Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka Nipāta
5. Muṇḍarāja-Vagga

Sutta 44

Manāpadāyī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[49]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgāra-sālāyaɱ.|| ||

Atha kho Bhagavā pubbatha-samayaɱ nivāsetvā patta-cīvaram ādāya yena Uggassa gahapatino Vesālikassa nivesanaɱ ten'upasankami.|| ||

Upasaŋkamitvā paññatte āsane nisīdi.|| ||

Atha kho Uggo gahapati Vesāliko yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Uggo gahapati Vesāliko Bhagavantaɱ etad avoca:|| ||

2. "Sammukhā me taɱ bhante Bhagavato sutaɱ,||
sammukhā paṭiggahītaɱ||
'manāpadāyī labhate manāpan' ti.|| ||

Manāpaɱ me bhante sāla-pupphakaɱ khādanīyaɱ.|| ||

Taɱ me Bhagavā patigaṇhātu anukampaɱ upādāyā ti.|| ||

Paṭiggahesi Bhagavā anukampaɱ upādāya.|| ||

"Sammukhā me taɱ bhante Bhagavato sutaɱ,||
sammukhā paṭiggahītaɱ||
'manāpadāyī labhate manāpan' ti.|| ||

Manāpaɱ me bhante sampanna-kolakaɱ sūkara-maɱsaɱ.|| ||

Taɱ me Bhagavā patigaṇhātu anukampaɱ upādāyā' ti.|| ||

Paṭiggahesi Bhagavā anukampaɱ upādāya.|| ||

"Sammukhā me taɱ bhante Bhagavato sutaɱ,||
sammukhā paṭiggahītaɱ||
'manāpadāyī labhate manāpan' ti.|| ||

Manāpaɱ me bhante nibbaddha-telakaɱ nāliya-sākaɱ.|| ||

Taɱ me Bhagavā patigaṇhātu anukampaɱ upādāyā" ti.|| ||

Paṭiggahesi Bhagavā anukampaɱ upādāya.|| ||

"Sammukhā me taɱ bhante Bhagavato sutaɱ,||
sammukhā paṭiggahītaɱ||
'manāpadāyī labhate manāpan' ti.|| ||

Manāpaɱ me bhante sālīnaɱ odano vicita-kāḷako aneka-sūpo aneka-vyañjano.|| ||

Taɱ me Bhagavā patigaṇhātu anunampaɱ upādāyā" ti.|| ||

Paṭiggahesi Bhagavā anukampaɱ upādāya.|| ||

[50] "Sammukhā me taɱ bhante Bhagavato sutaɱ,||
sammukhā paṭiggahītaɱ||
'manāpadāyī labhate manāpan' ti.|| ||

Manāpaɱ me bhante kāsikāni vatthāni.|| ||

Tāni me Bhagavā patigaṇhātu anukampaɱ upādāyā" ti.|| ||

Paṭiggahesi Bhagavā anukampaɱ upādāya.|| ||

"Sammukhā me taɱ bhante Bhagavato sutaɱ,||
sammukhā paṭiggahītaɱ||
'manāpadāyī labhate manāpan' ti.|| ||

Manāpaɱ me bhante pallaŋko goṇa-katthato paṭikatthato paṭali-katthato kādali-miga-pavara-paccattha-raṇo sa-uttaracchado ubhato lohita-kūpadhāno.|| ||

Api ca bhante mayam p'etaɱ jānāma 'n'etaɱ Bhagavato kappatī' ti,||
idaɱ me bhante candana-phalakaɱ agghati adhikasahassaɱ.|| ||

Taɱ me Bhagavā patigaṇhātu anukampaɱ upādāyā" ti.|| ||

Paṭiggahesi Bhagavā anukampaɱ upādāya.|| ||

 

§

 

Atha kho Bhagavā Uggaɱ gahapatiɱ Vesālikaɱ iminā anumodanīyena anumodi:|| ||

Manāpadāyī labhate manāpaɱ yo ujju-bhūtesu dadāti chandasā,||
Acchādanaɱ sayanaɱ ath'annapānaɱ nāna-p-pakārāni ca paccayāni.|| ||

Cattañ ca muttañ ca anaggahītaɱ khettūpame arahante viditvā,||
So duccajaɱ sappuriso cajitvā manāpadāyī labhate manāpan ti.|| ||

 

§

 

Atha kho Bhagavā Uggaɱ gahapatiɱ Vesālikaɱ iminā anumodanīyena anumo-ditvā uṭṭhāy āsanā pakkāmi.|| ||

Atha kho Uggo gahapati Vesāliko aparena samayena kālam akāsi.|| ||

Kālakato ca Uggo gahapati Vesāliko aññataraɱ mano-mayaɱ kāyaɱ upapajjī.|| ||

Tena kho pana samayena Bhagavā Sāvatthiyaɱ viharati Jetavane Anāthapiṇḍikassa Ārāme.|| ||

Atha kho Uggo deva-putto abhikkantāya rattiyā abhikkanta-vaṇṇo kevala-kap- [51] paɱ Jetavanaɱ obhāsetvā yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhitaɱ kho Uggaɱ deva-puttaɱ Bhagavā etad avoca:|| ||

'Kacci te Ugga yathādhippāyo' ti?|| ||

'Taggha me bhante yathādhippāyo' ti.|| ||

Atha kho Bhagavā Uggaɱ deva-puttaɱ gāthāhi ajjhabhāsi:|| ||

Manāpa-dāyī labhate manāpaɱ,||
Aggassa dātā labhate pun'aggaɱ,||
Varassa dātā vara-lābhi hoti,||
Seṭṭhaɱ dado seṭṭham upeti ṭhānaɱ.|| ||

Aggadāyī varadāyī seṭṭha-dāyī ca yo naro,||
Dīghāyu yasavā hoti yattha yatth'upapajjatī" ti.|| ||


Copyright Statement