Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
Pañcaka-Nipāta
IV. Sumanā Vagga

Sutta 34

Sīha-Senāpati Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[38]

[1][pts][than][olds][bodh] Evaɱ me sutaɱ:|| ||

Ekaɱ samayaɱ Bhagavā Vesālisaɱ viharati Mahāvane kūṭā-gāra sālāyaɱ.|| ||

Atha kho sīho senāpati yena [39] Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisidi. || ||

Eka-m-antaɱ nisinno kho sīho senāpati Bhagavantaɱ etad avoca:|| ||

Sakkā nu kho bhante sandiṭṭhikaɱ dāna-phalaɱ paññāpetun ti?|| ||

Sakkā sīhāti Bhagavā avoca.|| ||

Dāyako Sīha dāna-pati bahuno janassa piyo hoti manāpo.|| ||

Yam pi Sīha dāyako dāna-pati bahuno janassa piyo hoti manāpo,||
idam pi sandiṭṭhikaɱ dāna-phalaɱ.|| ||

Puna ca paraɱ Sīha dāyakaɱ dāna-patiɱ santo sappurisā bhajanti.|| ||

Yam pi Sīha dāyakaɱ dāna-patiɱ santo sappurisā bhajanti,||
idam pi sandiṭṭhikaɱ dāna-phalaɱ.|| ||

Puna ca paraɱ Sīha dāyakassa dāna-patino kalyāṇo kitti-saddo abbhu-g-gacchati.|| ||

Yam pi Sīha dāyakassa dāna-patino kalyāṇo kitti-saddo abbhu-g-gacchati,||
idam pi sandiṭṭhikaɱ dāna-phalaɱ.|| ||

Puna ca paraɱ Sīha dāyako dāna-pati yaɱ yad eva parisaɱ upasankamati.|| ||

Yadi khattiya-parisaɱ,||
yadi brāhmaṇa-parisaɱ,||
yadi gahapati-parisaɱ,||
yadi samaṇa-parisaɱ,||
visāradova upasankamati amaŋku-bhuto.|| ||

Yam pi Sīha dāyako dāna-pati yaɱ yad eva-parisaɱ upasankamati:||
yadi khattiya-parisaɱ,||
yadi brāhmaṇa-parisaɱ,||
yadi gahapati parisaɱ,||
yadi samaṇa-parisaɱ,||
visāradova upasaḍkamati amaŋku-bhuto:||
idam pi sandiṭṭhi-kāɱ dāna-phalaɱ.|| ||

Puna ca paraɱ Sīha dāyako dāna-pati kāyassa bhedā param maraṇā sugatiɱ saggaɱ lokaɱ uppajjati.|| ||

Yam pi Sīha dāyako dāna-pati kāyassa bhedā param maraṇā sugatiɱ saggaɱ lokaɱ uppajjati.|| ||

Idaɱ samparāyikaɱ dāna-phalanti.|| ||

Evaɱ vutte sīho senāpati Bhagavantaɱ etad avoca:|| ||

"Yān'imāni bhante Bhagavatā cattāri sandiṭṭhi-kāni dāna-phalāni akkhātāni,||
nāhaɱ ettha Bhagavato saddhāya gacchāmi,||
ahampetāni jānāmi.|| ||

Ahaɱ bhante dāyako dāna-pati bahuno janassa piyo manāpo.|| ||

Ahaɱ bhante dāyako dāna-pati.|| ||

Maɱ santo sappurisā bhajanti.|| ||

Ahaɱ bhante dāyako dāna-pati,||
mayhaɱ kalyāṇo kitti-saddo ababhuggato:|| ||

sīho senāpati dāyako kārako saŋgh'upaṭṭhāko ti.|| ||

Ahaɱ [40] bhante dāyako dāna-pati,||
yaɱ yad eva parisaɱ upasankamāmi:||
yadi khattiya-parisaɱ,||
yadi brāhmaṇa-parisaɱ,||
yadi gahapati parisaɱ,||
yadi samaṇa-parisaɱ,||
visāradova upasankamāmi amaŋku-bhuto.|| ||

Yān'imāni bhante Bhagavatā cattāri sandiṭṭhi-kāni dāna-phalāni akkhātāni,||
nāhaɱ ettha Bhagavato saddhāya gacchāmi,||
ahampetāni jānāmi.|| ||

Yañ ca kho maɱ bhante Bhagavā evam āha:|| ||

'Dāyako Sīha dāna-pati kāyassa bhedā param maraṇā sugatiɱ saggaɱ lokaɱ upapajjatī'ti etāhaɱ na jānāmi.|| ||

Ettha va pan'āhaɱ Bhagavato saddhāya gacchāmī" ti.|| ||

Evam etaɱ Sīha,||
eva me taɱ Sīha,||
dāyako dāna-pati kāyassa bhedā param maraṇā sugatiɱ saggaɱ lokaɱ upapajjatī ti.|| ||

 

Dadaɱ piyo hoti bhajanti naɱ bahū kittiñ ca pappoti yaso ca vaḍḍati,||
amaŋku-bhuto parisaɱ vigāhati visārado,||
hoti naro amaccharī.|| ||

Tasmā hi dānāti dadanti paṇḍitā,||
vineyya macchera-malaɱ sukhesino,||
te dīgha-rattaɱ tidive patiṭṭhitā devānaɱ sahavygatā ramanti te||
katāvāsā kata-kusalā ito cutā sayaɱpabhā anuvicaranti Nandanaɱ.|| ||

Te tattha nandanti ramanti modare samappitā kāma-guṇehi pañcahi||
katvāna vākyaɱ asitassa tādino ramanti sagge Sugatassa sāvakā ti.|| ||

 


Copyright Statement