Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka Nipāta
5. Muṇḍarāja-Vagga

Sutta 45

Puññābhisanda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[51]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

2. Pañc'ime bhikkhave puññ-ā-bhisandā kusal-ā-bhisandā sukhass'āhārā sovaggikā sukha-vipākā sagga-saŋvatta-nikā iṭṭhāya kantāya manāpāya hitāya sukhāya saŋvattanti.|| ||

Katame pañca?|| ||

3. Yassa bhikkhave bhikkhu cīvaraɱ paribhuñjamāno appamāṇaɱ ceto-samādhiɱ upasampajja viharati,||
appamāṇo tassa puññ-ā-bhisando kusal-ā-bhisando sukhass'āhāro sovaggiko sukha-vipāko sagga-saŋvatta-niko iṭṭhāya kantāya manāpāya hitāya sukhāya saŋvattati.|| ||

Yassa bhikkhave bhikkhu piṇḍa-pātaɱ paribhuñjamāno appamāṇaɱ ceto-samādhiɱ upasampajja viharati,||
appamāṇo tassa puññ-ā-bhisando kusal-ā-bhisando sukhass'āhāro sovaggiko sukha-vipāko sagga-saŋvatta-niko iṭṭhāya kantāya manāpāya hitāya sukhāya saŋvattati.|| ||

Yassa bhikkhave bhikkhu vihāraɱ paribhuñjamāno appamāṇaɱ ceto-samādhiɱ upasampajja viharati,||
appamāṇo tassa puññ-ā-bhisando kusal-ā-bhisando sukhass'āhāro sovaggiko sukha-vipāko sagga-saŋvatta-niko iṭṭhāya kantāya manāpāya hitāya sukhāya saŋvattati.|| ||

Yassa bhikkhave bhikkhu mañca-pīṭhaɱ paribhuñjamāno appamāṇaɱ ceto-samādhiɱ upasampajja viharati,||
appamāṇo tassa puññ-ā-bhisando kusal-ā-bhisando sukhass'āhāro sovaggiko sukha-vipāko sagga-saŋvatta-niko iṭṭhāya kantāya manāpāya hitāya sukhāya saŋvattati.|| ||

Yassa bhikkhave bhikkhu gilāna-pacchaya-bhesajja-parikkhāraɱ paribhuñjamāno appamāṇaɱ ceto-samādhiɱ [52] upasampajja viharati,||
appamāṇo tassa puññ-ā-bhisando kusal-ā-bhisando sukhass'āhāro sovaggiko sukha-vipāko sagga-saŋvatta-niko iṭṭhāya kantāya manāpāya hitāya sukhāya saŋvattati.|| ||

Ime kho bhikkhave pañca puññ-ā-bhisandā kusal-ā-bhisandā sukhass'āhārā sovaggikā sukha-vipākā sagga-saŋvatta-nikā iṭṭhāya kantāya manāpāya hitāya sukhāya saŋvattanti.|| ||

 

§

 

4. Imehi ca pana bhikkhave pañcahi puññ-ā-bhisandehi kusal-ā-bhisandehi samannāgatassa ariya-sāvakassa na sukaraɱ puññassa pamāṇaɱ gahetuɱ:|| ||

"Ettako puññāhisando kusal-ā-bhisando sukhass'āhāro sovaggiko sukha-vipāko sagga-saŋvatta-niko iṭṭhāya kantāya manāpāya hitāya sukhāya saŋvattatī" ti.|| ||

Atha kho asaŋkheyyo appameyyo mahā-puñña-k-khandho tv'eva saŋkhaɱ gacchati.|| ||

Seyyathā pi, bhikkhave, mahasamudde na sukaraɱ udakassa pamāṇaɱ gahetuɱ|| ||

'Ettakāni udak'āḷhakānīti vā||
ettakāni udak'āḷhaka-satānīti vā||
ettakāni udak'āḷhaka sata-sahassānī' ti vā.|| ||

Atha kho asaŋkheyyo appameyyo mahā-udaka-k-khandho tv'eva saŋkhaɱ gacchati.|| ||

Evam eva kho bhikkhave imehi pañcahi puññ-ā-bhisandehi kusal-ā-bhisandehi samannāgatassa ariya-sāvakassa na sukaraɱ puññassa pamāṇaɱ gahetuɱ|| ||

'Ettako puññ-ā-bhisando kusal-ā-bhisando sukhass'āhāro sovaggiko sukha-vipāko sagga-saŋvatta-niko iṭṭhāya kantāya manāpāya hitāya sukhāya saŋvattatī' ti.|| ||

Atha kho asaŋkheyyo appameyyo mahā-puñña-k-khandho tv'eva saŋkhaɱ gacchatī ti.|| ||

Mahodadhiɱ aparimitaɱ mahā-saraɱ||
Bahu-bheravaɱ ratana-gaṇānam ālayaɱ,||
Najjo yathā maccha-gaṇa-Saŋgha-sevitā||
Puthū savantī upayanti sāgaraɱ.||
[53] evaɱ naraɱ annadapānavatthadaɱ||
Seyyā nisajjattharaṇassa dāyakaɱ,||
Puññassa dhārā upayanti paṇḍitaɱ||
Najjo yathā vārivahāva sāgaran ti.|| ||


Contact:
E-mail
Copyright Statement