Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka Nipāta
10. Kakudha Vagga

Sutta 99

Sīha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[121]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Sīho bhikkhave miga-rājā sāyaṇha-samayaɱ āsayā ni-k-khamati||
āsayā nikkhamitvā vijamhati||
vijamhitvā samannā catuddisaɱ anuviloketi||
samantā catuddisaɱ anuviloketvā tikkhattuɱ sīha-nādaɱ nadati||
tikkhattuɱ sīha-nanādaɱ naditvā gocarāya pakkamati.|| ||

So hatthissa ce pi pahāraɱ deti,||
sakkaccaɱ yeva pahāraɱ deti||
no asakkaccaɱ.|| ||

Mahisassa ce pi pahāraɱ deti,||
sakkaccaɱ yeva pahāraɱ deti||
no asakkaccaɱ.|| ||

Gavassa ce pi pahāraɱ deti,||
sakkaccaɱ yeva pahāraɱ deti||
no asakkaccaɱ.|| ||

Dipissa ce pi pahāraɱ deti,||
sakkaccaɱ yeva pahāraɱ deti||
no asakkaccaɱ.|| ||

Kudda- [122] kānaɱ ce pi pāṇānaɱ pahāraɱ deti,||
annamaso sasaviḷārānam pi,||
sakkaccaɱ yeva pahāraɱ deti||
no asakkaccaɱ.|| ||

Taɱ kissa hetu?|| ||

Mā me yogga-patho nassā ti.|| ||

 

§

 

'Siho' ti kho bhikkhave,||
Tathāgatass'etaɱ adhivacanaɱ arahato Sammā-sambuddhassa.|| ||

Yaɱ kho bhikkhave Tathāgato parisāya dhammaɱ deseti,||
idam assa hoti sīha-nādasmiɱ.|| ||

Bhikkhunaɱ ce pi bhikkhave Tathāgato dhammaɱ deseti,||
sakkaccaɱ yeva Tathāgato dhammaɱ deseti||
no asakkaccaɱ.|| ||

Bhikkhunīnaɱ ce pi bhikkhave Tathāgato dhammaɱ deseti||
sakkaccaɱ yeva Tathāgato dhammaɱ deseti||
no asakkaccaɱ|| ||

Upāsakānaɱ ce pi bhikkhave Tathāgato dhammaɱ deseti,||
sakkaccaɱ yeva Tathāgato dhammaɱ deseti||
no asakkaccaɱ.|| ||

Upāsikānañ ce pi bhikkhave Tathāgato dhammaɱ deseti,||
sakkaccaɱ yeva Tathāgato dhammaɱ deseti||
no asakkaccaɱ.|| ||

Puthujjanānaɱ ce pi bhikkhave Tathāgato dhammaɱ deseti||
antamaso annahāranesādānam pi,||
sakkaccaɱ yeva Tathāgato dhammaɱ deseti||
no asakkaccaɱta.|| ||

Taɱ kissa hetu?|| ||

Dhamma-garu bhikkhave Tathāgato Dhamma-gāravo" ti.|| ||


Copyright Statement