāṇiɱ eka-m-antaɱ nisīdi.|| ||

Eka-m-antaɱ nisinno kho Uggaho Meṇḍakanattā Bhagavantaɱ etad avoca:|| ||

"Imā me bhante kumāriyo patikulāni gamissanti.|| ||

Ovadatu tāsaɱ bhante Bhagavā,||
anusāsatu tāsaɱ bhante Bhagavā,||
yaɱ tāsaɱ assa dīgha-rattaɱ hitāya sukhāyā" ti.|| ||

Atha kho Bhagavā tā kumāriyo etad avoca:|| ||

3. Tasmā ti ha kumāriyo evaɱ sikkhitabbaɱ:|| ||

'Yassa mātā pitaro bhattuno dassanti attha-kāmā hitesino anukampakā anukampaɱ upādāya,||
tassa bhavissāma pubb'uṭṭhāyiniyo pacchā-nipātiniyo kiɱkārapaṭissāviniyo manāpacāriniyo piyavādiniyo' ti.|| ||

Evaɱ hi vo kumāriyo sikkhitabbaɱ.|| ||

Tasmā ti ha kumāriyo evaɱ sikkhitabbaɱ:|| ||

'Ye te bhattu garuno bhavissanti mātā ti vā pitā ti vā samaṇa-brāhmaṇā ti vā,||
te sakkarissāma garukarissāma,||
mānissāma,||
pūjessāma,||
abbhāgate ca āsanodakena patipūjessāmā' ti.|| ||

Evaɱ hi vo kumāriyo sikkhitabbaɱ.|| ||

Tasmā ti ha kumāriyo evaɱ sikkhitabbaɱ:|| ||

'Ye te bhattu abbhantarā kammantā uṇṇā ti vā kappāsā ti vā,||
tattha dakkhā bhavissāma analasā,||
tatrūpāyāya vimaɱsāya samannāgatā alaɱ kātuɱ alaɱ saɱvidhātun' ti.|| ||

Evaɱ hi vo kumāriyo sikkhitabbaɱ.|| ||

Tasmā ti ha kumāriyo evaɱ sikkhitabbaɱ:|| ||

'Yo so bhantu abbhantaro antojano,||
dāsā ti vā pessā ti [38] vā kamma-karā ti vā,||
tesaɱ katañ ca katato jānissāma,||
akatañ ca akatato jānissāma,||
gilāna-kānañ ca bal-ā-balaɱ jānissāma,||
khādanīyaɱ bhojanīyaɱ c'assa paccaɱsena vibhajissāmā' ti.|| ||

Evaɱ hi vo kumāriyo sikkhitabbaɱ.|| ||

Tasmā ti ha kumāriyo evaɱ sikkhitabbaɱ:|| ||

'Yaɱ bhattā āharissati dhanaɱ vā dhaññaɱ vā rajataɱ vā jāta-rūpaɱ vā,||
taɱ ārakkhena guttiyā sampādessāma||
tattha ca bhavissāma adhuttī athenī asoṇḍī avināsikāyo' ti.|| ||

Evaɱ hi vo kumāriyo sikkhitabbaɱ.|| ||

Imehi kho kumāriyo pañcahi dhammehi samannāgato mātu-gāmo kāyassa bhedā param maraṇā manāpa-kāyikānaɱ devānaɱ saha-vyataɱ uppajjatī" ti.|| ||

Yo naɱ bharati sabbadā niccaɱ ātāpi ussuko||
Sabba-kāmaharaɱ posaɱ bhattāraɱ nātimaññeti.|| ||

Na cāpi sotthi bhattāraɱ issā-vādena rosaye||
Bhattu ca garuno sabbe paṭipujeti paṇḍitā.|| ||

Uṭṭhāhikā analasā saɱgahīta-parijjanā||
Bhattu manāpāɱ carati sambhataɱ anurakkhati.|| ||

Yā evaɱ vattatī nāri bhattu chanda-vasānugā||
Manāpā nāma te devā yattha sā upapajjatī ti.|| ||

 


Copyright Statement